Su Pangeni-ngeni sa Kalipuas kanu manga Kuntela
Sengal'u Daud.
35
Hu Kadenan a Mapulu, atui ka su pegkuntela sa laki,seka i atu kanu pembunu sa laki.
2 Iselub'engka su pangelung'engka enggu su matalem'engka
ka edtabangi aku nengka.
3 Kua ka su manga dilek'engka
ka itumbuk'engka kanu manga taw a 'bpaneled sa laki
enggu nia ka edtalu sa laki na
“Saki i mapapanaban sa leka.”
4 Talaw ka enggu pagkaya ka
su manga taw a pegkiug 'bpagimatay sa laki.
Padsunud ka silan enggu di ka mapambantas
su manga taw a mawag i kahanda nin sa laki.
5 Na i-iling'engka silan sa ukap a pakabayug'u sambel
sa kapembugaw nu malaikat'engka kanilan.
6 Pagkalibuteng ka enggu pagkalindeg ka su 'bpagukitan nilan
sa kanu kabpanaled'u malaikat'engka kanilan.
7 Ka minumbal man silan sa puketa a padulat sa laki apia dala pinggula ku a mawag kanilan,
kinemalut silan sa madalem a kalut a kaulugan ku.
8 Patingguma ka kanilan su kabinasan sa di nilan 'gkatukawan.
Pangeni-ngenin ku i silan bun i makua nu initana nilan a padulat sa laki,
silan bun i maulug kanu kalut a kinalut'ilan sa laki.
9 Hu Kadenan a Mapulu, amaika maitu na makadsisigalaw su pamusungan ku sa leka
sabap kanu kinalipuas'engka sa laki.
10 Na iganat kanu pamusungan ku na ilalis ku edtalu i
“Hu Kadenan a Mapulu, dala man limbang'engka!
Seka i 'bpamelipuas kanu manga taw a malubay
sia kanu manga taw a mabagel kanilan.
Seka i 'bpamelipuas kanu manga taw a dala 'gkagaga nin enggu kanu manga taw a pakanasisita sia kanu manga taw a 'bpamakut kanilan.”
11 Aden manga taw a midsaksi sa laki sa dikena benal,
pedsenditan aku nilan kanu galebekan a mawag a dala sabut ku lun.
12 Nia nilan inibalas kanu kapianan a pinggula ku kanilan na mawag
tembu sangat a pedsegad i manggiginawa ku.
13 Inunta na kanu kinadsakit'ilan
na mimbalegkas aku sa saku kanu kinalidu na ginawa ku kanilan
taman sa tinemigkel aku sa da kakan.
Na pakabpatumeng aku sa kabpangeni-ngeni ku kanilan
14 a pedsegad i atay ku
a mana kapedsegad'a atay kanu pakat ku atawa ka suled ku demun,
pakabpatumeng aku sa kabpangeni-ngeni a mana nagagawan sa kinadala na ina ku.
15 Ugaid'a guna su saki i 'gkapasangan na mindidilimudan silan a nangagalaw,
mindidilimudan silan sungkang sa laki.
Su di ku katawan a taw na papegkasakit sa laki
taman sa di aku nilan pedtelenan.
16 Makin nilan 'bpagisegan su kapedsudi nilan sa laki,
pegkiget i bagang'ilan sa laki.
17 Hu Kadenan a Mapulu, ngin i kauget'a kadtulik'engka bu sa laki?
Ilipuas aku nengka den kanu kabpamungkaid'ilan,
ilipuas'engka su umul ku kanu mana manga alimaw a pegkiug pedsaluba sa laki.
18 Ka amaika maitu, na makadsukul-sukul aku sa leka sia kanu luk'u manga taw nengka a pendidilimudan,
mapugi ku seka sia kanu adapan nilan.
19 Di ka pedsuguti a magalaw su manga tagakalen a kuntela ku sa kataban nilan sa laki.
Di ka pedsuguti su 'gkangabensi sa laki sa dala sabap'in i kadtatawa nilan sa laki.
20 Da man 'bpeliu a kalilintad kanu ngali nilan,
ka nia bu 'bpameliu lun na kapamagakal
a sungkang kanu manga taw a 'bpaguyag-uyag sa malilintad.
21 'Bpelalis su ngali nilan sa kapedsendit'ilan sa laki
sa nia nilan 'bpamedtalun na “Nailay demun nu duambala a mata nami su pinggula nengka.”
22 Hu Kadenan a Mapulu, nailay nengka sa mapia su entu, tembu da ka 'bpelenek!
Di aku nengka pedtangkai!
23 Hu Kadenan ku a Mapulu,
edtindeg ka, ka ipaninindeg aku nengka kanilan.
24 Na sabap sa matidtu i kapangukum'engka
na ipailay nengka i dala pinggula ku a mawag,
di ka pedsuguti su manga kuntela ku sa kagalaw nilan sa kataban nilan sa laki.
25 Di ka pedsuguti a madtalu nilan sa ginawa nilan i
“Nakua nami su 'gkapaginagkay nu atay nami sa lekanin.”
Di ka pedsuguti a madtalu nu ginawa nilan i “Natabanan nami den sekanin.”
26 Isugut'engka a makagkaya su pedsisigalaw sabap kanu kamalasayan ku.
Su ibpemamasela nin i ginawa nin sa laki
na ibaus'engka kanilan su kayayan enggu su di kapagadat kanilan.
27 Ugaid'a su 'bpagungaya sa laki sa di aku masugat'a kawagib
na palalis ka silan sa kapia na ginawa enggu kagalaw.
Palalayun nengka ipadtalu kanilan i
“Su Kadenan a Mapulu na labi i kabarakat'in
a nia nin 'gkalilinian na mapia a kambebetad kanu panunugun nin.”
28 Na amaika maitu na ipayag'u ngali ku su kaikelas'engka
enggu kanu kagagabian na pugin ku bu seka.