Su Ula-ula nu Taw
Lu i nia pakatumpa kanu 'gkaunutan nu pasesengal. Su nia a Sengal na inisulat'u Daud.
14
Su manga taw bu a babal i edtalu i atay nin sa “Dala Kadenan!”Su entu ba a manga taw na manga dupang, penggula sa pakangingili a galebek
enggu dala isa bu kanilan i penggalebek sa mapia.
2 Su Kadenan a Mapulu a lu sa sulega na pedtulungan nin su manusia sia sa dunia
ka 'bpagilayn nin u aden pamun kanilan i balaitungan
a mangilay sa lekanin a Kadenan.
3 Namakasibay den silan langun, nabaluy den silan langun a dupang;
dala isa bu kanilan i penggalebek sa mapia, apia sakataw na dala.
4 Ngintu, su manga taw a nia a penggula sa mawag na dala demun manga sabut'in?
Inibped'ilan mamungkaid su manga taw nu Kadenan a Mapulu.
Di demun silan mangadap kanu Kadenan a Mapulu.
5 Ugaid'a kukuken bun silan na gilek
kagina su Kadenan a Mapulu na pedtapiden nin su manga taw a matidtu.
6 Sekanu a manga taw a penggula sa mawag na aden a entu na ungenen nu su manga kahanda nu miskinan
ugaid'a su Kadenan a Mapulu i pegkelung kanilan.
7 Pangeni-ngenin ku i ilipuas den nu ebpun sa Ziona su manga taw a Israil.
Na amaika imbalingan den nu Kadenan a Mapulu su kapamalihala nin kanu manga taw nin
na makadsisigalaw su manga tupu nu Yakub a su manga taw a Israil.