Su Sengal sa Kapangeni-ngeni enggu Kapugi kanu Kadenan a Mapulu
Sengal'u Daud.
27
Su Kadenan a Mapulu i palitan ku enggu kalipuasan ku,entain ba i dait a ikagilek ku?
Sekanin i kuta ku
tembu dala dait a ikagilek ku!
2 Na amaika lusudan aku nu manga dupang a taw
atawa ka su manga kuntela ku
ka bunun aku nilan
na silan i mamakagebpa enggu mangaudtang.
3 Apia man nabalibet aku pan nu manga sundalu a kuntela ku
na di aku kagilekan.
Apia man lusudan aku nilan pan
na su Kadenan i pedsaligan ku.
4 Nia ku bu 'gkapangeni kanu Kadenan a Mapulu,
a 'gkapaginagkay nu ginawa ku,
na su kasimba ku sa lekanin lu kanu walay a 'bpangadapan lun kanu uman-uman gay taman sa bibiag aku pan,
ka enggu ku mailay su kabarakat'in
enggu mapangeni ku lun su katutulu nin sa laki sa dait a enggulan ku.
5 Na sa timpu na kamasengetan
na sekanin i dalinding ku.
Ibpagena aku nin kanu walay a 'bpangadapan sa lekanin,
ipembetad aku nin kanu malambeg a lakungan a watu,
6 tembu 'bpanaban aku
kanu manga kuntela ku a nakabalibet sa laki.
'Gkurban aku kanu walay nin a 'bpangadapan lun
a pakalalis aku sa kapegkapia na ginawa ku
enggu pakadsengal aku sa kapugi sa lekanin a Kadenan a Mapulu.
7 Hu Kadenan a Mapulu, pakikineg ka su suala ku amaika pedtawag aku sa leka 'bpangeni sa tabang,
lati aku sa nanam enggu sawal aku nengka!
8 Hu Kadenan a Mapulu, 'gkadtalu nu atay ku i 'bpagenggaten kami nengka sa “Sia kanu, ka simba aku nu,”
tembu sinemia aku ka enggu ku seka masimba.
9 Di ka ibpagena su beneng'engka sa laki.
Di ka pedtaligkudani su panunugun nengka sabap kanu lipunget'engka,
ka seka man i lalayun pedtabang sa laki.
Hu Kadenan ku a 'bpamelipuas sa laki, di aku nengka ipegkias enggu di aku nengka mapadtaday.
10 Apia man tagaken aku nu ama ku enggu ina ku,
na su Kadenan man a Mapulu i temiakap sa laki.
11 Hu Kadenan a Mapulu, tutulu aku nengka kanu lalan nengka,
agak aku nengka kanu lalan a di aku kagkaidan
kagina 'bpagayanan aku nu manga kuntela ku.
12 Di ka semuguti a makapalad aku kanu manga kuntela ku,
ka madakel man i ipedsendit'ilan sa laki a dikena benal
enggu pegkiugan aku nilan a benal papegkasakit.
13 Hu Kadenan a Mapulu, 'bpaginugut aku man sa mailay ku su kapianan nengka
taman sa bibiag aku pan sia sa liwawaw nu dunia.
14 Hu Kadenan a Mapulu, na seka man i inam'ami a makadtabang sa lekami.
Pakabagel'u i ginawa nu enggu pakawalaw nu i akida nu,
ka su Kadenan man a Mapulu i inam tanu a makadtabang sa lekitanu!