𖼄𖽳𖾐 𖼷𖽑𖽦𖾐 𖼺𖽪𖾐 𖼹𖽡𖾐 𖼖𖽦 𖼐𖽕 𖼊𖽺𖾐 𖼖𖽻𖾐 𖼮𖽻𖾐
3
1 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼀𖽦𖾐：“𖼐𖽦𖾐 𖼄𖽺! 𖼣𖽙𖾐 𖼞𖽳𖾐 𖼹𖽡𖾐 𖼖𖽦 𖼊𖽑𖽺 𖼹𖽡𖾐， 𖼣𖽙𖾐 𖽃𖽙𖾑 𖼄𖽺 𖼮𖽨𖾐 𖼄𖽙𖾐 𖼂𖽺𖾐 𖼳𖽡𖽻𖾐；𖼐𖽑𖽡𖾐 𖼈𖽳𖾐 𖼞𖽑𖽙𖾐 𖼰𖽙𖾐 𖼦𖽙𖾐 𖼺𖽪𖾐 𖼺𖽡 𖼀𖽑𖽙， 𖼷𖽑𖽜𖾑 𖼷𖽑𖽜𖾐 𖼐𖽕 𖼊𖽺𖾐 𖼽𖽻 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽑𖽶𖾐 𖼊𖽡 𖼽𖽡𖾐 𖼊𖽻𖾐， 𖼐𖽑𖽡𖾐 𖼈𖽳𖾐 𖼞𖽑𖽙𖾐 𖼐𖽦𖾐 𖼳𖽡𖽻𖾐 𖼺𖽪𖾐 𖼄𖽳𖾐 𖼷𖽑𖽦𖾐 𖼺𖽪𖾐 𖼹𖽡𖾐 𖼖𖽦， 𖼐𖽕 𖼐𖽕𖾐 𖼖𖽻𖾐 𖼊𖽻𖾐．2 𖼦𖽑𖽻𖾐 𖼊𖽑𖽻𖾐， 𖼽𖽻 𖼖𖽻𖾐 𖼞𖽳𖾐 𖼐𖽑𖽡𖾐 𖼦𖽑𖽦， 𖽃𖽔 𖼺𖽺 𖼷𖽳𖾑 𖼍𖽪𖾐 𖼊𖽙𖾐 𖼐𖽺𖾑？ 𖼽𖽻 𖼊𖽚𖾐 𖼊𖽑𖽧 𖼖𖽻𖾐 𖼞𖽑𖽶𖾑 𖼮𖽶𖾐， 𖽃𖽔 𖼺𖽺 𖼦𖽑𖽡𖽚 𖼻𖽺𖾐 𖼊𖽙𖾐 𖼐𖽺𖾑？ 𖼞𖽪𖾐 𖼮𖽡𖽺𖾐， 𖼽𖽻 𖼳𖽳𖾐 𖼰𖽡𖾐 𖼖𖽦 𖼠𖽸𖾑 𖼞𖽳𖾐 𖽃𖽔𖾐 𖼍𖽚𖾑 𖼖𖽙𖾐 𖼺𖽶𖾑， 𖼹𖽦𖾑 𖼄𖽳𖾐 𖼷𖽑𖽡 𖼀𖽑𖽨𖾐 𖼠𖽸𖾑 𖼺𖽪𖾐 𖼐𖽕𖾐 𖼷𖽑𖽡 𖼖𖽙𖾐 𖼺𖽶𖾑． 3 𖼽𖽻 𖼷𖽑𖽜𖾑 𖼷𖽑𖽜𖾐 𖼊𖽡𖾐 𖼍𖽳𖾐， 𖼀𖽑𖽨𖾐 𖼰𖽡𖾐 𖼺𖽡 𖼮𖽡𖾐 𖼺𖽪𖾐 𖼖𖽦 𖼠𖽸𖾑 𖼖𖽙𖾐 𖼺𖽶𖾑， 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼊𖽑𖽺 𖼖𖽺𖾑 𖼰𖽡𖾐 𖼺𖽺𖾑， 𖼽𖽻 𖼈𖽳𖾐 𖼞𖽜 𖼀𖽑𖽨𖾐 𖼳𖽳𖾐 𖼖𖽙𖾐 𖼺𖽶𖾑 𖼺𖽡 𖼮𖽡𖾐 𖼊𖽻𖾐． 𖼦𖽑𖽺𖾑 𖼻𖽻𖾐， 𖼽𖽻 𖼈𖽳𖾐 𖼀𖽳𖾐 𖼈𖽡𖾐 𖼖𖽙𖾐 𖼮𖽑𖽻𖾐 𖼍𖽡𖾐 𖼊𖽪𖾐 𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜 𖼊𖽻𖾐． 