Su Pangeni-ngeni sa Kalipuas sia kanu 'Bpamungkaid
Su pangeni-ngeni nu Daud.
17
Hu Kadenan a Mapulu, pakikineg ka pan su wagib a 'bpangenin ku sa leka,edsuliman ka pan su kabpaguguliang ku 'bpangeni sa tabang sa leka.
Pakikineg ka pan su pangeni-ngeni ku ka bantang su kadtalu ku.
2 Seka bu i makadtalu sa dala kadaluakan ku
ka seka man i pakataw sa ngin i bantang.
3 Katawan nengka su dalem'u atay ku apia sa timpu na magabi.
Na amaika batalun aku nengka na maamad'engka i dala kadaluakan ku.
Inansad ku man kanu ginawa ku i dala lemiu kanu ngali ku a sungkang.
4 Dikena ku 'bpagilingan su penggulan nu ped a taw.
Sabap kanu kadtalu nengka na pedsanggilan ku su ukit'u manga daluaka a taw.
5 Nia ku man 'bpagukitan na su lalan nengka a di aku pedsibay-sibay.
6 Hu Kadenan ku, 'bpangeni-ngeni aku sa leka sabap sa 'gkatawan ku man i sawalen aku nengka,
pakikineg ka pan su pangeni-ngeni ku sa leka.
7 Ipailay nengka pan su sangat a kakalimu nengka sa laki.
Na sia kanu kapegkagaga nengka na ibpelipuas'engka su manga taw a papegkelung sa leka kanu manga kuntela nilan.
8 Tiakapi aku nengka a mana su kapedtiakap kanu taw-taw nu mata,
ipagena aku nengka kanu didalem'u papak'engka.
9 Kelungi aku kanu manga daluaka a pembinasa sa laki
enggu kanu manga kuntela ku a nakabalibet sa laki a pegkiug 'bpagimatay sa laki.
10 Da den kanu atay nilan su lat a nanam,
nia bu 'bpeliu kanu ngali nilan na kasandag.
11 Pinanganup aku nilan taman sa nabalibet aku nilan,
'bpangilay bu silan sa ukit sa kadakudak'ilan sa laki kanu lupa.
12 Mana silan alimaw a adil den a benal sa kanggansinga nilan keman sa laki,
atawa ka manguda a alimaw a 'bpagena kanu kabpagayan nin.
13 Hu Kadenan a Mapulu, embangun ka den ka edsangul ka den silan taman sa talaw ka silan!
Sia makanggulalan kanu sundang'engka na ilipuas aku nengka kanu manga daluaka.
14 Hu Kadenan a Mapulu, sia makanggulalan kanu kapegkagaga nengka
na ilipuas aku nengka kanu manga taw a nia nilan bu kalilinian na su ngin bu i sia sa dunia.
Su manga tian nilan na napenu-penu nu kaaden nengka a initagu nengka kanilan.
Subela-subela pan i entu kanu manga wata nilan
enggu su manga nangasama nilan a kaaden na ipedtabun nilan kanu manga wata nilan.
15 Sia sa laki, na sabap sa matidtu aku na mailay ku seka,
sia kanu kagedam ku na makapagadapa ku den seka a sangat a makagalaw kanu ginawa ku.