Su Sengal a Kasalig kanu Kadenan a Mapulu
Su nia a Sengal na inisulat'u Daud.
16
Hu Kadenan a Mapulu, kelungi aku ka san aku man papegkelung sa leka.2 Seka su Kadenan ku a Mapulu.
Langun na mapia sia sa laki na ebpun sa leka.
3 Na makapantag kanu manga taw nengka a matidtu sia kanu kalupan a nia a Israil
na silan i tidtu a 'bpagadatan a sangat a 'gkasuatan ku.
4 Na su manga taw menem a nia nin mapamili a simban na su pegkakadenanen na matakep-takep i lidu na ginawa nilan.
Di ku silan amungan kanu kabpagapal'ilan sa lugu kanu pegkakadenanen nilan,
apia su kalabit kanu ngala nu entu na di ku a benal enggulan.
5 Hu Kadenan a Mapulu, seka bu man i sia kanu ginawa ku.
Langun nu nasisita ku na ibpagenggay nengka,
seka i pegkakataw kanu kabpawangan nu uyag-uyag ku.
6 Mana bun man kalupan a sangat i kapia nin su manga inenggay nengka sa laki;
sangat man a pakapia sa ginawa ku su manga inenggay nengka sa laki.
7 Hu Kadenan a Mapulu, pugin ku seka a 'bpagenggay sa laki sa panduan,
kanu timpu na magabi na pedtutulun aku nu pamusungan ku sa u ngin i mapia a enggulan ku.
8 Hu Kadenan a Mapulu, lalayun ku ipedtagu sa ginawa i sia ka sa laki;
pedtapiden aku nengka tembu di aku magkeleng-keleng.
9 Kagina ka maitu na su atay ku na sangat a 'gkagalaw, sangat a 'gkapia i ginawa ku,
su badan ku na pakalilintad,
10 kagina di aku nengka man padtadayn kanu dalepa nu namamatay.
Di nengka isugut a makadtangen lu su matidtu a 'bpaginugut sa leka.
11 Ipebpagilay nengka sa laki su lalan a ibpawang kanu uyag-uyag.
Sia kanu kaadapan nengka na magedam ku su dala idsan nin a kagalaw;
sia kanu palad'u lima nengka su kapia na ginawa taman sa taman.