Su Kapegkagaga enggu su Kapianan nu Kadenan
33
Sekanu a manga taw a matidtu na enggalaw-galaw kanu sia kanu Kadenan a Mapulu.Su pugi man nu matidtu a taw na makadait sa lekanin.
2 Pugin su Kadenan a Mapulu sia makanggulalan kanu palabuni-bunian a kutiapi,
pugin sekanin sa ukit'a kapauni sa palabuni-bunian a madakel i iket'in a bedtuan sa alpa.
3 Edsengalan sekanin sa bagu a sengal,
pauni nu sa mapia su palabuni-bunian a aden iket'in
enggu pamelalis kanu sa kapia na ginawa.
4 Kagina su kadtalu nu Kadenan a Mapulu na kasaligan,
su langun nu penggulan nin na matidtu.
5 Kalilinian nu Kadenan a Mapulu su ngin i wagib enggu matidtu,
'bpamelapay kanu dunia su sangat a kakalimu nin.
6 Sia nakanggulalan kanu kadtalu nu Kadenan a Mapulu na naaden su langit,
sia nakanggulalan kanu sangiup'u napas'in na naaden su langun na bitun, senang enggu ulan-ulan.
7 Linimud'in su ig'u lagata a mana sakabutul bu
ka inibetad'in lu kanu 'bpametadan.
8 Na su langun nu taw sa dunia na dait a magilek kanu Kadenan a Mapulu
enggu magadat sa lekanin sa aden gilek'in.
9 Ka sia nakanggulalan man kanu kadtalu nin na naaden su dunia,
na inisugu nin bu na mimbuat su langun.
10 Su kahanda nu manga bangsa na inawan nu Kadenan a Mapulu sa katagan,
di nin papembantasen su 'gkagkahanda na ginawa nilan.
11 Ugaid'a su kahanda nu Kadenan a Mapulu na taman sa taman,
su 'gkangguniat'in na 'bpananalusan taman den kanu manga temundug pan a muliataw.
12 Mapia den a benal kanu bangsa a nia nin Kadenan na su Kadenan a Mapulu,
mapia den a benal kanu taw a pinamili nu Kadenan a mabaluy a manga taw nin.
13 Su Kadenan a Mapulu a lu sa sulega na 'gkailay nin su langun nu taw sia sa dunia.
14 Iganat lu kanu kulesi a 'bpagayanan nin na pedsusulimanen nin
su langun nu sia sa dunia.
15 Sekanin i nangaden kanu pamusungan nu manusia,
na 'gkatawan nin su langun nu penggalebeken nilan.
16 Su datu na di manaban sabap bu kanu kadakel a sundalu nin,
maitu bun su pabubunua, di manaban sabap bu kanu kabagel'in.
17 Na su manga kuda a 'bpagusalen sa kambunua na di kasaligan a inam sa kapanaban,
di silan makagaga manaban sabap bu kanu kabagel'ilan.
18 Ugaid'a saben-sabenal a su Kadenan a Mapulu na pedtiakapan nin man su magilek sa lekanin,
su silan a entu a nia nilan pedsaligan na su sangat a kakalimu nin.
19 Ibpelipuas'in silan kanu kapatay
enggu 'bpaguyagen nin silan kanu timpu na kanggutem.
20 Su inam tanu man na sia kanu Kadenan a Mapulu,
sekanin i pedtabang sa lekitanu enggu pegkelung sa lekitanu.
21 Na su pamusungan tanu na 'gkagalaw sia sa lekanin,
kagina pedsalig tanu kanu suti a ngala nin.
22 Hu Kadenan a Mapulu, pangeni-ngenin nami i su sangat a kakalimu nengka na lalayun sia sa lekami.
Hu Kadenan a Mapulu, seka man i pedsaligan nami.