4 𖼞𖽑𖽶𖾑 𖼮𖽶𖾐， 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼐𖽺𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼺𖽪𖾐 𖼷𖽑𖽻𖾐 𖼞𖽑𖽙𖾐 𖼦𖽑𖽙𖾐 𖼍𖽡𖾐 𖼺𖽪𖾐 𖼄𖽡𖽻 𖼐𖽑𖽡， 𖼽𖽺𖾐 𖼦𖽴 𖼦𖽫 𖼷𖽑𖽜𖾑 𖼷𖽑𖽜𖾐 𖼐𖽑𖽧𖾐 𖼺𖽳 𖼷𖽶𖾐 𖼊𖽻𖾐， 𖼞𖽑𖽻𖾑 𖽃𖽔 𖼈𖽜 𖼊𖽑𖽙 𖼞𖽑𖽶𖾑 𖼮𖽶𖾐 𖼐𖽺𖾐 𖼠𖽚 𖼦𖽑𖽙𖾐 𖼞𖽳𖾐 𖼐𖽑𖽡𖾐 𖼦𖽑𖽦 𖼖𖽙𖾐 𖼺𖽶𖾑． ”
5 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼀𖽦𖾐：“𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼐𖽳 𖼖𖽻𖾐 𖼳𖽶 𖼊𖽻 𖼐𖽙𖾐 𖼊𖽻𖾐． 𖼣𖽙𖾐 𖼐𖽕 𖼐𖽕𖾐 𖼂𖽡𖾐 𖼀𖽑𖽙 𖼂𖽺𖾐 𖼺𖽪𖾐， 𖼊𖽑𖽙𖾑 𖼄𖽡𖽻 \fr 3．5 \ft “𖼊𖽑𖽙𖾑 𖼄𖽡𖽻 ” 𖼦𖽑𖽺𖾑 𖼊𖽑𖽡 𖼹𖽸𖾑 𖼞𖽑𖽶𖾐 “𖼰𖽡𖽺𖾐 𖼽𖽦 ” 𖼖𖽙𖾐 𖼀𖽦𖾐 𖼺𖽪𖾐 𖼣𖽻𖾐． 𖼂𖽺𖾐 𖼺𖽪𖾐， 𖼠𖽕𖾐 𖼄𖽔 𖼰𖽶𖾐 𖼄𖽳𖾐 𖼷𖽑𖽦𖾐 𖼺𖽪𖾐， 𖼺𖽙𖾐 𖼞𖽳𖾐 𖽂𖽙 𖼀𖽑𖽶 𖼊𖽑𖽺 𖼂𖽕𖾑 𖼽𖽡𖾑 𖼹𖽺𖾐 𖼍𖽙𖾑 𖼺𖽪𖾐， 𖼄𖽳 𖼮𖽑𖽶 𖼄𖽙𖾐 𖼐𖽺𖾐 𖼻𖽙 𖼮𖽑𖽶 𖼄𖽦 𖼮𖽡𖽦𖾐 𖼊𖽑𖽺 𖼮𖽑𖽡𖾐 𖼻𖽸 𖼺𖽪𖾐， 𖼣𖽙𖾑 𖼮𖽻𖾐 𖼺𖽪𖾐 𖼊𖽑𖽺 𖼄𖽔 𖼠𖽕𖾐 𖼐𖽑𖽧𖾐 𖼣𖽡𖽳𖾐 𖼺𖽪𖾐， 𖼣𖽙𖾐 𖼊𖽑𖽺 𖼄𖽔 𖼮𖽡𖽮𖾐 𖼠𖽙𖾐 𖼳𖽙𖾐 𖼺𖽪𖾐 𖼦𖽑𖽺𖾑 𖼹𖽻𖾐 𖼊𖽑𖽺 𖽂𖽙 𖼇𖽕 𖼳𖽶 𖼊𖽻𖾐．”
6 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼀𖽦𖾐：“𖼞𖽪𖾐 𖼮𖽡𖽺𖾐 𖼣𖽙𖾐 𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼻𖽳𖾐 𖼹𖽦𖾐 𖼄𖽔 𖼖𖽳𖾑 𖼺𖽪𖾐 𖼣𖽻𖾐， 𖽃𖽔𖾐 𖼺𖽺𖾑 𖼽𖽔 𖼠𖽴𖾑 𖼞𖽳𖾐 𖼻𖽙 𖼮𖽑𖽡 𖼖𖽦𖾐 𖼐𖽑𖽡𖾐 𖼈𖽳𖾐 𖼄𖽔 𖼄𖽳 𖼮𖽡𖽦 𖼳𖽶 𖼣𖽻𖾐．”
