Su Pangeni-ngeni sa Kagkapia nu Taw a Pedsakit
Lu i nia pakatumpa kanu 'gkaunutan nu pasesengal. Su nia a Sengal na inisulat'u Daud.
41
Mapia den a benal kanu taw amaika temabang kanu dala 'gkagaga nin a manga taw,ka ilipuas sekanin nu Kadenan a Mapulu sa timpu na kamasengetan.
2 Kelungan nin sekanin enggu pagkalendun nin i umul'in.
Enggan nin sa mapia a kambebetad kanu pendalepan nin
enggu di nin isugut a makapalad sekanin kanu bagel'u manga kuntela nin.
3 Tabangan sekanin nu Kadenan a Mapulu sa kagkabagel'in kanu di nin kabpangengelag,
pagkapian nin sekanin kanu kapedsakit'in.
4 Na nia 'gkadtalu nu ginawa ku na “Hu Kadenan a Mapulu, pagkapia aku nengka pan.
Lati aku sa nanam ka mimbaladusa aku man sa leka.”
5 Su manga kuntela ku na pedtalu silan sa mawag pantag sa laki
sa nia nilan kadtalu na “Kanu guna i kapatay nin ka enggu kalipatanan den su ngala nin?”
6 Na amaika pegkakapen aku nilan na matatig sa ibpagidsa nilan u ngin i 'gkambebetad ku
ugaid'a sia kanu itungan nilan na 'bpelimud bu silan sa kangadtalu a makalibak'ilan sa laki.
Ka endaw i kaliu nilan na ipebpayapat'ilan den pedtalu-talu su entu.
7 Langun nilan a 'gkangabensi sa laki na ibpamagedunga aku nilan;
nia nilan bu 'bpagitungen na mawag a benal pantag sa laki.
8 Nia nilan 'bpamedtalun na “Mapasang den su sakit'in
tembu di den sekanin makambangun kanu 'bpagigan nin.”
9 Na apia su pakat ku a benal a pedsaligan ku
a ibpagatuang ku sa kapegkan na natika aku nin temipu.
10 Ugaid'a seka, Hu Kadenan a Mapulu, na lati aku sa nanam,
pagkapia aku den kanu sakit ku ka enggu ku silan kasulian.
11 Kanu maitu ba a ukit na katawan ku i 'gkasuatan aku nengka
kagina di aku nengka ipapedtalaw kanu manga kuntela ku.
12 Pedtabangan aku nengka man sabap kanu katidtu ku,
pedsugutan nengka i san aku kanu kaadapan nengka taman sa taman.
13 Pugin su Kadenan a Mapulu a Kadenan nu manga taw a Israil taman sa taman.
Amin!