Su Bengawan nu Suti a 'Bpagagaman
Sengal'u Daud.
24
Su Kadenan a Mapulu i kigkuan kanu dunia enggu kanu langun nu nakadalem lun,sekanin i kigkuan kanu langun nu taw sia sa dunia,
2 ka pinatindeg'in man su udsadan nu dunia kanu didalem'u lagat
enggu kanu didalem'u manga ig.
3 Na entain ba man i makatakedeg kanu palaw nu Kadenan a Mapulu?
Entain ba man i makadtindeg kanu Suti a 'Bpagagaman nin?
4 Na nia bu makadtindeg lu na su taw a dala budseng'u lima nin enggu matilak i pamusungan nin,
su dikena pedsimba sa pegkakadenanen,
su dikena pedsapa sa kabudtud.
5 Silan ba a entu su makatalima sa balas a ebpun kanu Kadenan a Mapulu.
Na sia kanu kagkukum'u Kadenan kanilan na su sekanin a entu a linemipuas kanilan
na edtalun nin i dala den kabaladusan nilan.
6 Na maitu ba a manga taw su pedsupeg sa lekanin,
su manga taw a pedsimba kanu Kadenan a su Kadenan nu Yakub.
7 Bukati nu su bengawan nu Suti a 'Bpagagaman!
Bukati nu su andang a pintuan nu Suti a 'Bpagagaman!
Ka enggu makaludep su Datu a barakat.
8 Entain ba man su Datu a barakat?
Sekanin su Kadenan a Mapulu a Barakat sa Langun,
su Kadenan a Mapulu a sangat i kategel'in sa kambunua.
9 Bukati nu su bengawan nu suti a 'bpagagaman!
Bukati nu su andang a pintuan nu suti a 'bpagagaman!
Ka enggu makaludep su Datu a barakat.
10 Entain ba man su Datu a barakat?
Sekanin su Kadenan a Mapulu a Barakat sa Langun!