Su Kadsukul-sukul kanu Kalipuasan enggu su Kapangeni sa Tabang
Lu i nia pakatumpa kanu 'gkaunutan nu pasesengal. Su nia a Sengal na inisulat'u Daud.
40
Tinemigkel aku sa kinapangingapa ku sa tabang ebpun kanu Kadenan a Mapulu,na pinakikineg'in mambu su kapedtawag ku lun mangeni sa tabang.
2 Initepad aku nin kanu madalem a kalut a aden lebul'in,
pinadtimpawa nin su ay ku lu kanu masela a watu,
sinigulu nin i nakadtindeg aku sa mapia.
3 Pinamandu aku nu Kadenan a Mapulu sa bagu a sengal a madsengal ku,
sengal sa kapugi sa lekanin.
Na madakel i mamakailay kanu entu tembu madakel i kaadenan na gilek sa lekanin,
taman sa mamedsalig silan sa lekanin a Kadenan a Mapulu.
4 Mapia den a benal kanu taw a semalig kanu Kadenan a Mapulu
enggu di mubay kanu manga taw a mapulu i kapegkailay nin sa ginawa nin,
atawa ka di semimbul kanu manga taw a pedsimba sa pegkakadenanen.
5 Hu Kadenan a Mapulu a Kadenan ku, takep-temakep
su kangagaipan a pinggula nengka sa lekami enggu su manga kahanda nengka sa lekami;
dala man pagidsan nengka.
Na amaika ipayag ku su langun nu entu
na di ku magaga edtalu sabap sa kadakel'in.
6 Dikena nengka man 'bpangingalapen su embalang-balang a kurban,
dikena nengka man ipebpaliugat su kurban a pedtutungen langun enggu su kurban kanu kabaladusan
ugaid'a binukatan nengka sa mapia su tangila ku sa kapakikineg.
7 Tembu nia ku nadtalu na “Nia aku bun,
a mana bun su nakasulat pantag sa laki kanu kitab.
8 Hu Kadenan ku, 'gkasuatan ku man a unutan su kahanda nengka;
su manga kasuguan nengka na initagu ku kanu pamusungan ku.”
9 Sia kanu luk'u mindidilimudan a manga taw nengka na ipebpayag ku su kinalipuas'engka sa laki.
Hu Kadenan a Mapulu, katawan nengka man i di temelen su ngali ku sa kapayag ku sa entu.
10 Di ku a benal ipamagena su kinalipuas'engka sia kanu pamusungan ku;
'bpanudtulen ku su katidtu nengka enggu su kalipuasan nengka.
Di ku bun ibpamagena su sangat a kakalimu nengka enggu su katidtu nengka
sia kanu luk'u mindidilimudan a manga taw nengka.
11 Hu Kadenan a Mapulu, di ka 'bpagelen
su lat a nanam'engka sa laki;
isugut'engka i su sangat a kakalimu nengka enggu su katidtu nengka
na lalayun demalinding sa laki.
12 Ka nakabalibet sa laki su kasimuketan
a di ku den magaga milang.
Su manga kabaladusan ku na nabausan aku nin den,
taman sa di aku den pakailay.
Su manga kabaladusan ku na nia pan madakel kumin kanu bilangan nu buk ku,
tembu 'gkaawan aku den na inam.
13 Hu Kadenan a Mapulu, 'bpangenin ku sa leka i ilipuas aku nengka pan;
pamagayasi aku den edtabang.
14 Padtaday ka a makagkaya
enggu mabulibug su manga taw a nia nilan pebpapangilayn na kapatay ku.
Padtaday ka a makapalalaguy sa kayayan
su manga taw a nia nin pegkiugan na kagkaidan aku.
15 Padtaday ka a mangalunguk sa kayayan su manga taw a pedsudi sa laki.
16 Ugaid'a su langun nu pedsupeg sa leka
na sangat a makadsisigalaw san sa leka.
Su langun nu 'bpaginagkay kanu kalipuasan nengka
na lalayun nilan madtalu i “Su Kadenan a Mapulu i labi a pakagaga!”
17 Hu Kadenan a Mapulu, saki na dala man 'gkagaga nin enggu pakanasisita a benal,
di aku nengka 'bpelipatani.
Ka seka man i pedtabang enggu 'bpamelipuas sa laki;
tembu 'gkadtagi aku nengka den mamagayas.