Su Pangeni-ngeni sa Kapanaban
Lu i nia pakatumpa kanu 'gkaunutan nu pasesengal. Su nia a Sengal na inisulat'u Daud.
20
Na su Kadenan a Mapulu na sawalen nin su kabpangeni nengka lun sa tabang sia kanu kapedtala nengka sa masenget.Na su Kadenan a pedsimban nu Yakub i kelung'engka.
2 Pangeni-ngenin ku i mapapait sekanin sa tabang a lu ganat kanu walay a 'bpangadapan sa lekanin sa Zion.
3 Pangeni-ngenin ku i magkalendem'u Kadenan su langun nu kurban nengka
enggu kasuatan nin su manga pedtutungen a kurban nengka.
4 Inggay nin sa leka su kahanda nu pamusungan nengka,
pambantasen nin su langun nu 'gkagkahanda nu ginawa nengka.
5 Na pangeni-ngenin ku i makalalis kami sa kapia na ginawa sia kanu kambantas'engka,
na sia kanu ingala nu Kadenan tanu a Mapulu na ikayang tanu su pandi.
Pangeni-ngenin ku i inggay nin su langun nu 'bpangenin nengka lun.
6 Saguna na natatalanged ku den i tabangan nu Kadenan a Mapulu su pinamili nin a datu.
Na lu ganat kanu suti a pegkalebenan nu Kadenan a Mapulu lu sa sulega na sinawal'u Kadenan su pangeni-ngeni nin,
sia kanu kapegkagaga nin na ilipuas'in su datu a pinamili nin.
7 Su ped na nia nilan pedsaligan na su manga kalisa nilan, su ped menem na su manga kuda nilan,
ugaid'a sekami na nia nami pedsaligan na su Kadenan a Mapulu.
8 Kaawan silan na bagel taman sa makadadsang,
ugaid'a sekami menem na makadtindeg sa mabagel.
9 Hu Kadenan a Mapulu, papanaban ka su pinamili nengka a datu.
Sawal ka su kabpangeni nami sa tabang sa leka.