Su Kabpaninindeg'u Kadenan kanu Siudad'in enggu kanu manga Taw nin
Lu i nia pakatumpa kanu 'gkaunutan nu pasesengal a nia usalen a legku na bedtuan sa Alamut.a Su nia a Sengal na inisulat'u manga tupu ni Kura.
46
Su Kadenan i kelung tanu enggu bagel tanu,lalayun sekanin adil sa kadtabang'in sa lekitanu sa timpu na kamasengetan.
2 Tembu di dait a magilek tanu sa apia makuyung pan su dunia,
apia matubak pan su manga palaw lu kanu pused'u lagat.
3 Apia embagel pan sa mangasela su lagat a mana den lugung i uni nin
enggu apia magayangkeng pan su manga palaw.
4 Aden lawas'a ig a pakaenggay sa kagalaw kanu siudad'u Kadenan,
su siudad a lu ba su suti a 'bpangadapan kanu Kadenan a Mapulu sa Langun.
5 Na lu kanu luk'u entu na lu ba su Kadenan tembu di magkeleng-keleng su entu;
pedtiakapan nin su manga taw nu entu kanu uman 'gkatibuas.
6 Na su ped a manga bangsa na sangat a 'gkangagilekan, su manga pendatuan na pamakadadsang den.
Na su katanug bu nu suala nu Kadenan na 'gkatunag den su dunia.
7 Su Kadenan a Mapulu a Barakat sa Langun a Kadenan nu Yakub
na sia sa lekitanu ka pegkelungan tanu nin.
8 Sia kanu, ka ilay nu
su pinggula nu Kadenan a Mapulu sia sa dunia a makagaip-gaip.b
9 Patelenen nin su kapembunua kanu lusud'u dunia;
'bpanebpeden nin su manga busug enggu pembinasan nin su manga dilek;
pedtutungen nin su manga kelung.
10 Nia nin kadtalu na “Telen kanu, ka imamani nu i saki man su Kadenan!
Pugin aku nu manga bangsa,
badtugen aku kanu lusud'u dunia.”
11 Su Kadenan a Mapulu a Barakat sa Langun a Kadenan nu Yakub
na sia sa lekitanu ka pegkelungan tanu nin.