𖼷𖽑𖽡𖾐 𖼀𖽜𖾐 𖼊𖽑𖽡 𖼀𖽜𖾐 𖼦𖽑𖽙𖾐 𖼞𖽜 𖼷𖽻
7 𖼐𖽑𖽡𖾐 𖼈𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼞𖽳𖾐 𖼐𖽑𖽡𖾐 𖼦𖽑𖽦 𖼮𖽑𖽻𖾐 𖼍𖽪𖾐， 𖼐𖽑𖽡𖾐 𖼈𖽳𖾐 𖼣𖽙𖾐 𖼞𖽳𖾐 𖼳𖽪𖾐 𖼮𖽨𖾐 𖼊𖽑𖽺 𖼰𖽡𖾑 𖼦𖽑𖽙𖾐 𖼄𖽔 𖼳𖽪𖾐． 𖽃𖽔𖾑 𖼄𖽳𖾐 𖼐𖽑𖽡𖾐 𖼈𖽳𖾐 𖼰𖽻𖾐 𖼀𖽑𖽚𖾐 𖼣𖽙𖾐 𖼞𖽳𖾐 𖼖𖽻𖾐 𖼖𖽡𖾐，𖽃𖽔𖾐 𖼺𖽺𖾑 𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼰𖽻𖾐 𖼀𖽑𖽚𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼖𖽻𖾐 𖼊𖽻𖾐．
𖼦𖽑𖽻𖾐 𖼊𖽑𖽻𖾐， 𖼐𖽑𖽡𖾐 𖼈𖽳𖾐 𖼦𖽑𖽔𖾐 𖼖𖽺𖾑 𖼊𖽻 𖼐𖽙𖾐：“𖼣𖽙𖾐 𖼈𖽳𖾐 𖽃𖽔 𖼊𖽺𖾐 𖼰𖽻𖾐 𖼀𖽑𖽚𖾐 𖼖𖽻𖾐 𖼐𖽺𖾑？ ”
8 𖼷𖽑𖽻𖾐 𖽃𖽔 𖼊𖽺𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼄𖽡𖽻 𖼐𖽑𖽡 𖼐𖽻𖾑 𖼮𖽴𖾐 𖼊𖽙𖾐 𖼐𖽺𖾑？ 𖼦𖽑𖽻𖾐 𖼊𖽑𖽻𖾐 𖼐𖽑𖽡𖾐 𖼈𖽳𖾐 𖼣𖽙𖾐 𖼷𖽺𖾐 𖼄𖽡𖽻 𖼐𖽑𖽡 𖼐𖽻𖾑 𖼮𖽴𖾐 𖼦𖽑𖽙𖾐，
𖼐𖽑𖽡𖾐 𖼈𖽳𖾐 𖼦𖽑𖽔𖾐 𖼖𖽺𖾑 𖼀𖽦𖾐：“𖼣𖽙𖾐 𖼈𖽳𖾐 𖼐𖽑𖽡𖾐 𖼞𖽳𖾐 𖽃𖽔 𖼊𖽺𖾑 𖼳𖽶 𖼐𖽻𖾑 𖼮𖽴𖾐 𖼦𖽑𖽙𖾐 𖼐𖽺𖾑？ ”
𖼞𖽑𖽶𖾑 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼞𖽜 𖼷𖽻 𖼺𖽪𖾐 𖼷𖽑𖽡𖾐𖼀𖽜𖾐 𖼊𖽑𖽡 𖼀𖽜𖾐 𖼐𖽺𖾐 𖼞𖽑𖽙𖾐 𖼦𖽑𖽙𖾐 𖼍𖽡𖾐 𖼷𖽻 𖼺𖽪𖾐 𖼄𖽡𖽻 𖼐𖽑𖽡 𖼣𖽻𖾐． 