Su Pangeni-ngeni sa Kadtabang'u Kadenan
Lu i nia pakatumpa kanu 'gkaunutan nu pasesengal. Su nia a sengal a mapia i kinaumbal lun na inisulat'u manga tupu ni Kura.
44
Hu Kadenan, nakineg'u manga tangila nami demuna napanudtul'u manga katupuan nami
u ngin i manga pinggula nengka kanu manga timpu nilan
sa kanu nangaipus den a manga timpu.
2 Na sia nakanggulalan kanu kapegkagaga nengka na pinaawa nengka kanu manga kalupan nilan su manga bangsa a di pedsimba sa leka
ka lu nengka ba pinagkaleben su manga katupuan nami.
Siniksa nengka su manga bangsa a entu,
ugaid'a pinapaguyag-uyag'engka sa mapia su manga katupuan nami.
3 Nasakup'ilan man su kalupan sa dikena sabap kanu manga matalem'ilan,
atawa ka nanaban silan sa dikena sabap kanu bagel'ilan
ka sabap kanu kabarakat'engka enggu kapegkagaga nengka.
'Gkatawan nilan i pedtapiden nengka silan
kagina ipegkalimu nengka silan.
4 Hu Kadenan ku, seka man i Datu ku,
seka man i napapanaban sa lekami a manga tupu nu Yakub.
5 Na sia nakanggulalan kanu kapegkagaga nengka na natalaw nami su manga kuntela nami;
sia nakanggulalan kanu ingala nengka na nakapalusak'ami su manga kuntela nami.
6 Ka dikena nia ku man pedsaligan a makapapanaban sa laki su busug ku
enggu dikena su sundang ku i makalipuas sa laki,
7 ka seka man i napapanaban sa lekami kanu manga kuntela nami,
inibetad'engka sa kayayan su 'gkangabensi sa lekami.
8 Hu Kadenan nami, lalayun nami man seka ibpemamasela
enggu manginsukulen kami mugi kanu ingala nengka taman sa taman.
9 Ugaid'a saguna na inikias kami nengka enggu pinagkaya kami nengka,
di nengka den pedtapiden su manga sundalu nami kanu kapembunua.
10 Inipatalaw kami nengka kanu manga kuntela nami,
taman sa pinangua nilan su manga kaaden nami.
11 Inisugut'engka a makailing kami kanu manga bili-bili a pedsumbalin
enggu initagayak kami nengka kanu manga bangsa.
12 Pibpasa kami nengka a manga taw nengka sa mababa bu i alaga nin,
dala kami nengka demun pagalagai sa mapulu.
13 Inumbal kami nengka a nadtatawan nu manga pagubay nami a dalepa,
pedsudian kami enggu pedtatawan nu namakabalibet sa lekami.
14 Inumbal kami nengka a nadtataungat'u manga bangsa,
'bpangiling-kiling pan silan sa kapedsudi nilan sa lekami.
15-16 Na kanu kagagabian na 'gkatagu aku bu sa kayayan.
Dala den beneng ku a makasangul ku pan sa kabpagumpak
enggu kapedsudi sa lekami nu manga kuntela nami.
17 Na su langun nu entu na natala nami,
apia nia nin kaaden i dala nami seka kalipatani
enggu dala nami sungkanga su kapasadan nengka.
18 Su pamusungan nami na dala taligkud sa leka,
dala nami sungkanga su manga kasuguan nengka.
19 Ugaid'a mana kami nengka linupet kanu dalepa nu manga talaw a binatang
enggu mana kami natangguban nu sangat i kalibuteng'in.a
20 Hu Kadenan, amaika nalipatanan nami man seka semimba
atawa ka sinemimba kami kanu pegkakadenanen
21 na natalatantu man a katawan nengka su entu,
kagina 'gkatawan nengka man su ngin i dalem'u atay nu taw.
22 Ugaid'a sabap sa luyud kami sa leka na uman-uman gay na mana kami pedsangul sa kapatay,
mana kami manga bili-bili a pedsumbalin.b
23 Hu Kadenan a Mapulu, embangun ka! Nginan ka mana ka pedtulug?c
Imaman ka man! Di kami nengka ipegkias taman sa taman.
24 Ngintu ka pedtaligkudanan kami nengka?
Ngintu ka di nengka ibpamamantag su kapegkalasay nami enggu su kabpagumis sa lekami?
25 Nangaudtang kami den kanu lupa,
taman sa su manga badan nami na di den pakagaga pembangun.
26 Embangun ka den, ka 'gkadtagi kami den.
Ilipuas kami nengka den sabap kanu sangat a kakalimu nengka.