Su Pangeni-ngeni sa Katiakap'u Kadenan kanu Taw enggu Kalipuas'in lun
Sengal'u Daud.
25
Hu Kadenan a Mapulu, ipedtapenay ku i ginawa ku sa leka,2 Hu Kadenan ku, seka bu i pedsaligan ku,
di ka pedsuguti i makagkaya aku,
di ka pedsuguti i makadsisigalaw su manga kuntela ku sa kataban nilan sa laki.
3 Di ka pedsuguti a makagkaya su apia entain a 'bpagingapa kanu tabang'engka,
ugaid'a nia ka suguti a makagkayaya na su apia entain a matipu kanu ped'in.
4 Ipailay nengka sa laki su ukit'engka,
itutulu nengka sa laki su manga lalan nengka.
5 Pamandu aku sa kapaguyag-uyag a luyud kanu bantang
ka seka man su Kadenan a 'bpamelipuas sa laki,
seka man i inam ku kanu uman-uman gay.
6 Hu Kadenan a Mapulu, di ka 'bpelipatani su lat a nanam'engka enggu su sangat a kakalimu nengka
a nakapailay nengka den kanu paganay.
7 Lipatani ka den su manga kabaladusan ku enggu su manga kinasungkang ku kanu timpu a manguda aku pan.
'Gkalendem aku sia makanggulalan kanu sangat a kakalimu nengka
sabap kanu kapianan nengka!
8 Hu Kadenan a Mapulu, mapia ka man enggu matidtu ka
tembu pedtutulun nengka kanu manga ukit'engka su manga taw a baladusa.
9 Pedtutulun nengka su manga mababa i muletad'in sa kanggalebek'ilan sa u ngin i matidtu,
'bpamandun nengka silan kanu ukit'engka.
10 Su sangat a kakalimu nengka enggu su katidtu nengka
na lalayun nengka ipapenggedam kanu manga taw a penggulalan kanu manga atulan nengka enggu su kapasadan nengka.
11 Hu Kadenan a Mapulu,
ampun ka su madakel a kabaladusan ku asal a mapugi ku su ingala nengka.
12 Su aden gilek'in sa leka
na pedtutulun nengka silan kanu lalan a dait a pamilin nilan,
13 'gkapia su kapaguyag-uyag'ilan
enggu su manga wata nilan na kabpusakan kanu kalupan.
14 Hu Kadenan a Mapulu, pakat'engka su apia entain a aden gilek'in sa leka,
papedtuntayan nengka kanilan su kapasadan nengka.
15 Hu Kadenan a Mapulu, seka i lalayun a pedsaligan ku
ka seka man i tatap a 'bpelipuas sa laki kanu manga pakagkaid.
16 Pakikineg aku nengka pan enggu lati aku sa nanam,
ka dala den kaped ku enggu sangat den a 'gkalasay aku.
17 'Bpangiseg bun su kapegkaugat'u dalem'u pamusungan ku,a
ilipuas aku nengka pan kanu kapedtala ku sa masenget.
18 Ilay ka su kapegkalasay ku enggu su kapedtala ku sa masenget,
ampun aku nengka kanu langun nu kabaladusan ku.
19 Ilay ka su kadakel'u manga kuntela ku
a sangat a 'gkabensi sa laki.
20 Hu Kadenan a Mapulu, tiakapi aku nengka, ilipuas aku nengka kanilan,
di ka pedsuguti sa makagkaya aku ka san aku man papendalinding sa leka.
21 Pangeni-ngenin ku i dalindingi aku nengka kagina nia ku penggulan na u ngin i matidtu enggu wagib
enggu seka bu i inam a pedsaligan ku.
22 Hu Kadenan a Mapulu, ilipuas'engka su manga taw nengka a Israil
kanu langun nu kasimuketan.