9 𖼐𖽑𖽡𖾐 𖼈𖽳𖾐 𖼮𖽙 𖼮𖽪𖾑 𖼈𖽳 𖼈𖽳 𖼄𖽙𖾐 𖼷𖽶𖾐 𖼄𖽳𖾐 𖼊𖽻𖾐， 𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼈𖽳𖾐 𖼠𖽚 𖼞𖽑𖽶𖾐 𖼷𖽑𖽻𖾐 𖼞𖽑𖽙𖾐 𖼣𖽻𖾐 𖼣𖽙𖾐 𖼷𖽺𖾐 𖼄𖽡𖽻 𖼐𖽑𖽡 𖼐𖽻𖾑 𖼮𖽴𖾐 𖼦𖽑𖽙𖾐． 10 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼀𖽦𖾐：“𖼐𖽑𖽡𖾐 𖼈𖽳𖾐 𖼦𖽑𖽙𖾐 𖼞𖽜 𖼷𖽻 𖼺𖽪𖾐 𖼷𖽑𖽡𖾐 𖼀𖽜𖾐 𖼊𖽑𖽡 𖼀𖽜𖾐， 𖼄𖽳𖾑 𖼄𖽳 𖼦𖽑𖽙𖾐 𖼠𖽕𖾐 𖼦𖽑𖽺𖾐 𖼞𖽑𖽶𖾐 𖼰𖽡𖽺𖾐 𖼺𖽺𖾑， 𖼣𖽙𖾐 𖼞𖽳𖾐 𖽃𖽔𖾑 𖼞𖽑𖽶𖾐 𖼞𖽜 𖼷𖽙𖾐 𖼮𖽻𖾐， 𖼦𖽑𖽺𖾑 𖼻𖽻𖾐 𖼂𖽺𖾐 𖼣𖽙𖾐 𖼊𖽑𖽺 𖼳𖽶𖾑 𖼐𖽦𖾐 𖼊𖽙𖾐， 𖼣𖽙𖾐 𖼄𖽶 𖼠𖽻𖾐 𖽃𖽔𖾑 𖼊𖽪 𖼀𖽑𖽪𖾐 𖼖𖽦𖾑 𖼺𖽺𖾑， 𖼄𖽢 𖼀𖽜𖾐 𖼖𖽪 𖼹𖽺𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜， 𖼀𖽻𖾐 𖼀𖽡𖾐 𖼮𖽻𖾐 𖼷𖽺 𖼷𖽺𖾐 𖼮𖽻𖾐 𖼦𖽑𖽺𖾑 𖼻𖽻𖾐 𖼮𖽻𖾐 𖼠𖽸𖾑 𖼐𖽺𖾑 𖼄𖽔 𖼠𖽸𖾑 𖼐𖽺𖾑？ ” 11 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼀𖽦𖾐：“𖼣𖽙𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼀𖽙𖾐 𖼀𖽶 𖼳𖽳𖾐 𖼊𖽑𖽺 𖼞𖽕 𖼊𖽑𖽧 𖼽𖽡𖾐 𖼺𖽺𖾑， 𖼽𖽻 𖼈𖽳𖾐 𖼞𖽜 𖼐𖽑𖽡𖾐 𖼈𖽳𖾐 𖼞𖽳𖾐 𖼖𖽚𖾑 𖼄𖽚 𖼊𖽑𖽺 𖼄𖽔 𖼦𖽹𖾑 𖼀𖽑𖽧𖾐 𖼊𖽻𖾐， 𖼐𖽑𖽡𖾐 𖼈𖽳𖾐 𖼞𖽳𖾐 𖼄𖽡𖾐 𖼮𖽑𖽙𖾐 𖼞𖽑𖽶𖾐 𖼺𖽳 𖼖𖽳 𖼊𖽻𖾐 𖼷𖽶𖾐 𖼞𖽜 𖼖𖽺𖾑， 𖼺𖽳 𖼄𖽙𖾐 𖼄𖽔 𖼄𖽡𖾐 𖼺𖽺 𖼹𖽦𖾐 𖼀𖽳𖾐 𖼹𖽺𖾐 𖼖𖽻𖾐 𖼄𖽔 𖼠𖽸𖾑 𖼊𖽻𖾐．” 