Su Kadsukul-sukul kanu Kadenan a Mapulu
Su Sengal a inisulat'u Daud a pedsengalen kanu kapedsuti kanu Suti a 'Bpagagaman.
30
Hu Kadenan a Mapulu, pebpugin ku seka kanu kinalipuas'engka sa laki sa kapatay.Da nengka suguti su manga kuntela ku sa makanggalaw-galaw silan sabap sa kapatay ku.
2 Hu Kadenan ku a Mapulu, naguguliang aku mangeni sa leka sa tabang sa kanu da ku kapangengelag,
na pinagkapia aku nengka mambu.
3 Inilipuas aku nengka kanu kapatay,
nanget a pebpatay aku den ugaid'a pinambibiag aku nengka.
4 Hu su sekanu a nalusud kanu Kadenan a Mapulu, edsengal kanu sa kapugi sa lekanin,
edsengal kanu sa kadsukul-sukul kanu suti a ingala nin.
5 Kagina su lipunget'in na di man 'gkauget,
ugaid'a su kapianan nin na taman sa taman sia sa lekitanu.
Apia migis su lu tanu kanu kalalamagan
na nia nin kagkapita na kasambian na kagalaw.
6 Nia 'gkadtalu nu ginawa ku kanu timpu a mapia i 'gkambebetad ku na “Dala man makatalaw sa laki.”
7 Hu Kadenan a Mapulu, sabap kanu kapianan nengka,
na pinagkabagel aku nengka a mana su kabagel'u palaw,
ugaid'a guna aku nengka taligkudani,
na sangat a nagilekan aku.
8 Hu Kadenan a Mapulu, naguguliang aku mangeni-ngeni sa leka
sa nia ku inipangeni-ngeni na
9 “Dala bun man makua nengka lun amaika matay aku.
Aden ba makangguna nin sa leka amaika lu aku den kanu dalem'u pakubulan?
Makapugi pan ba sa leka su minatay den?
Di nilan den makapayag su katidtu nengka.
10 Hu Kadenan a Mapulu, pakikineg aku nengka enggu lati aku nengka pan sa nanam!
Hu Kadenan a Mapulu, tabangi aku nengka pan!”
11 Saguna na sinambian nengka sa kapia na ginawa su kapegkalidu na ginawa ku.
Linuas'engka sa laki su balegkas sa kapegkalidu na ginawa
ka inisangan nengka sa laki su balegkas a kapegkapia na ginawa,
12 ka enggu di ku matikup su ngali ku ka makin ku pan makalalis sa kadsengal sa kapugi sa leka.
Hu Kadenan ku a Kadenan a Mapulu, edsukul-sukulan ku seka taman sa taman.