Su Pangeni-ngeni sa Kalipuas sia kanu manga Kuntela
10
Hu Kadenan a Mapulu, ngintu ka mana matangka ka sa lekami?Ngintu ka pedtaligkudan kami nengka sa kutika na kasimuketan?
2 Sia kanu kabpemamasela nilan na 'bpamungkaidan nu manga daluaka su manga miskinan.
Pangeni-ngenin ku i silan bun i makua nu litag a initana nilan.
3 Ka su manga daluaka na ibpemamasela nilan su 'gkalilinian nu atay nilan penggula a mawag.
Su manga taw a di masukul na inisinta nilan enggu tinaligkudan nilan su Kadenan.
4 Na sangat i kasandag'u manga taw a daluaka tembu nia sia sa itungan nilan na “Di tanu man siksan nu Kadenan.”
Nia pan 'gkadtalu na ginawa nilan na “Dala Kadenan.”
5 Ka nia ku lun kapegkailay na pembantas su langun nu ukit'ilan kanu langun na kutika,
di nilan demun 'bpangandamen i sugaten nengka silan sa kawagib,
pedsudian nilan su manga kuntela nilan.
6 Nia 'gkadtalu na ginawa nilan na “Dala man makagkaid sa lekitanu;
natatalanged a di tanu man makatala sa dikena mapia taman kanu langun nu temundug pan a muliataw tanu.”
7 Su ngali nilan na napenu na kapedsinta, kabudtud enggu kabpamagigis;
su dila nilan na napenu na kadtalu a dikena mapia enggu kasimuketan.
8 'Bpamagena silan kanu manga dalepa ka 'bpagayanan nilan 'bpagimatay su dala sabut'in kanu nanggula.
Nia bu pedsipatan nu mata nilan na su manga taw a dala 'gkagaga nin.
9 Mana silan alimaw a 'bpagena kanu kabpagayan nilan
asal'a 'gkasampenan nilan su manga miskinan ka pengguyuden nilan lu kanu 'bpamelugenan nilan.
10 Su 'gkasampenan nilan na 'gkangaudtang
taman sa 'gkangalupet-lupet kagina di silan pakagaga kanu bagel'ilan.
11 Nia 'gkatagu kanu ginawa nilan na “Su Kadenan man na di nin ibpamamantag su ngin i penggulan tanu;
di nin 'gkailay su entu ka dinapengan nin su beneng'in.”
12 Hu Kadenan a Mapulu, embangun ka, ka siksa ka su dupang a manga taw,
di ka 'bpelipatani su 'gkangaumis.
13 Ngintu guna ka tinaligkudan nu manga taw a daluaka su Kadenan?
Nia pan 'gkadtalu na ginawa nilan na “Di tanu man siksan nu Kadenan.”
14 Ugaid'a seka, Hu Kadenan a Mapulu, na 'gkailay nengka su 'gkanggula nu papegkapasangan.
'Gkatawan nengka su kapegkalidu na ginawa nilan, na pedtabangan nengka silan sa entu.
Su da 'gkagaga nin a manga taw na san nilan ipendedsa sa leka su ginawa nilan;
seka man i pedtabang kanu manga taw a ilu.
15 Awai ka sa bagel su manga daluaka a taw.
Siksa ka silan taman sa di silan temelen enggula sa mawag.
16 Hu Kadenan a Mapulu, datu ka man taman sa taman.
Su manga bangsa a daluaka na madala man kanu kalupan nilan.
17 Hu Kadenan a Mapulu, pakikinegen nengka man su 'gkapaginagkay nu 'gkangapasangan a manga taw,
pakabagelen nengka su pamusungan nilan enggu pakikinegen nengka silan.
18 Itindeg'engka su kawagib'u manga ilu enggu su 'gkangaumis a manga taw
ka enggu da den taw a mumis kanu pagidsan nin bun a manusia.