Su Kasalig kanu Kadenan sa Kalipuas sia kanu manga Kuntela
Lu i nia pakatumpa kanu 'gkaunutan nu pasesengal a nia usalen na palabuni-bunian a palendag. Su nia a Sengal na inisulat'u Daud.
5
Hu Kadenan a Mapulu, pakikineg ka su manga kadtalu ku;ipamamantag'engka pan su kapedtala ku sa mapasang.
2 Hu Datu a Kadenan ku,
pakikineg ka su kabpaguguliang ku,
kagina san aku bu sa leka 'bpangadap.
3 Hu Kadenan a Mapulu, sia kanu kagkapita na 'bpakikinegen nengka su suala ku;
sia kanu kapedsupeg ku kanu pangeni-ngeni ku sa leka na 'bpagangapan ku su sawal'engka.
4 Kagina seka su Kadenan a dikena 'gkasuat kanu kadaluakan;
di nengka edtagapedan su manga taw a daluaka.
5 Su mangasandag na di makadtindeg kanu kaadapan nengka;
'gkabensian nengka su langun nu penggula sa kadupangan.
6 Pembinasan nengka su manga taw a pedtalu sa kabudtud;
Hu Kadenan a Mapulu, di nengka a benal kalilinian su manga taw a talibunu enggu tagakalen.
7 Ugaid'a saki, na sia pakanggulalan kanu 'bpamelapay a sangat a kakalimu nengka
na lemudep aku kanu walay nengka.
Semugiud aku sa leka kanu Suti a 'Bpagagaman sa leka
a tanda na gilek ku sa leka.
8 Hu Kadenan a Mapulu, sabap kanu madakel a kuntela ku
na agak aku nengka sia kanu katidtu nengka;
ipailay nengka sa laki su ngin i dait a enggulan ku.
9 Kagina dala bantang kanu manga kadtalu nilan;
su niat'u atay nilan na kabinasan;
su manga ngali nilan na mana minggeba a lebeng;
su manga dila nilan na napenu na kabudtud.
10 Hu Kadenan a Mapulu, ipagedam'engka kanilan su kasiksan kanu kabaladusan nilan;
su kahanda nilan bun i makabinasa sa kanilan;
sabap kanu madakel a kabaladusan nilan na siksa ka silan,
kagina sinungkang ka nilan.
11 Ugaid'a su langun nu taw a papegkelung sa leka na suguti ka sa makanggalaw-galaw
taman sa makadsengal-sengal silan sa kagalaw.
Palangkap ka kanilan su kakelung'engka,
ka asal'a su pegkalimu kanu ingala nengka na makanggalaw-galaw silan san sa leka.
12 Hu Kadenan a Mapulu, 'bpamalihalan nengka su matidtu a taw.
Na pendalindingan nengka silan kanu limu nengka a mana bun su kelung.