Su Kabpangeni sa Tabang kanu Kadenan sa kanu Timpu nu Kadaluakan nu manga Taw
Lu i nia pakatumpa kanu 'gkaunutan nu pasesengal a nia usalen na palabuni-bunian a bedtuan sa Siminit. Su nia a Sengal na inisulat'u Daud.
12
Hu Kadenan a Mapulu, tabangi kami pan ka da den nasama a 'bpaguyag-uyag sia luyud sa leka;da den nasama a matidtu a manusia.
2 Kalebutan bu i pedtalun na uman i isa sa ped'in;
pedtalu silan sa mapia asal'a pakadsalimbut silan.
3 Hu Kadenan a Mapulu, patelen ka den su langun nu ngali a mamis i kambitiala nin.
Tebped ka den su dila a pedtegel den 'bpemamasela,
4 su manga taw a nia nin kangadtalu na “Sia makanggulalan kanu kangadtalu nu dila nami na 'bpanaban kami;
su bibil'ami na sekami i pegkakataw lun, dala makapelen lun u ngin i 'bpeliu lun.”
5 Nia kadtalu nu Kadenan a Mapulu na “Edtindeg aku saguna,
ka 'gkadsuliman ku su kabpagumis kanu manga miskinan, 'gkakineg ku su kabpananawag'u pakanasisita.
Inggay ku kanilan su 'gkapangingalap'ilan a benal a kalipuasan.”
6 Na su manga pasad'u Kadenan a Mapulu na kasaligan
a mana pilak a sinayaban sa nakapitu ka enggu 'gkapagelin.
7 Hu Kadenan a Mapulu, seka i dalinding'ami;
pegkelungan kami nengka taman sa taman sa kanu manga taw a nia a daluaka sa saguna a timpu.
8 Ka nabalibet kami nu manga daluaka a taw,
'bpamedtan pan nu manusia su kadaluakan nilan.