Su Kabarakat'u Kadenan kanu Kinapangaden nin enggu su Kasuguan nin
Lu i nia pakatumpa kanu 'gkaunutan nu pasesengal. Su nia a Sengal na inisulat'u Daud.
19
Ipebpayag'u langit su kabarakat'u Kadenan.Ipebpagilay nu langit su kapia nu pinangaden nin.
2 Magabi sa malamag na ipebpayag'u langit su kabarakat'in enggu su ilemu nin.
3 Dala kadtalu a makineg lun,
dala bun suala a makineg lun
4 inunta na su kadtalu nin na nakapayapat kanu pat a pisuk'u dunia,
su katigan nin na nakauma kanu tedtab'u dunia.
Lu kanu langit na inibetad'u Kadenan su senang
5 a pedsebang kanu uman mapita, mana bun sekanin pegkawingen a mama a linemiu kanu limbunan,
mana bun sekanin mategel a pakukuya a 'gkagalaw a benal kanu kapegkuya nin.
6 Su senang na pedsebang kanu sebangan
enggu pedsedep kanu sedepan,
da pakapagena kanu kayaw nin.
7 Su panduan nu Kadenan a Mapulu na talutup,
pakaenggay sa bagu a bagel.
Su atulan nu Kadenan a Mapulu na kasaligan,
pakaenggay sa ilemu kanu taw a dala sabut'in.
8 Su kasuguan nu Kadenan a Mapulu na wagib,
pakagkagalaw kanu pamusungan nu taw.
Su kasuguan nu Kadenan a Mapulu na maliwanag,
pakagkaliwanag kanu itungan nu taw.
9 Su kagilek kanu Kadenan a Mapulu na ikelas,
mananalusan su entu taman sa taman.
Na su kukuman nu Kadenan a Mapulu na matidtu enggu wagib.
10 Labi pan i kapaginagkay lun kumin kanu bulawan, apia nia pan bulawan i dala simbul'in.
Labi pan i kamis'in kumin kanu teneb, apia nia pan teneb i entu pan ka 'bpagigis kanu inged'u batiukan.
11 Na liu pan sa entu, na su langun nu entu na pakatutulu kanu panunugun,
na masela a balas i 'gkakua sa kapaginugut lun.
12 Ka dala man taw a 'gkadsima nin i limban nin,
tembu ampun ka su manga kabaladusan ku a dikena pidtibaba.
13 Itangka nengka su panunugun nengka sa makanggula sa pedtibaban a kabaladusan.
Di ka pedsuguti a maulipen aku nu entu
ka enggu aku makapaguyag-uyag sa dala tila nin
enggu di ku manggula su masela a kabaladusan sa leka.
14 Isugut'engka a makasuat sa leka su kangadtalu a lemiu kanu ngali ku
enggu su 'gkangguniat'u atay ku.
Hu Kadenan a Mapulu, seka man su mana watu a pegkelung sa laki enggu pedtebus sa laki.