Su Pangeni-ngeni sa Kalipuas kanu Kamalasayan enggu Kabpamagukag
Lu i nia pakatumpa kanu 'gkaunutan nu pasesengal a nia usalen a legku na bedtuan sa “Saladeng kanu 'Gkatibuas.” Su nia a Sengal na inisulat'u Daud.
22
Hu Kadenan ku, Hu Kadenan ku, ngintu ka pinadtaday aku nengka?Ngintu ka pedtangkan aku nengka?
Ngintu ka di nengka den 'bpakikinegen su kabpangeni ku sa leka sa tabang?
2 Hu Kadenan ku, magabi sa malamag na pedtawag aku bu sa leka
ugaid'a di aku nengka pedsawalen tembu di aku den pakapangintelenen.
3 Apia ka maitu na suti ka man,
'bpagagayan ka kanu kulesi nengka enggu pebpugin nu manga taw a Israil.
4 Na su manga kaapuan nami na sinemalig sa leka,
na kagina ka sinemalig silan sa leka na inilipuas'engka mambu silan.
5 Tinemawag silan mangeni sa leka sa tabang, na inilipuas'engka mambu silan.
Sinemalig silan sa leka, na da mambu silan mabaluga.
6 Ugaid'a saki na papegkabulugan nu manga taw enggu papegkayan nilan.
Nia nilan kapegkailay sa laki na dikena manusia ka mana uled.
7 Su langun nu pakailay sa laki na pedsudi;
pedsubekaten aku nilan enggu 'bpangiling-kiling silan sa nia nilan pedtalun na
8 “Kena ba pedsalig sekanin kanu Kadenan a Mapulu? Na nginan ka di nin ibpelipuas?
Kena ba 'gkasuatan sekanin nu Kadenan a Mapulu? Na nginan ka di nin pedtabangan?”
9 Inunta na seka man i napaliu sa laki kanu wawatan nu ina ku,
iganat sa kapedsusu ku pan na pedtiakapan aku nengka den.
10 Iganat sa kinambata sa laki na nakasandig aku den sa leka,
iganat sa kinagemaw ku na seka den i Kadenan ku.
11 Tembu di aku nengka pedtangkai
ka masupeg den sa laki su makagkaid,
na dala den ped a makadtabang pan sa laki.
12 Su manga kuntela ku na nakabalibet den sa laki a mana kadakel a tudu a sapi,
mana silan mangabagel a tudu a sapi sa dalepa a Basan.
13 Mana silan alimaw a 'bpaginggel a nakanggangali sa masela ka adil den sa kadtalakisi nilan semakab sa laki.
14 Naawan aku den na bagel a mana su ig a nakabubus,
mana nangalepu su langun nu manga tulan ku;
su pamusungan ku na mana lansuk a 'gkatunag.
15 Su ngalia ku na mana binangga a namalan,
su dila ku na dinemeket den kanu pelak ku,
mana aku nengka pinadtaday a minatay a nakaiga kanu lupa.
16 Ka nakabalibet sa laki su manga kuntela ku a mana manga talaw a asu;
nakabalibet sa laki su manga dupang a taw.
Adil silan sa kadtalakisi nilan kanu manga lima ku enggu kanu manga ay ku.b
17 'Gkangailag den su manga tulan ku,c
pedtulikan aku nu manga kuntela ku a pedtatawan aku nilan.
18 Pimbad-bad'ilan su manga balegkas ku
sa ukit'a kinambunuta nilan lun.
19 Hu Kadenan a Mapulu, di aku nengka pedtangkai!
Seka man i 'gkabpunan nu bagel ku, pamagayasi aku nengka den 'gkadtag ka edtabangi aku nengka!
20 Ilipuas aku nengka kanu sundang'u kuntela ku,
ilipuas'engka su umul ku kanu bagel'u manga taw a mana asu!
21 Ilipuas aku nengka kanu ngali nu alimaw!
Na ilipuas aku nengka kanu sidung'u mangawalaw a tudu a sapi,
na pinakikineg'engka mambu su manga pangeni-ngeni ku.
22 Ipayag ku kanu manga pagidsan ku a Israil su ingala nengka,
pugin ku seka sia kanu luk'u manga taw nengka a pendidilimudan a pedsimba sa leka.
23 Sekanu a manga taw a aden gilek'in kanu Kadenan a Mapulu, pugi nu sekanin!
Su langun nu sekanu a muliataw nu Yakub, na badtug'u su sekanin a Kadenan a Mapulu!
Sekanu a manga taw a Israil na ikagilek'u sekanin a Kadenan a Mapulu enggu pagadati nu!
24 Ka di nin man padtadayn atawa ka pakabulugan su manga taw a 'gkangapasangan;
di nin man silan taligkudanan,
ka nia pan mula na pakikinegen nin su kapedtawag'ilan lun a 'bpangeni sa tabang.
25 Hu Kadenan a Mapulu, sia kanu masela a umpungan nu 'bpamaginugut sa leka na pebpugin ku seka kanu manga pinggula nengka.
Sia kanu kaadapan nu manga taw a aden gilek'in sa leka na tumanen ku su manga inibpasad ku sa leka.
26 Makakan su manga miskinan sa endaw taman i kiug'ilan;
pugin ka nu manga taw a mangilay sa leka.
Pangeni-ngenin ku i 'gkalendu i umul'ilan enggu mapia i kapaguyag-uyag'ilan!
27 Hu Kadenan a Mapulu, magkalendem ka nu manga taw sia sa lusud'u dunia
enggu semangul den silan sa leka;
uman i sakambinabatan nu langun nu bangsa
na semimba sa leka!
28 Hu Kadenan a Mapulu, seka man i pendatu
enggu pegkamal kanu manga bangsa.
29 Na su langun na kawasa sia sa dunia na edsela-sela taman sa semugiud sa leka;
semugiud sa leka su langun nu manusia a muli bun sa awal'in, a su silan a entu a aden papatayan nin.
30 Su manga temundug a manga muliataw na enggalebek sa leka.
Hu Kadenan a Mapulu, ipamandu nilan kanu manga muliataw nilan su pantag sa leka.
31 Na su manga taw a dala pan embata a maguyag-uyag kanu mangauma pan a timpu na ipayag'ilan u panun i kinalipuas'engka kanu manga taw nengka.
Edtalun nilan i “Su Kadenan a Mapulu i minggula sa entu!”