Su Sengal'u Daud a ibpangeni sa tabang kanu Kadenan.
38
Hu Kadenan a Mapulu, di aku pendawaya kanu sakit'u ginawa nengka,di aku pedsiksa kanu lipunget'engka.
2 Ka mana aku nengka man binusug taman sa nasugat aku,
binetay aku nengka taman sa naudtang aku.
3 Da den 'bpagelagen nu badan ku
sabap kanu lipunget'engka,
da den 'bpagelagen nu tulan ku
sabap kanu kabaladusan ku.
4 Ka mana 'gkaled aku den man nu manga kabaladusan ku,
mana maugat a 'bpamusayn taman sa di ku den 'gkagaga 'bpananggit.
5 Su manga pali ku na 'gkaledak den taman sa pegkadu
sabap kanu kababalan ku.
6 Pakalukup aku sa kasakit
enggu dalem'u kagagabian na pedsegad bu i ginawa ku.
7 Na su badan ku na mana pembidsulan sa kayaw nin,
da den 'bpagelagen ku.
8 Sangat a 'gkalugat aku, da den bagel ku,
pakapaguguliang aku sabap kanu kapegkabulibug'u ginawa ku.
9 Hu Kadenan ku, langun man nu 'gkapangingalap ku na 'gkatawan nengka,
Dikena pakapagena sa leka su kapegkapasang sa laki.
10 Pegkiab-kiab su laleb ku enggu 'gkaawan aku den na bagel,
su kalinawag'u kapegkailay nu mata ku na nadala den.
11 Su manga pakat ku enggu su manga tagapeda ku na 'bpelidasan aku nilan sabap kanu kapegkasakit sa laki,
apia su sakambinabatan ku na pedtangkan aku nilan.
12 Su manga taw a pegkiug 'bpagimatay sa laki na tinanan aku nilan sa litag sa kasigkem'ilan sa laki,
su pegkiug 'bpamungkaid sa laki na nia nilan pembibitialan na su kabinasa ku,
kanu dalem'u kagagabian na nia nilan bu 'bpamikilen na su katipu nilan sa laki.
13 Ugaid'a mimbisu-bisuan aku a mana su taw a di pakakineg,
di aku pedtalu a mana su taw a di pakadtalu.
14 Benal man a nakailing aku sa bisu
a di pedsumpat kanilan.
15 Hu Kadenan a Mapulu, seka man i pedsaligan ku,
natatalanged ku man a sawalen aku nengka
16 sa kanu 'bpangenin ku a nia sa leka a “Di ka pedsuguti su matipu a manga kuntela ku sa magalaw silan sa kataban nilan sa laki,
atawa ka makamamasela silan sabap sa kasiud'u ay ku a sabapan na kaudtang ku.”
17 Ka mana su maudtang aku den man,
di aku pedtangkan nu kamalasayan.
18 Tembu ibpangumpaya ku su kabaladusan ku
a pedsenditan a benal'u ginawa ku.
19 Na su manga kuntela ku na mangabagel a benal,
madakel silan a pengguniat sa laki sa mawag, apia dala sabap'in.
20 Nia nilan inibalas kanu kapianan a pinggula ku na mawag,
pegkuntelan aku nilan sabap sa nia ku 'bpaginapasen penggula na su mapia.
21 Hu Kadenan a Mapulu a Kadenan ku, di aku nengka mapadtaday,
di aku nengka pedtangkai!
22 Hu Kadenan a Mapulu, seka man su kalipuasan ku,
pamagayasi aku nengka den 'gkadtag.