Su Pugi kanu Kadenan sabap kanu Kapianan nin
Su Sengal'u Daud sa kanu kabpamagigiling'in sa 'gkababal sia kanu kaadapan ni Abimilik a punan a kinabugaw sa lekanin taman sa minawa mambu sekanin.
34
Pugin ku su Kadenan a Mapulu kanu langun nu kutika.Su ngali ku na di temelen kanu kapugi sa lekanin.
2 Imbabadtug ku su ngin i pinggula nu Kadenan a Mapulu,
na makineg su entu nu manga taw a pedtala sa mapasang taman sa magalaw silan.
3 Na sia kanu, ka amungi aku nu sa kapayag kanu kapegkagaga nu Kadenan a Mapulu,
pugin tanu su ingala nin.
4 Nangeni-ngeni aku kanu Kadenan a Mapulu, na sinawal aku nin mambu,
inilipuas aku nin kanu langun nu pakagilek sa laki.
5 Na sangul kanu man sa lekanin ka tabangan kanu nin man,
di kanu man a benal makagkayaya.
6 Na su taw a dala den inam'in a tinemawag mangeni sa tabang sa lekanin a Kadenan, na pinakikineg'in,
inilipuas'in kanu langun nu kamalasayan a 'gkatala nin.
7 Na su malaikat'u Kadenan a Mapulu na pedtamengan nin su manga taw a aden gilek'in kanu Kadenan
taman sa ibpelipuas'in silan.
8 Amad'u kanu ginawa nu u ngin ba i kapia nu Kadenan sa lekanu.
Mapia den a benal kanu taw a mapalindung kanu Kadenan.
9 Sekanu a pinamili nu Kadenan a mabaluy a manga taw nin,
na ikagilek'u su sekanin a Kadenan a Mapulu, ka su taw man a magilek sa lekanin na di man 'gkulang kanu manga nasisita nin.
10 Na apia su manganguda pamun a alimaw na pegkulang bun i pegken nin enggu pegkalubay bun,
ugaid'a su taw a mangilay kanu Kadenan, na di 'gkulang kanu apia ngin a mangapia a nasisita nin.
11 Supeg kanu manga dua na wata, ka pakikineg kanu sa laki,
ka ipamandu ku sa lekanu u panun i kagilek kanu Kadenan a Mapulu.
12 Apia entain sa lekanu i pegkiug sa mapia a kapaguyag-uyag
enggu malendu a kapagumul
13 na abungan nin i kadtalu sa mawag
enggu kapamagakal.
14 Tangkan nin su manga mawag a galebek ka nia nin enggulan na u ngin i mapia;
paginapasen nin mangilay su kalilintad.
15 Na pedtiakapan nu Kadenan a Mapulu su manga taw a matidtu
enggu 'bpakikinegen nin su kabpangeni nilan sa tabang sa lekanin,
16 ugaid'a pegkuntelan nin su manga taw a penggalebek sa mawag
enggu pebpunasen nin su ngala nilan sia sa dunia taman sa da den makagkalendem kanilan.
17 Na su manga taw a matidtu, na amaika mangeni silan sa tabang sa lekanin na 'bpakikinegen nin silan,
taman sa ilipuas'in silan kanu langun na makagkaid.
18 Masupeg sekanin kanu taw a 'gkalupet i pamusungan nin
enggu ibpelipuas'in su manga taw a naawan den na inam.
19 Su manga taw a matidtu na madakel i kamalasayan nin,
ugaid'a ibpelipuas silan nu Kadenan a Mapulu kanu langun nu entu a kamalasayan nilan.
20 Pedtiakapan nin silan kanu manga makagkaid;
na apia satiman kanu manga tulan nilan na dala malepu lun.
21 Su taw a dupang na kadupangan bun i makapatay lun,
na su mabensi kanu taw a matidtu na sugaten nu Kadenan sa kawagib.
22 Su Kadenan a Mapulu na ilipuas'in su manga panunugun nin;
dala isa a sugaten nin sa kawagib kanu manga taw a mapalindung sa lekanin.