Kababalan i Kasalig sa Kakawasan
Lu i nia pakatumpa kanu 'gkaunutan nu pasesengal. Su nia a Sengal na inisulat'u manga tupu ni Kura.
49
Su langun nu sekanu a manga bangsa na pakikineg kanu,su langun nu sekanu a 'bpamegkaleben sia sa dunia na panuliman kanu sa mapia.
2 Magidsan i balapantag enggu dikena balapantag a taw,
kawasa atawa ka miskinan a taw na pamakikineg kanu sa mapia.
3 Ka edtalu aku sa manga kadtalu a makaenggay sa ilemu;
su dalem'u pamikilan ku na napenu na manga katuntay.
4 Pakikinegen ku su mapia a palibasan,
edsinantalen ku su maena nin gay ku pebpaguni kanu palabuni-bunian a kutiapi.
5 Enduken man ka 'gkagilekan aku sa timpu na kasimuketan
atawa ka sa timpu na nakabalibet sa laki su manga kuntela ku?
6 Su entu na nia nilan pedsaligan na su kakawasa nilan
enggu ipedsandag'ilan su kadakel'a kakawasan nilan.
7 Ugaid'a natatalanged a dala taw a makagaga temebus kanu ginawa nin sia kanu kapatay nin,a
dala makagaga mayad kanu Kadenan asal bu na di den matay.
8 Kagina sangat i kapulu nin su katebus kanu umul'u taw,
di makagaga i apia ngin i kadakel'in a ibayad
9 asal bu na di den matay su taw
ka enggu makapaguyag-uyag den taman sa taman.
10 Na katawan tanu man i apia su manga balaitungan a taw na matay bun;
maitu bun su manga babal enggu su manga taw a dala katagan nin na mamamatay bun silan langun.
Na su manga taw a entu na mangatagak bu su kakawasan nilan kanu manga ped a taw.
11 Na su pakubulan nilan den i mabaluy a walay
a kandalepan nilan taman sa taman,
apia aden pan manga lupa nilan a nakanggungala kanilan.
12 Apia kawasa pan a benal su taw na di i entu makaungen kanu kapatay nin,
ka nanget a mamamatay bun silan a mana su manga binatang.
13 Na maitu bun ba i manggula nu manga taw a nia nilan pedsaligan na su ginawa nilan
enggu su manga taw a 'gkangasuatan nilan a benal su kangadtalu nilan.
14 Natatalanged a matay bun silan a mana su manga bili-bili a 'bpananggiten kanu pedsumbalian lun,
'bpagagaken man silan nu kapatay kanu pakubulan.
Na kanu kagkapita na kakamalan silan nu manga taw a matidtu.
Su manga bangkay nilan na maledak den kanu pakubulan nilan
a mawatan a benal i kambidaya nin kanu danden a mangapia a pegkalebenan nilan.
15 Ugaid'a saki na tebusen aku nu Kadenan ebpun kanu kapegkagaga nu kapatay,
natatalanged i ilipuas aku nin.
16 Na da ka 'bpangandam amaika pegkawasa su ped a taw
enggu su kakawasan nilan na 'bpangiseg i kadakel'in,
17 kagina di nilan bun i entu madtatanggit kanu kapatay nilan,
su kakawasan nilan na di nilan bun madtapik kanu pakubulan.
18 Na gagalu na bibiag pan su manga kawasa a taw na initimbang'ilan i ginawa nilan sa balabahagian silan a manga taw,
'bpamedtan silan nu manga taw sabap kanu kinambantas'u kabpaguyag-uyag'ilan.
19 Ugaid'a apia ka maitu na madtagapeda bun silan nu manga katupuan nilan a namamatay den,
lu kanu dalepa a di den silan makailay sa maliwanag.
20 Su kawasa a manga taw a di pakatuntay kanu bantang
na mana su manga binatang a mamamatay bun.