Su Kapangeni sa Ampun kanu Kadenan
Lu i nia pakatumpa kanu 'gkaunutan nu pasesengal. Inisulat i nia nu Daud guna edtalui sekanin nu Nabi Natan makapantag kanu kinalilini nin kani Batsiba.a
51
Hu Kadenan, sia luyud kanu sangat a kakalimu nengkana lati aku sa nanam.
Sia luyud kanu da idsan nin a lat a nanam'engka
na punas ka su manga kinandusa ku sa leka!
2 Limpiu aku nengka kanu manga kadupangan ku!
Suti aku nengka kanu manga kabaladusan ku!
3 Kagina katawan ku man i nakasungkang aku sa leka,
lalayun ku 'gkapagitung su manga kinambaladusa ku.
4 San aku bu man nakandusa sa leka.
Su pinggula ku na da nengka kasuati
tembu nakabenal ka sa kinasugat'engka sa laki sa kawagib.
Dait man a sugaten aku nengka sa kawagib.
5 Baladusa aku den man iganat pan sa kinambata sa laki,
apia pegkalalingen aku pamun na baladusa aku den.
6 Benal man a nia nengka 'gkasuatan na su ikelas a pamusungan,
tembu papedtuntayan nengka sa laki sia kanu pamusungan ku su ilemu nengka.
7 Salawati aku nengka ka enggu malimpiu su pamusungan ku,b
gagasi aku nengka ka enggu pegkaputi su atay ku sa lawan pan kanu kaputi nu gapas.
8 Ipagedam'engka sa laki 'bpaluman su kagalaw,
suguti ka a magalaw 'bpaluman su sangat a pinagkalubay nengka a pamusungan.c
9 Punas ka den su manga kabaladusan ku,
punas ka den su langun nu kadupangan ku.
10 Hu Kadenan, pangaden ka sa laki su ikelas a pamusungan,
enggi aku sa bagu enggu matidtu a itungan.
11 Di aku nengka ipedtangka kanu kaadapan nengka,
di ka ibpagawa sa laki su Suti a Ruh nengka.
12 Pangenin ku i imbalingan nengka sa laki su kagalaw a nagedam ku kanu kinalipuas'engka sa laki,
tabangi aku sa kasangul'u pamusungan ku sa kapaginugut sa leka.
13 Ka amaika maitu na makapamandu ku su manga ukit'engka kanu manga baladusa
taman sa edtaubat silan enggu makasangul 'bpaluman sa leka.
14 Hu Kadenan a 'bpelipuas sa laki,
ampun ka su kinapatuga ku kanu lugud nu ped a taw
ka enggu aku makadsengal-sengal sa kagalaw sabap sa kalipuas'engka sa laki.
15 Hu Kadenan a Mapulu, ukai ka su ngali ku
ka enggu aku makapugi sa leka.
16 Dikena man su manga kurban i 'gkalilinian nengka,
ka apia 'gkurbanan ku paman seka sa kurban a pedtutungen langun,e
na dili bun i entu makasuat sa leka.
17 Hu Kadenan, nia nengka man 'gkasuatan a kurban
na su kababa na ginawa enggu su kadtaubat sa senep sa atay,
na entu ba man a kurban i di nengka ikias.
18 Na sabap sa 'gkasuatan nengka su siudad a Zion na enggula ka u ngin i makagkapia sa lekanin.
Patindeg ka 'bpaluman su alad'u Awrusalim.
19 Na amaika maitu na kasuatan nengka den ba a entu su manga dait a kurban a mana su manga kurban a pedtutungen langun.
'Gkurban bun silan sa mangaguda a mama a sapi lu kanu pegkurbanan sa leka.