Su Kadupang'u Manusia enggu su Kapianan nu Kadenan a Mapulu
Lu i nia pakatumpa kanu 'gkaunutan nu pasesengal. Su nia a Sengal na inisulat'u Daud a panunugun nu Kadenan a Mapulu.
36
Kabaladusan i pedsekat kanu atay nu dupang a taw sa kanggula nin sa mawagtembu dala den gilek'in kanu Kadenan.
2 Sabap kanu kapulu na kapegkailay nilan kanu ginawa nilan,
na di nilan 'gkailay su kabaladusan nilan taman sa di nilan 'gkabensian su entu.
3 Su langun na 'bpeliu kanu ngali nilan na kapamagakal enggu kabudtud;
da den sa kanilan su kabalaitungan enggu su kanggalebek sa mapia.
4 Apia sia den silan kanu 'bpagigan nin na nia nilan bun 'gkapagitung na kanggula sa mawag.
Naginansadan den silan sa kanggula sa dikena mapia,
dala kanilan su kakias kanu ngin i mawag.
5 Hu Kadenan a Mapulu, su sangat a kakalimu nengka na pakasugku den kanu langit,
su katidtu nengka na pakauma taman kanu manga gabun.
6 Su katidtu nu kaenggay nengka sa kawagib na mana kabagel'u mangasela a palaw;
su kapangukum'engka na mana su kadalem'u lagat.
Magidsan i manusia enggu binatang na pedtiakapan nengka.
7 Hu Kadenan a Mapulu, sangat man i kabalapantag'in su sangat a kakalimu nengka.
Mapakay a mapakelung su langun nu taw kanu didalem'u papak'engka.
8 Sia kanu walay nengka na pinagadilan nengka silan sa madakel a pegken
enggu pinainem'engka silan kanu kapianan nengka a mana lawas'a ig a pedtuga.
9 Ka seka man i bualan a pakaenggay sa uyag-uyag;
su sigay nengka i pakatayaw sa lekami.
10 Papanalus ka su sangat a kakalimu nengka kanu manga taw a pegkilala sa leka,
palihalai ka su manga taw a ikelas i pamusungan nin.
11 Di ka pedsuguti a dakudaken aku nu manga taw a 'bpemamasela,
atawa ka mabugaw aku nu manga dupang a taw.
12 Ilay ka, su dupang a manga taw na namakadudsum den kanu lupa,
nakadadsang den silan taman sa di den silan pakambangun.