Su Pangeni-ngeni enggu su Pugi sia kanu Kalipuas kanu manga Kuntela
Lu i nia pakatumpa kanu 'gkaunutan nu pasesengal. Su nia a Sengal na inisulat'u Daud.
31
Hu Kadenan a Mapulu, san aku pabpelindung sa leka,di ka pedsuguti a makagkaya aku,
ilipuas aku nengka sia luyud kanu katidtu nengka.
2 Pakikineg aku pan;
ilipuas aku nengka mamagayas.
Seka man su masela a watu a makakelung sa laki,
su mabagel a kuta a makalipuas sa laki.
3 Uway, mana ka man masela a watu a mabagel a kuta ku.
Tutulu aku nengka enggu agak aku nengka ka enggu mapugi su ingala nengka.
4 Itangka aku nengka kanu nakapagena a padulat'u manga kuntela ku a initana nilan sa laki,
ka seka man i 'bpangelung sa laki.
5 Ipedsalig ku su ginawa ku sa leka.
Hu Kadenan a Mapulu a kasaligan, pedsalig aku man sa kalipuas'engka sa laki.
6 'Gkabensian ku su 'bpamedsimba kanu dala katagan nin a manga pegkakadenanen,
kagina seka, Hu Kadenan a Mapulu, i pedsaligan ku.
7 Na sangat a 'gkagalaw aku kanu sangat a kakalimu nengka,
kagina 'gkailay nengka su kamalasayan ku
enggu 'gkatawan nengka su kapegkapasang sa laki.
8 Da nengka isugut i makapalad aku kanu manga kuntela ku,
ka nia pan mula na inilipuas aku nengka kanu makagkaid.
9 Hu Kadenan a Mapulu, lati aku nengka sa nanam, ka 'gkalasay aku den a benal.
Su mata ku na 'bpelebag den sa kabpaguguliang
enggu su badan ku na malubay den.
10 Su uyag-uyag ku na napenu den na lidu na ginawa,
a punan a kapegkababa na umul ku.
'Gkaawan aku den na bagel sabap kanu manga mapait a 'gkatala ku,a
apia su manga tulan ku na pegkalubay bun.
11 Pedtatawan aku nu manga kuntela ku,
papegkabulugan aku nu manga pagubay ku,
apia su manga pakat ku na pegkukuken na gilek sabap kanu 'gkatala ku.
'Bpelidasan aku nilan u 'gkailay aku nilan kanu lalan.
12 Nalipatanan aku nilan den a mana minatay den,
mana aku napesa a binangga a dala den katagan nin.
13 Madakel i 'gkakineg ku a 'bpamagedunga pantag sa laki
a punan a kapegkagilek ku sa apia endaw!
Namagayun silan 'gkahanda sa kaimatay nilan sa laki.
14 Apia ka maitu, Hu Kadenan a Mapulu, na pedsalig aku sa leka,
madtalu ku i “Seka man i Kadenan ku.”
15 Su uyag-uyag ku na san kanu lima nengka;
ilipuas aku nengka kanu manga kuntela ku a su 'bpamungkaid sa laki.
16 Itayaw nengka sa laki a panunugun nengka su sigay nengka.
Sia kanu sangat a kakalimu nengka na ilipuas aku nengka.
17 Hu Kadenan a Mapulu, di ka pedsuguti a makagkaya aku
ka san aku man 'bpangadap sa leka.
Ugaid'a isugut'engka a makagkaya su manga taw a dupang
enggu palenek ka silan kanu dalepa nu namamatay.
18 Isugut'engka sa di den makadtalu su dila nu manga taw a budtuden enggu mapulu i muletad'in
a 'bpemamasela sa kapedtalu-talu sa makaya kanu manga taw a matidtu.
19 'Bpamelapay su kapianan nengka a inadil'engka kanu manga taw a aden gilek'in sa leka,
penggulan nengka i entu kanu manga taw a seka i kelung'in.
Na 'gkailay nu uman i isa su nia a penggulan nengka!
20 Ibpagena nengka silan sia kanu adapan nengka sa
kanu 'bpamungkaid kanilan;
ibpagena nengka silan sia sa leka sa di silan kagkaidan
nu manga kuntela nilan a papegkabulug kanilan.
21 Pugin su Kadenan a Mapulu,
kagina makagaip a benal su inipailay nin sa laki a sangat a kakalimu nin
sa kanu timpu a lu aku kanu pegkalebenan ku a siudad a nabalibet'u kuntela ku.
22 Na nia ku nadtalu kanu kapegkagilek ku na
“Initangka aku den kanu Kadenan a Mapulu.”
Ugaid'a 'gkakineg'engka bun besen su pangeni-ngeni ku,
taman sa tinabangan aku nengka.
23 Na sekanu a nalusud kanu Kadenan a Mapulu na ikalimu nu sekanin.
Na pendalindingan nin man su taw a pedsalig sa lekanin sa senep sa atay,
ugaid'a mapasang i kasiksa nin kanu manga taw a 'bpemamasela.
24 Na su langun nu a nia nin bu pedsaligan na su Kadenan a Mapulu
na pakabagel'u i manggiginawa nu enggu pakawalaw nu i akida nu.