Su Kapangeni-ngeni sa Tabang enggu su Kadsukul-sukul
Sengal'u Daud.
28
Hu Kadenan a Mapulu, pedtawag aku sa leka.Mana ka masela a watu a pegkelung sa laki, pakikineg ka su pangeni-ngeni ku,
ka amaika dili aku nengka pakikinegen
na makailing aku kanu manga taw a minatay a lu kanu pakubulan.
2 Pakikineg ka su suala ku a 'bpaguguliang 'bpangeni sa tabang sa leka
a nakapulu su duambala a lima ku
sia kanu kaadapan nu suti a walay nengka.
3 Di aku nengka ibpagamung pedsiksa kaped'u manga dupang a taw,
a su manga taw a 'bpamenggalebek sa dikena mapia,
a matatig kun sa 'bpamedtalu sa kalilintad kanu manga pagubay nilan,
inunta na nia nin kabantang na lipunget i sia kanu atay nilan.
4 Papamayad ka silan sia luyud kanu ngin i pinggula nilan,
papamayad ka silan sia luyud kanu ngin i kadupangan a pinggula nilan.
Siksa ka silan sia luyud kanu ngin i pinggalebek'u manga lima nilan,
inggay nengka kanilan su ngin i wagib kanilan.
5 Ka da nilan man ipamamantag su manga pinggalebek'engka
enggu su pinangaden nu lima nengka,
tembu binasa ka silan enggu di ka silan mapatindeg 'bpaluman.
6 Pugin su Kadenan a Mapulu,
ka pinakikineg'in su kinapangeni ku lun sa tabang.
7 Su Kadenan a Mapulu i bagel ku enggu kelung ku;
pedsalig aku sa lekanin, tembu pedtabangan aku nin.
Pakadsisigalaw su pamusungan ku
taman sa pakadsengal-sengal sa kapedsukul-sukul sa lekanin.
8 Hu Kadenan a Mapulu, seka man i pamagel'u manga taw nengka,
seka i 'bpangelung enggu 'bpamelipuas kanu pinamili nengka a endatu.
9 Hu Kadenan a Mapulu, ilipuas'engka su manga taw nengka enggu palihalai ka silan.
Tiakapi ka silan a mana su kapedtiakap'u patutuganul sa bili-bili, tiakapi ka silan taman sa taman.