Su Kadsukul-sukul kanu Kinapanaban
Lu i nia pakatumpa kanu 'gkaunutan nu pasesengal. Su nia a Sengal na inisulat'u Daud.
21
Hu Kadenan a Mapulu, 'gkapia i ginawa nu datu a pinamili nengkasabap kanu inenggay nengka lun a bagel.
Sangat a 'gkapia i ginawa nin
ka pinambantas'engka sekanin.
2 Inenggay nengka sa lekanin su 'gkagkahanda nu ginawa nin,
da nengka idsingit lun su 'bpangenin nin sa leka.
3 Pinambantas'engka sekanin enggu pinalihalan nengka a sawal kanu pangeni-ngeni nin.
Iniselub'engka kanu ulu nin su sansangan a bulawan.
4 Pinangeni nin sa leka i pagkalendun nengka su umul'in na inenggay nengka mambu su entu sa lekanin
ka inenggan nengka sekanin sa malendu a umul.a
5 Sabap kanu kinapapanaban nengka lun na sangat a nabadtug sekanin,
seka man i minenggay lun sa kabadtugan.
6 Su palihala nengka na lu sa lekanin taman sa taman,
pinagkagalaw nengka sekanin sabap sa pedtapiden nengka sekanin.
7 Hu Kadenan a Mapulu sa Langun, na sia makanggulalan kanu sangat a kakalimu nengka,
na di magkeleng-keleng su datu ka pedsalig man sekanin sa leka.
8 Inipasigkem'engka kanu lima nin su langun nu kuntela nin
enggu su 'gkabensi lun.
9 Idtug'engka silan kanu 'bpangalaw-kalaw a pugun
amaika 'bpapayag ka den.
Hu Kadenan a Mapulu, sabap kanu lipunget'engka
na ibpeden nengka silan gemepul kanu 'bpangalaw-kalaw a apuy.
10 Ibpeden nengka minasa su langun nu muliataw nilan sia sa dunia,
na mapenas den ba a entu su tupu nilan kanu manusia.
11 'Gkahandan ka nilan sa mawag
ugaid'a su entu a kahanda nilan na di embantas.
12 Ka mamakapalalaguy man silan
amaika isangul'engka den kanilan su busug'engka.
13 Hu Kadenan a Mapulu, pebpugin nami seka sabap kanu kabagel'engka!
Pedsengal kami sa pugi sabap kanu kabarakat'engka!