Su Datu a Pinamili nu Kadenan a Mapulu
2
Ngintu guna ka su manga bangsa na namagayun sa kasungkang'ilan kanu Kadenan?Ngintu guna ka su manga tribu kanu langun nu bangsa na pegkahanda sa dala katagan nin kanu datu a pinamili nin?
2 Su manga datu nu dunia na namagadil den silan,
su 'gkangaunutan na namagayun den
sa kasungkang'ilan kanu Kadenan a Mapulu enggu kanu datu a pinamili nin, sa nia nilan kadtalu na
3 “Tebpeden tanu su sangkali a inisangkali nilan sa lekitanu.
Di tanu den mapasakup kanu kapendatu nilan!”
4 Ugaid'a su Kadenan a Mapulu a 'bpagagayan kanu kulesi nin a lu sa sulega na pedtatawan nin bu silan,
ka 'gkadsudian nin man silan.
5 Na sabap kanu sakit'a ginawa nu Kadenan na nalipungetan nin silan,
sabap kanu sakit'a ginawa nin na sangat a nangagilekan silan. Nia nin pidtalu kanilan na
6 “Pinandatu ku den man su pinamili ku a datu lu kanu suti a palaw ku a Zion.”
7 Na nia mambu pedtalun nu pinandatu na “Ipayag ku su kasuguan nu Kadenan a Mapulu sa nia nin pidtalu sa laki na ‘Seka su wata ku;
na saguna na ipebpayag ku i nabaluy aku a ama nengka.
8 Pangeni ka man sa laki ka inggay ku sa leka su manga bangsa,
mabaluy a kaaden nengka a makabpusaka ku sa leka su tedtab'u dunia.
9 Na malupet-lupet'engka silan kanu tungked'engka a putaw
a mana su binangga i kalupet-lupet'in.’
10 Kagina ka maitu, Hu manga datu nu dunia, pakategel'u i itungan nu;
sekanu a 'gkangaunutan nu dunia na ipamamantag'u su kapebpagingat sa lekanu.
11 Enggalebek kanu sa aden gilek'in kanu Kadenan a Mapulu;
enggalaw-galaw kanu sa aden gilek'in sa lekanin.
12 Sugiudi nu su ay nu wata nin,a ka amaika dili na malipunget su sekanin a Kadenan a Mapulu taman sa binasan kanu nin langun
kagina su lipunget'in man na malemu a benal semindaw.
Ugaid'a mapia den a benal kanu taw a mapalindung kanu Kadenan a Mapulu.