Su Pangeni-ngeni nu taw a Matidtu enggu su Kapebpayag kanu Kaikelasan
Sengal'u Daud.
26
Hu Kadenan a Mapulu, ipailay nengka i dikena aku 'gkawagibanka 'bpaguyag-uyag aku sa matidtu,
su kapedsalig ku sa leka na dala kandua-dua nin.
2 Hu Kadenan a Mapulu, ilay ka sa mapia su ginawa ku ka enggu aku nengka maamad,
edsima-sima ka su atay ku enggu su itungan ku.
3 Ka su sangat a kakalimu nengka na di man 'gkaawa kanu ginawa ku,
'bpaguyag-uyag aku sia luyud kanu katidtu nengka.
4 Dikena aku pedsimbul kanu manga taw a tagakalen,
atawa ka pedtagapeda kanu manga taw a dikena senep sa atay i kabpagagama nin.
5 Di ku 'gkalilinian pedtagapeda su manga taw a penggula sa mawag;
'bpelidasan ku a makasimbul kanu manga taw a daluaka.
6 Hu Kadenan a Mapulu, 'bpamuanawan ku su lima ku asal'a mailay i dala kadupangan ku,
entu pan ka 'bpelibet aku kanu pegkurbanan sa leka.
7 Pedsengal aku sa sengal sa kapanginsukulen sa leka
enggu panudtulen ku kanu manga taw su langun na makagaip-gaip a pinggula nengka.
8 Hu Kadenan a Mapulu, 'gkalilinian ku man su walay a pegkalebenan nengka,
kanu dalepa a lu ba 'gkailay su sigay nengka.
9 Di ka pegkua su umul ku a kaped'u manga baladusa,
atawa ka di ka pedtebped su napas ku a mana su manga talibunu
10 a nia kategelan nu lima nilan na kanggula sa dikena mapia
enggu kapabayad.
11 Kagina saki na 'bpaguyag-uyag aku sa matidtu,
tembu tebus aku pan enggu lati aku sa nanam.
12 Su ay ku na sia den nakadtindeg kanu lupa a dala pakagkaid lun.a
Hu Kadenan a Mapulu, pugin ku seka sia kanu luk'u madakel a taw a pedsimba sa leka.