Su Kapangeni sa Tabang a Kalipuas sia kanu 'Bpamungkaid
Sengal'u Daud a bedtuan sa Sigayun.a Pidsengal'u Daud kanu Kadenan a Mapulu pantag kani Kus a tupu nu Buniamin.
7
Hu Kadenan a Mapulu a Kadenan ku, san aku papegkelung sa leka.Ilipuas aku nengka kanu langun nu 'bpaneled sa laki, ilipuas aku nengka.
2 Mana silan alimaw a mamagagawa sa kadtalakisi nilan sa laki,
enggagansingan aku nilan, na apia sakataw na dala makadtabang sa laki.
3 Hu Kadenan a Mapulu, na amaika aden pinggula ku a dikena mapia,
atawa ka dikena wagib,
4 atawa ka sinulian ku sa mawag su pakat ku
enggu pinangagawan ku sa kaaden su kuntela ku sa dala sabap'inb
5 na amaika maitu na padtaday ka den a paneleden aku nu manga kuntela ku enggu magaus aku nilan.
Padtaday ka den a dakudaken aku nilan taman sa matay aku enggu padtadayn nilan kanu lupa su badan ku.
6 Hu Kadenan a Mapulu, sabap kanu lipunget'engka kanu manga kuntela ku na embangun ka,c
ka ipaninindeg aku nengka kanu kapegkalipunget'ilan sa laki.
Enggula ka kanilan su ngin i wagib a pigkahanda nengka kanilan.
7 Pandidilimuda ka su manga bangsa san sa leka
ka endatui ka silan ganat sa sulega.
8 Hu Kadenan a Mapulu, seka i pegkukum kanu langun nu bangsa;
kukum aku nengka ka ipailay nengka i dikena aku 'gkawagiban
ka 'gkatawan nengka man i matidtu aku.
9 Nia ku pangeni-ngenin na pupusen nengka den su mawag a galebekan nu manga taw a dupang
enggu kelungan nengka su manga taw a matidtu,
kagina matidtu ka a Kadenan.
'Gkatawan nengka su 'bpagitungen nu taw enggu su 'gkangguniat'ilan.
10 Seka a Kadenan i kelung ku
a 'bpelipuas kanu manga taw a ikelas i pamusungan nin.
11 Su Kadenan na wagib su kapangukum'in;
uman-uman gay na ipebpagilay nin su lipunget'in kanu manga taw a dupang.
12 Na amaika di silan edtataubat na pagkagalangen nin su sundang'in,
bininteng'in den su busug'in ka adil den sa kabusug,
13 inadil'in den su pakapatay a manga matalem'in,
inadil'in den su busug'in a pegkaleg i asad'in.
14 Ipegkalaling den nu entu a manga taw su kadupang, ipegkagingay nilan den su kasamukan,
pembatan nilan den su kabudtud.
15 Minumbal silan sa kalut taman sa pinagkadalem'ilan pan.
Na lu bun ba silan naulug kanu kalut a entu a silan bun i kinemalut lun.
16 Na minuli bun kanu badan nilan su kadupangan nilan;
su kadaluakan nilan na lu bun nakadtana kanu embun-embunan nilan.
17 Hu Kadenan a Mapulu, pedsukul-sukul aku sa leka sabap kanu katidtu nengka.
Edsengal aku sa kapugi kanu ingala nengka a Kadenan a Mapulu sa Langun.