Su Kadenan i Pendatu kanu Langun nu Bangsa
Lu i nia pakatumpa kanu 'gkaunutan nu pasesengal. Su nia a Sengal na inisulat'u manga tupu ni Kura.
47
Sekanu a manga taw kanu lusud'u dunia na edtataupay kanu sa kapia na ginawa!Edsengal kanu sa matanug sa ukit'a kapugi kanu Kadenan sa aden kagalaw nin.
2 Kagina su Kadenan a Mapulu a Barakat sa Langun na dait a pagadatan.
Sekanin i mabagel a datu a pendatu kanu lusud'u dunia.
3 Inipataban nin sa lekitanu su manga bangsa
ka pinandatuan nin sa lekitanu su manga taw.
4 Pinamili nin su kalupan a makabpusaka nin sa lekitanu a kagkalebenan tanu.
Ibpemamasela tanu su entu a kalupan nu manga tupu nu Yakub a papedtayan nin.
5 Na su Kadenan a Mapulu na mibpapulu lu kanu kulesi nin a 'bpamelalis su manga taw sa kapegkapia na ginawa nilan,
pebpaguni silan sa manga tambuli.
6 Edsengal kanu sa pugi kanu Kadenan, edsesengal kanu sa pugi sa lekanin!
Edsengali nu su Datu tanu sa pugi sa lekanin, edsesengal kanu sa pugi sa lekanin!
7 Kagina su Kadenan i pendatu kanu lusud'u dunia,
edsengali nu sekanin sa sengal a pugi sa lekanin!
8 Su Kadenan i pendatu kanu langun nu bangsa,
'bpagagayan sekanin kanu suti a kulesi nin.
9 Na su manga datu nu manga bangsa na mindidilimudan silan
a kaped'u manga taw nu Kadenan, a su Kadenan a pedsimban nu Ibrahim.
Kagina su langun nu pendatu kanu dunia na kanu Kadenan,
na sangat man a 'bpagadatan sekanin.