Su Kapangeni sa Ilemu enggu su Kaampun nu Kadenan
Lu i nia pakatumpa kanu 'gkaunutan nu pasesengal a si Yidutun. Su nia a Sengal na inisulat'u Daud.
39
Nia 'gkadtalu nu ginawa ku na “Pangingatan ku su manga penggulan kuka enggu di aku makandusa sia kanu kangadtalu ku,
sukuben ku su ngali ku
gagalu na nakalibet pan sa laki su dupang a manga taw.”
2 Linemenek aku demun,
dala aku a benal edtalu apia mapia pan i pedtalun ku;
ugaid'a makin nangiseg su kamalasayan a 'gkagedam ku,
3 'gkalingasa a benal i ginawa ku.
Uman ku 'gkapagitung su kamalasayan ku na makin 'bpangiseg su kapegkalingasa na ginawa ku
tembu nakaliu kanu ngali ku i
4 “Hu Kadenan a Mapulu, pakatawi ka sa laki u endaw taman i uyag-uyag ku
enggu ngin i kauget'u manga gay ku.
Pakatawi ka sa laki u kanu i kaalap'engka sa laki.
5 Su inenggay nengka a manga gay nu uyag-uyag ku na mana mangagan a benal,
su uyag-uyag ku na dala bun sa leka.
Nanget man a su uyag-uyag'u uman i isa na mana sambel a 'bpagukit bu.
6 Nanget man a su uman i isa na mana alung-alung a 'gkalangiap bun.
Benal a su kabpaginapas'ami na dala bun katagan nin;
'bpaginapas kami 'bpelimud sa kaaden ugaid'a di nami katawan u entain i makakua lun u madala kami den.
7 “Hu Kadenan a Mapulu, saguna na ngin pan i 'bpagingapan ku?
Su inam ku na san man sa leka.
8 Ilipuas aku nengka kanu langun nu kabaladusan ku.
Di ka pedsuguti a kadtatawan aku nu manga taw a babal.
9 Linemenek aku kanu kinasiksa nengka sa laki, dala ku ukai su ngali ku,
kagina katawan ku i seka i minggula sa entu.
10 Ugaid'a saguna na 'bpangenin ku i sugati aku den pedsiksa,
ka mana matay aku den kanu betay nu lima nengka.
11 Na amaika man ka papedtidtun nengka su taw
sa kanu kinambaladusa nin
na pembinasan nengka su ngin i balapantag sa lekanin a mana anay a pegkaket,
nanget man a su uyag-uyag'u uman i isa na mana sambel a 'bpagukit bu.
12 “Hu Kadenan a Mapulu, pakikineg ka su pangeni-ngeni ku,
pakikineg ka su kabpangeni ku sa leka sa tabang,
itagu nengka sa ginawa su kabpagigis'u lu nu mata ku.
Kagina mana aku nengka bu man ana a pedsagad bu sia sa dunia
a mana bun su langun nu kaapuan ku.
13 Iawa nengka den su lipunget'engka sa laki
ka enggu aku magalaw pamun unan nu kapatay ku taman sa kalipatanan aku.”