Su Tidtu a Kukuman nu Kadenan
Su nia a Sengal na inisulat'i Asap.
50
Su Kadenan a Mapulu a Barakat sa Langun na midtalu sekanin,tinawag'in su langun na taw sa dunia
iganat sa sebangan taman sa sedepan.
2 Iganat kanu Zion a sangat i kapia i palas'in a siudad
na pakatayaw lu su sigay nu Kadenan.
3 Su Kadenan tanu na pakatingguma sa lekitanu, ka di man sekanin mapadtaday.
'Bpangalaw-kalaw a apuy i 'bpangunanan lun,
su sangat i kabandes'in a sambel i pedsanggiup kanu embala-bala nin.
4 Tinawag'in su sulega enggu su dunia
ka enggu makadsaksi kanu kapangukum'in kanu manga taw nin
5 sa nia nin kadtalu na “Limuden sia sa laki su manga pinamili ku a matidtu
a nangaden sa kapasadan sa laki sia nakanggulalan kanu kinagkurban nilan!”
6 Ipebpayag'u sulega su katidtu nu Kadenan,
kagina su Kadenan demun man i 'bpangukum.
7 Pidtalu pamun nu Kadenan i “Sekanu a manga taw ku, pakikineg kanu.
Saki su Kadenan a Kadenan nu,
na ipaamad ku sa lekanu su kadaluakan nu a manga taw a Israil.
8 Na dikena nia ku kapendaway sa lekanu i sabap kanu manga kurban nu
atawa ka kanu manga tinutung a manga kurban a tatap'u ipegkurban sa laki.
9 Dikena ku man nasisita su manga tudu nu a sapi kanu manga kamalig'u,
atawa ka su manga kambing'u kanu manga lugenan nilan,
10 kagina su langun man nu talaw a binatang kanu damakayu na laki,
maitu bun su langun nu sapi kanu langun na bakulud.
11 Na katawan ku man su langun na papanuk kanu manga palaw ka laki bun,
maitu bun su langun nu malanap-lanap kanu manga malinawag.
12 Na amaika magutem aku man na di ku den nasisita i edtalun ku pan sa lekanu
kagina su dunia enggu su langun nu nakadalem lun na laki.
13 Ngintu besen, nia nu kataw ka keman aku sa sapu na manga tudu a sapi,
atawa ka minum aku sa lugu na manga kambing?
14 Nia man kurban a 'gkasuatan ku na su kadsukul-sukul'u sa laki
enggu su katuman kanu manga inibpasad'u sa laki a Kadenan a Mapulu sa Langun.
15 Tawag aku nu man kanu timpu nu kamasengetan,
ka ilipuas ku man sekanu taman sa mapugi aku nu mambu.”
16 Ugaid'a kanu manga dupang a taw na nia kadtalu nu Kadenan na
“Dala katagan nin u makapayag'u su manga pangitaban ku
atawa ka su kapasadan ku.
17 Kagina 'gkabensian nu bun su kapapedtidtu ku sa lekanu,
ipegkias'u su ngin i pedtalun ku a enggulan nu.
18 Na amaika pakailay kanu sa manga tanegkawn na makin nu pebpakaten
enggu su manga takiuga na makin nu pedtagapedan.
19 Su ngali nu na lalayun pedtalu sa mawag,
su dila nu na lalayun 'bpagakal.
20 Pedsenditan nu sa mawag a galebekan su manga suled'u,
'bpanila-tilan nu su tebped'u sa pused.
21 Na kanu kinanggula nu kanu entu, na dala ku sekanu edtalui,
tembu nia nu kataw ka pakaluyud aku sa lekanu.
Ugaid'a saguna na ipaamad ku sa lekanu su entu enggu sugaten ku sekanu sa kawagib.
22 Na su sekanu a nakalipat den sa laki a Kadenan na imaman kanu
kagina amaika dili, na lupet-lupeten ku sekanu, na dala isa bu a makadtabang sa lekanu.
23 Ugaid'a su pegkurban sa laki sa kadsukul-sukul na pembadtugen aku nin
enggu su penggulalan menem kanu ukit ku
na ipailay ku lun su kalipuas ku sa lekanin.”