Su Kabadtugan enggu su Bagel'u Zion
Su nia a Sengal na inisulat'u manga tupu ni Kura.
48
Su Kadenan a Mapulu a Kadenan tanu na sangat i kabarakat'inenggu dait a benal a pebpugin kanu siudad'in lu kanu suti a palaw nin.
2 Su entu na malambeg enggu sangat i kapia nin
a makagalaw kanu langun nu taw sa dunia.
Su suti a palaw a Zion
na siudad'u Barakat sa Langun a Datu.
3 Su Kadenan na lu kanu manga kuta nu Awrusalim
ka ipebpagilay nin i sekanin i kuta nu manga taw lu.
4 Su manga datu na mindidilimudan
ka lusudan nilan su entu a siudad.
5 Ugaid'a guna nilan mailay su entu a siudad na nangagaip silan,
kinukuk silan na gilek taman sa namakapalalaguy silan.
6 Na sabap kanu gilek'ilan na kinemegkel silan
enggu 'gkangapasangan silan a mana su babay a 'gkapasangan sa kapembata nin.
7 Bininasa silan nu Kadenan a mana su manga kapal sa Tarsis a 'bpelayag
a nasugat'u sangat i kabandes'in a sambel a ebpun sa sebangan.
8 Na mana bun su nangakineg tanu pantag kanu nia a siudad,
na saguna na nadsusuliman tanu demun u ngin i pinggula nin kanu nia a siudad'in.
Na sekanin i Kadenan tanu a Mapulu a Barakat sa Langun
na pembagelan nin sa mapia su nia a siudad'in taman sa taman.
9 Hu Kadenan, sia kanu ludep'u Suti a 'Bpagagaman sa leka
na 'bpamikilen nami su sangat a kakalimu nengka.
10 Hu Kadenan, su ingala nengka na badtug
enggu pebpugin nu langun nu taw kanu pat a pisuk'u dunia,
kagina su kapendatu nengka na matidtu.
11 Suguti ka a makanggalaw-galaw su langun na taw kanu palaw a Zion
enggu su langun nu dalepa a sakup'u Yahuda
sabap kanu kukuman nengka a wagib.
12 Libet'u su palaw a Zion,
ka bilang'u su manga tantawan nin.
13 Edsusuliman nu su manga alad'in
enggu su manga kuta nin
ka enggu nu mapanudtul su entu kanu manga temundug pan a manga muliataw nu,
14 edtalu nu kanilan i “Sekanin su Kadenan
a Kadenan tanu taman sa taman.
Sekanin i pedtapid sa lekitanu taman sa taman.”