Su Sengal kanu Kadsukul-sukul kanu Kinapanaban
Lu i nia pakatumpa kanu 'gkaunutan nu pasesengal. Su nia a Sengal na inisulat'u Daud a panunugun nu Kadenan a Mapulu. Inisulat'in kanu Kadenan a Mapulu kanu timpu a kinalipuas'in sa lekanin kanu kapegkagaga nu manga kuntela nin enggu kanu kapegkagaga nu Saul, sa nia dalem'u sengal'in na
18
“Hu Kadenan a Mapulu, pinadtaya ku seka, seka i bagel ku.2 Hu Kadenan ku a Kadenan a Mapulu, mana ka watu a pegkelung sa laki,
seka i dalinding ku, seka i kuta ku a 'bpagenan ku, seka i 'bpelipuas sa laki kanu manga kuntela ku.
3 Hu Kadenan a Mapulu a dait a pebpugin, nangeni aku sa leka sa tabang
na inilipuas aku nengka mambu kanu manga kuntela ku.
4 Su kapatay na mana iket a nakapawik sa laki,
su kabinasan na mana mabagel a leges a pakaanud sa laki.
5 Su pakubulan na mana iket a nakapuket sa laki,
su kapatay na mana litag kanu 'bpagukitan ku.
6 Hu Kadenan a Mapulu ku, na sia kanu kamalasayan ku na tinemawag aku sa leka mangeni sa tabang.
Na ganat kanu Suti a 'Bpagagaman sa leka na nakineg'engka su suala ku;
pinakikineg'engka su pangeni-ngeni ku.
7 Sabap kanu lipunget'engka na kinemegkel su dunia enggu lineminug,
su manga udsadan nu manga palaw na nakuyung.
8 Na 'bpeliu kanu ngilung'engka su bel,
su ngali nengka na 'bpeliuwan nu 'bpangalaw-kalaw a apuy enggu pegkaleg a waga na apuy.
9 Inukan nengka su langit ka nangalimbaba ka,
su makapal a dadtem i pendampuan nengka.
10 Migkuda ka kanu malaikat a kirub,a
mindadalayug ka sa malengkas a 'gkadtatanggit'u sambel.
11 Inibaus'engka su kalibutengan kanu ginawa nengka,
nakabalibet sa leka su makapal a dadtem.
12 Na lu kanu nambetadan nengka na pedtalas su kilat,
na iganat lu ba na pakadadsang su manga ilu enggu su manga pegkaleg a waga na apuy.
13 Hu Kadenan a Mapulu sa Langun, su suala nengka na mana lugung a pedsagkung kanu langit.
14 Binusug'engka su manga kuntela a punan a kinatagayak'ilan,
tinemalas su kilat a punan a dala nilan kadtutuganula.
15 Nailag su pused'u lagat ka nailatan
taman sa su udsadan nu dunia na napayangas
sabap kanu kinasapal'engka
enggu su sengaw bu nu napas'engka.
16 Iganat sa sulega na kinawa aku nengka,
kinua aku nengka kanu madalem a ig.
17 Inilipuas aku nengka kanu mangabagel a kuntela ku
a mawag i kangguniat'in sa laki.
Sangat i kabagel'ilan tembu di aku pakagaga 'bpagatu kanilan.
18 Linusudan aku nilan sa timpu na pedtala aku sa mapasang,
ugaid'a pigkadtagan aku nengka, Hu Kadenan a Mapulu.
19 Init aku nengka kanu dalepa a dala makagkaid sa laki,
inilipuas aku nengka kagina 'gkasuatan aku nengka.
20 Hu Kadenan a Mapulu, binalasan aku nengka sabap sa matidtu aku;
pinalihalan aku nengka sabap sa dala budseng'u lima ku sa mawag a galebek.
21 Ka 'bpaginugutan ku man su manga kasuguan nengka,
dikena ku seka pedtaligkudanan enggu di aku penggula sa mawag.
22 Ipenggulalan ku su langun nu kasuguan nengka;
di ku pedsungkangen su pangitaban nengka.
23 Na dala tila ku sia kanu kaadapan nengka,
ipedtangka ku su ginawa ku kanu kabaladusan.
24 Hu Kadenan a Mapulu, tembu binalasan aku nengka sabap kanu katidtu ku
enggu sabap sa dala budseng'u lima ku kanu kaadapan nengka.
