Su Kabarakat'u Kadenan enggu su Kawagib'in
Lu i nia pakatumpa kanu 'gkaunutan nu pasesengal a nia usalen lun a legku na bedtuan sa Mut-Labin. Su nia a Sengal na inisulat'u Daud.
9
Na edsukul-sukul aku sa leka a Kadenan a Mapulu sa senep sa atay.Ipayag ku kanu manga taw su langun na makagaip a pinggula nengka.
2 'Gkagalaw aku a pedsengal sa leka;
Hu Kadenan a Mapulu, edsengal aku sa kapugi kanu ingala nengka.
3 Su manga kuntela ku na amaika mailay nilan su sangat a kapegkagaga nengka
na mangaudtang silan sa kinadsunud'ilan taman sa mamamatay kanu kaadapan nengka.
4 Ka 'bpagagayan ka kanu kulesi nengka a 'bpangukuman sa wagib.
Sabap sa entu na pinakatawan nengka su katidtu ku.
5 Sinapalan nengka su manga bangsa, bininasa nengka su manga daluaka a taw,
pinunas'engka su manga ngala nilan taman sa taman.
6 Su manga kuntela na nadadag den, nabinasa den silan taman sa taman,
su manga siudad'ilan na pinunas'engka
taman sa da den makagkalendem kanilan.
7 Ugaid'a seka, Hu Kadenan a Mapulu, na pendatu ka taman sa taman.
Adil den su kulesi nengka sa kapangukum.
8 Kukumen nengka su dunia sa wagib;
kukumen nengka su manga taw sa matidtu.
9 Hu Kadenan a Mapulu, seka su kuta nu manga taw a 'bpangumisen,
'bpagenan kanu kutika nu kasimuketan.
10 Su manga taw a pegkilala kanu ingala nengka na pedsalig silan sa leka,
kagina seka, Hu Kadenan a Mapulu, na di nengka papedtadayn su manga taw a 'bpangilay sa leka.
11 Edsengal tanu sa kapugi kanu Kadenan a Mapulu a pendatu sa Zion.
Ipayag kanu manga bangsa su manga pinggula nin.
12 Di nin 'gkalipatanan su kabpananawag'u manga pinakapasangan;
pedsulian nin su papegkapasang kanilan.
13 Hu Kadenan a Mapulu, lati aku sa nanam.
Ilay ka su kapapegkapasang'u 'gkangabensi sa laki,
seka bu i makalipuas sa laki kanu nanget a kapatay
14 ka enggu ku makapayag su langun na pugi sa leka sia kanu bengawan nu siudad'u Zion,a
na ikagalaw ku su kalipuas'engka sa laki.
15 Na su manga bangsa, na silan bun i naulug kanu kalut a kinalut'ilan;
silan bun i nakua nu litag a initana nilan kanu kuntela nilan.
16 Ipebpagilay nu Kadenan a Mapulu su ginawa nin sia makanggulalan kanu wagib a kabpangukum'in.
Na su dupang na nakua nu litag a silan bun i minumbal lun.
17 Su dupang a manga taw na nia nilan kabpawangan na su dalepa nu namamatay;
nia ba i kabpawangan nu langun nu bangsa a kemias kanu Kadenan.
18 Ugaid'a di kalipatanan nu Kadenan su taw a pakanasisita;
su inam'u miskinan na di madala taman sa taman.
19 Hu Kadenan a Mapulu, embangun ka, di ka semuguti a makatimbabaw su kapegkagaga nu manusia.
Sugat ka sa kawagib su manga bangsa sia kanu kaadapan nengka.
20 Hu Kadenan a Mapulu, tutulu ka silan sa kagilek sa leka;
pakatawi ka kanu manga bangsa i manga manusia bu silan.