Su Kapia na Ginawa kanu Kapangampun nu Kadenan
Su nia a Sengal a mapia i kinaumbal lun na inisulat'u Daud.
32
Mapia den a benal kanu taw a inampun nu Kadenan su kinasungkang'in,mapia den a benal kanu taw a napunas den su kabaladusan nin.
2 Mapia den a benal kanu taw u di den isendit'u Kadenan a Mapulu sa lekanin su kabaladusan nin
enggu dala kanu atay nin su kasalimbut.
3 Kanu da ku pan makapangumpaya su kabaladusan ku
na nagagabian na dala bagel ku enggu 'bpagalupasay bu su badan ku.
4 Magabi sa malamag na 'gkapasangan aku a benal kanu maugat a siksa sa kapapedtidtu nengka sa laki,
naawan aku den na bagel a mana su nailatan a ig kanu timpu nu kabpanenang.
5 Ugaid'a saguna, na inipangumpaya ku den sa leka su manga kabaladusan ku.
Su manga kalimbanan ku na da ku den ipagena
sa nia kadtalu nu ginawa ku na “Ipangumpaya ku den su manga kabaladusan ku kanu Kadenan a Mapulu.”
Na inampun nengka mambu su langun nu kabaladusan ku.
6 Tembu nia dait na su pedsalig sa leka
na mamakut den mangeni-ngeni sa leka gagalu na aden pan kutika nilan,
ka enggu apia nia nin pan kaaden i aden makauma a lidu na ginawa
a mana mabagel a kadalem na di silan maled'u entu.
7 Seka i dalinding ku, ibpelipuas aku nengka kanu manga makagkaid, sinugutan aku nengka sa makadsengal sa matanug sabap sa kinalipuas'engka sa laki.
8 Na nia pidtalu sa laki nu Kadenan a Mapulu na “Itutulu ku sa leka su lalan a dait a lalakawan nengka,
pangindawn ku seka sia kanu kapedtiakap ku sa leka.
9 Di ka milingi su kuda atawa ka su pangangayamen a mulaa a di pakasabut
a nasisita pan a tundanen kanu kakang'in entu pan ka munut.”
10 Madakel a kamalasayan i matala nu taw a dupang
ugaid'a ipagedam'u Kadenan a Mapulu su sangat a kakalimu nin kanu apia entain a pedsalig lun.
11 Sekanu a manga matidtu a taw, na pakapia nu i ginawa nu enggu enggalaw-galaw kanu sia kanu Kadenan a Mapulu.
Sekanu a manga ikelas i pamusungan nin na pamelalis kanu sa kapia na ginawa.