Su Senep sa Atay a Pangeni-ngeni kanu Kalipuas sia kanu manga Kuntela
Lu i nia pakatumpa kanu 'gkaunutan nu pasesengal a nia usalen na palabuni-bunian a aden pegkebitan lun a iket. Su nia a Sengal na inisulat'u Daud.
4
Hu Kadenan ku a matidtu, sawal aku nengka amaika pedtawag aku sa leka!Tinabangan aku nengka sa kanu kapegkapasang sa laki.
Lati aku sa nanam enggu pakikineg aku pan.
2 Sekanu a manga taw, kanu pan basi i katelen nu sa laki mapagkaya?
Kanu pan basi i katelen nu sa kalilini nu sa manga kadtalu a dala katagan nin enggu kakiug'u sa kambudtud?
3 Dait a katawan nu i inisenggay nu Kadenan a Mapulu sa lekanin su manga taw a matidtu;
tembu 'bpakikinegen aku nu Kadenan a Mapulu amaika pedtawag aku sa lekanin.
4 Na amaika malipunget kanu na da kanu bu embaladusa,
lu ka pagitung i entu kanu 'bpagigan nengka enggu patana ka demun lu ba.
5 'Gkurban kanu sa u ngin i wagib a ipegkurban,
salig kanu sia kanu Kadenan a Mapulu.
6 Madakel i pedtalu sa “Aden a entu, na aden mapailay sa lekami sa manga kapianan!
Hu Kadenan a Mapulu, isugut'engka i katayawan kami nu sigay nengka!”
7 Seka i papegkagalaw kanu pamusungan ku,
labi pan i kagalaw ku kumin kanu manga taw a madakel i sabpet'in a bantad enggu ig'a ubas a 'bpaginumen.
8 Na makatulug aku sa malilintad sia kanu kaiga ku
kagina seka bu man, Hu Kadenan a Mapulu, i pegkelung sa laki sia kanu kabpangintelenen ku.