Su Manggula nu manga Taw a Mawag enggu su Manggula nu manga Taw a Mapia
Sengal'u Daud.
37
Di ka 'bpelidu i ginawa nengka sabap kanu manga taw a dupang,di ka pedsekeli u ngin i aden kanilan.
2 Ka mana man silan manga utan a malemu gaid magangu,
mana silan manga pamumulan a mangagan gaid malanes.
3 Salig ka kanu Kadenan a Mapulu enggu enggula ka su ngin i mapia,
ka amaika maitu na makagkaleben ka sa malilintad kanu kalupan a inibpasad'in.
4 Sia ka pangilay kanu Kadenan nengka a Mapulu su kapia na ginawa,
ka inggay nin sa leka su 'gkapaginagkay nu atay nengka.
5 Idedsa nengka sa lekanin a Kadenan a Mapulu su langun nu 'gkagkahanda nengka.
Saligi ka sekanin ka tabangan ka nin man.
6 Ipailay nin sa mana kaliwanag'u senang i dala pinggula nengka a mawag,
su katidtu nengka na mapayag a benal a mana kapayag'u kesi-kesi a maudtu.
7 Patana ka demun sia kanu Kadenan a Mapulu,
ka angati ka su ngin i enggulan nin.
Di ka 'bpelidu i ginawa nengka kanu kapembantas'u manga taw a dupang,
apia pembantas pan su galebekan nilan a mawag.
8 Da ka a benal malipunget.
Kumpen ka su ginawa nengka sa di kakalipunget.
Di ka a benal lemidu i ginawa nengka sabap kanilan
ka makagkaid bu i entu sa leka.
9 Ka su taw man a dupang na binasan nu Kadenan a Mapulu
ugaid'a su pedsalig sa lekanin na malilintad i kandadalepa nin kanu kalupan a inibpasad'in lun.a
10 Na di den man mauget na madala den su manga taw a dupang.
Apia pangilayn pan silan na di den silan matun.
11 Ugaid'a su mababa i muletad'in na makabpusaka lun su dalepa enggu makapaguyag-uyag sa malilintad.
12 Su manga taw a dupang na pegkahandan nilan sa mawag su manga taw a matidtu,
pegkiget i bagang'ilan kanilan.
13 Ugaid'a su Kadenan a Mapulu na pedtatawan nin bu silan,
kagina 'gkatawan nin bun i mangagan den mauma i kakukum'in kanilan.
14 Binindas den nu manga dupang a taw su manga sundang'ilan,
bininteng'ilan den su manga busug'ilan
ka adil den silan sa kaimatay kanu manga taw a dala 'gkagaga nin enggu pakanasisita,
adil den silan sa kaimatay kanu manga taw a 'bpaguyag-uyag sa matidtu.
15 Ugaid'a su manga sundang'ilan na entu bun ba i makasandak kanilan,
su manga busug'ilan na mangatebped.
16 Nia paman labi a mapia su paidu a kaaden nu matidtu a taw
kumin kanu madakel a kaaden nu dupang a taw.
17 Kagina su kapegkagaga nu taw a dupang na nanget a iawa nu Kadenan a Mapulu,
ugaid'a su matidtu a taw na pedtiakapan nu Kadenan a Mapulu.
18 Pedtiakapan nin kanu uman-uman gay su taw a matidtu
enggu makatalima silan sa palihala a dala kapegkapupus'in.
19 Na sia kanu timpu na kamasengetan na di silan makagkaya;
sia kanu timpu na kanggutem na edsusubela pan i kauyagan nilan.
20 Ugaid'a su manga taw a dupang na mamamatay.
Su manga kuntela nu Kadenan a Mapulu na mana silan manga ulak a 'gkagangu nu kayaw nu senang,
mangatadin silan a mana su manga bel.
21 Su taw a dupang na mamangutang a di mamembayad,
ugaid'a su taw a matidtu na masunged enggu maluwag su kapangenggay nin.
22 Ka su manga taw a pinalihalan nu Kadenan a Mapulu na malilintad i kandadalepa nin kanu kalupan a inenggay kanilan,
ugaid'a su manga taw a inipinta nin na pangimatayan nin.
23 Papembantasen nu Kadenan a Mapulu su taw
a 'bpaguyag-uyag sia luyud kanu 'gkasuatan nin,
24 apia mamakasiud silan na di a benal silan mangaudtang,
ka pedsapipin silan nu Kadenan a Mapulu.
25 Na iganat sa wata aku pan taman sa kinagkatua ku den
na dala aku pamun makailay sa taw a matidtu a pinadtaday nu Kadenan a Mapulu
atawa ka su manga wata nilan na 'bpamangeni bu sa makan.
26 Nia katatapan na silan i 'bpangalimuan enggu pedsunged kanu manga ped,
su manga wata nilan na palihala kanilan.
27 Lidasi nu su kanggula sa mawag, ka nia nu enggula na u ngin i mapia,
ka amaika maitu na makapananalusan su kagkaleben nu kanu kalupan taman sa taman.
28 Kagina su Kadenan a Mapulu na nia nin kalilinian na u ngin i wagib
enggu di nin a benal padtadayn su matidtu a manga taw nin.
Pedtiakapan nin silan taman sa taman,
ugaid'a su manga wata nu manga taw a dupang na mamamatay.
29 Su manga taw a matidtu na makabpusaka kanilan su kalupan
enggu lu den ba silan makagkaleben taman sa taman.
30 Su taw a matidtu na nia 'bpeliu kanu ngali nin na ilemu
enggu wagib i pedtalun nu dila nin.
31 Di 'gkaawa kanu pamusungan nilan su kasuguan nu Kadenan
enggu di a benal silan pedsibay kanu lalan nu Kadenan.
32 Su manga dupang a taw na 'bpagayanan nilan su manga matidtu a taw
ka enggu nilan kaimatayan.
33 Ugaid'a su Kadenan a Mapulu na di nin padtadayn su manga taw a matidtu sia kanu manga kuntela nilan,
di nin sugutan a masugat'a kawagib apia mapananggit pan silan sa walay na kukuman.
34 Salig kanu kanu Kadenan a Mapulu taman sa unuti ka su kasuguan nin,
ka amaika maitu na ipulu ka nin sa kabpusaka nin sa leka kanu kalupan,
taman sa mailay nengka su kaimatay nin kanu manga taw a dupang.
35 Aden nailay ku a manga taw a dupang a 'bpamangumis,
ipebpulu nilan i ginawa nilan a mana su mabagel a kayu a sidar'u Libanun.
36 Na guna ku silan embalingani milay na da ku den silan mailay;
pinangilay ku silan ugaid'a da ku den silan matun.
37 Edsusuliman nu su taw a dikena penggula sa mawag, su manga taw a matidtu i galebek'in,
ka mapia man i kapaguyag-uyag'u taw a malilini sa kalilintad.
38 Ugaid'a su manga taw a baladusa na maibped silan mabinasa;
madala kanilan su mapia a kabpaguyag-uyag.
39 Sia kanu Kadenan a Mapulu i kalipuasan nu taw a matidtu;
pegkelungan nin silan sa timpu na kasimuketan.
40 Su Kadenan a Mapulu i pedtabang kanilan enggu 'bpelipuas kanilan;
ibpelipuas'in silan kanu manga taw a dupang,
kagina pabpelindung silan sa lekanin.