Su Pangeni-ngeni kanu Kalipuas sia kanu manga Kuntela
Lu i nia pakatumpa kanu 'gkaunutan nu pasesengal. Su nia a Sengal na inisulat'u Daud.
13
Hu Kadenan a Mapulu, ngin i kauget'a kalipat'engka sa laki?Ngin i kauget'a kataligkud'engka sa laki?
2 Ngin i kauget'a katigkel ku kanu masakit a 'gkagedam'u ginawa ku?
Dait ba a uman gay na malidu i ginawa ku?
Ngin i kauget'a kapanaban nu manga kuntela ku sa laki?
3 Hu Kadenan ku a Mapulu, ilay aku pan enggu pakikineg aku pan!
Pagkabagel aku 'bpaluman enggu di ka semuguti sa matay aku.
4 Di ka semuguti a madtalu nu manga kuntela ku i “Tinabanan tanu sekanin!”
Di ka semuguti a magalaw su manga kuntela ku sabap sa nakadadsang aku.
5 Ugaid'a pedsalig aku kanu sangat a kakalimu nengka,
na sia kanu kalipuas'engka sa laki na magalaw su pamusungan ku.
6 Hu Kadenan a Mapulu, edsengalan ku seka sa kapugi sa leka
sabap kanu madakel a pinggula nengka a kapianan sa laki.