Ikadua a Libelu
(Sengal 42—72 )
Su Kapegkapangingalap kanu Kadenan enggu su Kapedtabang'in kanu Kamalasayan ku
Lu i nia pakatumpa kanu 'gkaunutan nu pasesengal. Su nia a sengal a mapia i kinaumbal lun na inisulat'u manga tupu ni Kura.
42
Hu Kadenan ku, na u panun i kabpangingalap'u saladeng kanu leges'u lawas'a igna maitu bun ba i kabpangingalap ku sa leka.
2 'Gkapangingalap a benal'u ginawa ku su tidtu a Kadenan.
Kanu pan guna i kadtindeg ku kanu kaadapan nin
ka enggu aku makapangadap sa lekanin?
3 Magabi sa malamag na 'gkainem ku den su lu nu mata ku,
a nia pakaidsa nu manga kuntela ku sa laki na
“Ngintu? Endaw den su Kadenan nengka?”
4 Na mana 'gkalupet i atay ku amaika 'gkagkalendem ku su nangaipus a timpu
a su kabpelu ku kanu walay a pedsimban sa leka
a 'bpangunanan ku su madakel a taw.
Madakel kami a benal a pedsela-sela a pamakalalis sa kagalaw enggu pedsengal sa kapedsukul-sukul sa leka.
5 Nia 'gkadtalu nu ginawa ku na “Ngintu ka pedtegka i manggiginawa ku?
Ngintu ka 'gkalingasa i ginawa ku?
Su Kadenan man i dait a inam ku, tembu 'bpapalumanan ku sekanin mugi
a Kadenan ku a 'bpelipuas sa laki.
6 Pedtegka den man i manggiginawa ku,
tembu sia ku den seka pegkakalendemen
kanu kalupan nu Jordan, kanu palaw a Hirmun
enggu kanu palaw a Misar.
7 Mana aku nengka man tinangguban sa masela a bagel,
mana aku binausan kanu pendagus a ig sa sampaw.
8 Ugaid'a uman malamag na ipebpagilay nengka sa laki su sangat a kakalimu nengka,
na uman mambu magabi na pedsengal aku sa manga sengal
a pangeni-ngeni sa leka a Kadenan a minenggay kanu uyag-uyag ku.
9 Na nia ku 'gkadtalu kanu Kadenan ku a mana masela a watu a pegkelung sa laki na
“Ngintu ka linipatanan aku nengka den?
Ngintu ka dait pan a mukit aku sa kalidu na ginawa
kanu kabpagumis'u manga kuntela ku sa laki?”
10 Mana 'bpagumbas kanu tulan ku i kasakit'u kabpagumpak'a manga kuntela ku sa laki
a nia nilan lalayun ibpagidsa sa laki na “Endaw den su Kadenan nengka?”
11 Nia 'gkadtalu nu ginawa ku na “Ngintu ka pedtegka i manggiginawa ku?
Ngintu ka 'gkalingasa i ginawa ku?
Su Kadenan man i dait a inam ku, tembu 'bpapalumanan ku sekanin mugi
a Kadenan ku a 'bpelipuas sa laki.”