Su Suala nu Kadenan sia kanu Timpu nu Kamasengetan
Su nia a Sengal na inisulat'u Daud.
29
Pugi nu su Kadenan a Mapulu, hu sekanu a pinangaden san sa sulega.aPugi nu su Kadenan a Mapulu sia kanu kabarakat'in enggu kapegkagaga nin.
2 Pugi nu su Kadenan a Mapulu kanu manga pugi a nakadait kanu ingala nin a pedsigay.
Simba nu su Kadenan a Mapulu sia kanu adapan nin a pedsigay na kasuti nin.
3 Na su suala nu Kadenan a Mapulu a barakat na 'bpelalaus kanu liwawaw nu lagat,
mana lugung kanu liwawaw nu masela a bagel'u lagat.
4 Su suala nu Kadenan a Mapulu na sangat i kabarakat'in
enggu sangat a 'bpagadatan.
5 Su suala nu Kadenan a Mapulu na 'gkalupet-lupet'in i apia su mategas a kayu a sidar,
'gkalupet-lupet'in su manga kayu a sidar'u dalepa a Libanun.
6 'Gkakuyung'in su palaw nu Libanun a mana pipis a sapi a pebpapaudtu,
'gkakuyung'in su palaw nu Siriun a mana talaw a manguda a sapi a pebpapaudtu.
7 Su suala nu Kadenan a Mapulu na mana kilat a pedtalas.
8 Su suala nu Kadenan a Mapulu na 'gkangakuyung'in su tawan-tawan a dalepa,
'gkangakuyung'in su tawan-tawan a dalepa nu Kadis.
9 'Gkangakuyung'in su manga masela a kayu a insina,b
'gkangalubpug'in su manga laun sa damakayu.
Na su langun nu lu kanu Suti a 'Bpagagaman na 'bpamelalis sa “Pugin su Kadenan!”
10 Na su Kadenan man a Mapulu i pegkakataw apia kanu masela a kadalem.
Sekanin i datu a pendatu taman sa taman.
11 Su Kadenan a Mapulu i 'bpagenggay sa bagel kanu manga taw nin.
Sekanin i 'bpamalihala sa kalilintad kanu manga taw nin.