Su Kabarakat'u Kadenan na Mailay sia kanu Liwawaw nu Dunia
Lu i nia pakatumpa kanu 'gkaunutan nu pasesengal a nia usalen sa kapedsengal lun na sa ukit a kapebpalabuni-bunian a bedtuan sa Gitit. Su nia a Sengal na inisulat'u Daud.
8
Hu Kadenan nami a Kadenan a Mapulu,su kadatu nengka na nalangkum'in su liwawaw nu dunia!
Su kabarakat'engka na nalawanan nin pan su kapulu nu langit.
2 Pigkahanda nengka i kapugi sa leka nu manga wata, apia su wata a pedsusu pamun
asal'a kayan enggu makatelen su pedsungkang sa leka.
3 Uman aku pedtingada kanu langit na pedsusulimanen ku su manga pinangaden nengka kanu nambetadan nin
a mana su ulan-ulan enggu su manga bitun.
4 Na nia ku pakaidsa kanu ginawa ku na entain ba su manusia a 'bpagitungen nengka pan?
Entain ba silan a pedtiakapan nengka pan?
5 Binaluy nengka silan a mababa sa paidu kanu manga malaikata
enggu binadtug'engka silan enggu inipulu nengka silan a mana su datu.
6 Pinandatuan nengka kanilan su langun-langun nu pinangaden nengka.
Silan i pinagkakataw nengka kanu langun-langun
7 a mana su manga bili-bili, manga sapi
taman den kanu manga talaw a binatang,
8 su manga papanuk sa kawang-kawangan, su manga seda sa lagat
taman den kanu langun nu lu sa didalem'u lagat.
9 Hu Kadenan nami a Kadenan a Mapulu,
su kadatu nengka na nalangkum'in su liwawaw nu dunia!