25 Na ipebpagilay nengka su katidtu nengka kanu manga taw a 'bpaguyag-uyag sia luyud sa leka;
ipebpagilay nengka su kaikelas'engka kanu manga taw a dala tila nin.
26 Ipebpagilay nengka su kasuti nengka kanu manga taw a ikelas,
ugaid'a kanu manga taw a mawag i akal'in na ipebpagilay nengka kanilan su kategel'u akal'engka.
27 Ka ibpelipuas'engka man su manga taw a mababa i muletad'in
ugaid'a ipembaba nengka menem su manga taw a mapulu i muletad'in.
28 Hu Kadenan ku a Mapulu, seka i palitan ku,
seka i pakatayaw kanu malibuteng a nakabalibet sa laki.
29 Sia makanggulalan sa leka na magaga ku lemusud su lumpukan nu manga sundalu;
sia makanggulalan sa leka na magaga ku mamusug su alad'u siudad'ilan.
30 Hu Kadenan a Mapulu, su ukit'engka na dala limban nin,
su pasad'engka na matuman.
Kelung ka nu langun nu mapalindung sa leka.
31 Dala den man Kadenan a liu pan sa leka.
Seka i mana masela a watu a pegkelung sa lekami.
32 Inibpakut'engka sa laki su bagel'engka,
tinilak'engka su lalan a 'bpagukitan ku.
33 Pinagkabagel'engka su ay ku sa mana su ay na saladeng,
tinabangan aku nengka temakedeg kanu malambeg a palaw sa dala aku makasiud.
34 Binibit'engka su lima ku sa kambunua
ka enggu makagaga minteng sa mabagel a busug.
35 Inenggay nengka sa laki su kelung'u kalipuasan,
su kawanan a lima nengka i 'bpagagak sa laki,
nabaluy aku a badtug sabap kanu tabang'engka.
36 Pinakaulad'engka su lalan a 'bpagukitan ku
tembu di pakasiud su ay ku.
37 Sineled ku su manga kuntela ku taman sa nagaus ku silan,
dala aku telen taman sa da ku silan maibped matay.
38 Pinanapes ku silan mametay
taman sa nangaudtang silan kanu ay ku enggu da den silan makagaga embangun.
39 Inibpakut'engka man sa laki su bagel sa kambunua
taman sa pinasugiud'engka kanu ay ku su manga kuntela ku.
40 Sabap sa leka na namakadtatalaguy su manga kuntela ku,
bininasa ku su mawag i 'gkangguniat'in sa laki.
41 Namakapaguguliang silan mangeni sa tabang, ugaid'a dala tinemabang kanilan.
Namakapaguguliang silan mangeni sa tabang sa leka, Hu Kadenan a Mapulu, ugaid'a da nengka silan sawala.
42 Pinamadasan ku silan taman sa nalupet-lupet silan a mana libubuk a pakabayug'u sambel,
initapuyak ku silan a mana budta kanu manga lalan.
43 Na inilipuas aku nengka kanu manga taw a pedsungkang sa laki,
binaluy aku nengka a 'gkaunutan nu manga bangsa,
su manga taw a di ku katawan na penggalebek den silan saguna sa laki.
44 'Gkakineg aku nilan bu na 'bpaginugutan aku nilan den,
su manga taw a lapu na pedsugiud den sa laki.
45 Sangat a nagilekan silan
taman sa nameliu silan kanu 'bpamagenan nilan a pegkegkel'a gilek.
46 Hu Kadenan a Mapulu a kaisa-isa nin a tidtu a Kadenan, pugin ku seka a mana masela a watu a pegkelung sa laki.
Badtugen ku seka a Kadenan a 'bpamelipuas sa laki.
47 Seka i pedsuli sa laki kanu manga kuntela ku,
inipatalaw nengka sa laki su manga bangsa enggu pinandatuan nengka sa laki.
48 Inilipuas aku nengka kanu manga kuntela ku,
inipulu aku nengka kanilan a pedsungkang sa laki,
inilipuas aku nengka kanu manga daluaka a taw.
49 Hu Kadenan a Mapulu, na sabap kanu nia na pebpugin ku seka sia kanu manga bangsa
enggu pedsengal aku sa pugi kanu ingala nengka.
50 Inenggan nengka su datu a pinamili nengka sa masela a kambantas.
Inipagedam'engka su sangat a kakalimu nengka sa laki a si Daud a pinamili nengka taman kanu manga muliataw nin taman sa taman.”