12 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼀𖽦𖾐：“𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽙 𖼮𖽑𖽪𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼄𖽢 𖼮𖽻𖾐 𖼀𖽦𖾐 𖼊𖽻𖾐， 𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼄𖽡𖾐 𖼊𖽺𖾐 𖼷𖽑𖽜𖾑 𖼷𖽑𖽜𖾐 𖼞𖽜𖾐 𖼺𖽜𖾐 𖼄𖽡𖾐 𖼊𖽺𖾐 𖼀𖽑𖽢 𖼊𖽻𖾐． ”
𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼳𖽡𖽦 𖼈𖽳 𖼺𖽺𖾑 𖼦𖽑𖽳𖾐 𖼄𖽳𖾐
13 𖼽𖽺𖾐 𖼦𖽴 𖼦𖽫 𖼀𖽦𖾐：“𖼐𖽑𖽡𖾐 𖼈𖽳𖾐 𖼄𖽔 𖼠𖽕𖾐 𖼄𖽙𖾐 𖼣𖽙𖾐 𖼊𖽑𖽺 𖼀𖽑𖽧𖾐，
𖼐𖽑𖽡𖾐 𖼈𖽳𖾐 𖼀𖽦𖾐：‘ 𖼣𖽙𖾐 𖼈𖽳𖾐 𖽃𖽔 𖼊𖽺𖾑 𖼳𖽶 𖼊𖽻 𖼊𖽑𖽜𖾐 𖼐𖽑𖽡𖾐 𖼊𖽑𖽺 𖼮𖽑𖽡𖽺 𖼂𖽚𖾐 𖼐𖽺𖾑？ ’
14 𖼐𖽑𖽡𖾐 𖼈𖽳𖾐 𖼀𖽦𖾐：‘ 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼠𖽙𖾐 𖼳𖽙𖾐 𖼦𖽑𖽺𖾑 𖼠𖽻𖾐 𖼄𖽶𖾐 𖼖𖽡𖾐 𖼍𖽺𖾑 𖼣𖽻𖾐；𖼽𖽻 𖼄𖽪𖾑 𖼍𖽴𖾑 𖼊𖽑𖽺 𖼳𖽪𖾐， 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼷𖽳𖾑 𖼳𖽚𖾑 𖼄𖽙𖾐 𖼳𖽪𖾐， 𖼦𖽑𖽺𖾑 𖽃𖽔 𖼊𖽺𖾑 𖼳𖽶 𖼹𖽳𖾐 𖼞𖽳𖾐 𖼮𖽻𖾐 𖼐𖽺𖾑？ 15 𖽃𖽔𖾑 𖼄𖽳𖾐 𖽃𖽔 𖼐𖽺𖾑 𖼳𖽡𖽦 𖼈𖽳 𖼺𖽪𖾐 𖼷𖽑𖽻𖾐 𖼊𖽑𖽺 𖼄𖽢 𖼮𖽻𖾐 𖼐𖽺𖾐 𖼰𖽕𖾐， 𖼊𖽶𖾐 𖼄𖽡𖽻 𖼂𖽺𖾐 𖼺𖽪𖾐 𖼷𖽑𖽻𖾐 𖽂𖽙𖾐 𖼞𖽪𖾐 𖼹𖽪𖾐；𖼽𖽻 𖼈𖽳𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼮𖽕𖾐 𖼐𖽦𖾐 𖼊𖽑𖽻𖾐， 𖼦𖽑𖽔𖾐 𖼖𖽺𖾑 𖽂𖽙 𖼇𖽕 𖼳𖽶 𖼊𖽑𖽺 𖽂𖽙𖾐 𖼮𖽡𖽪 𖼊𖽴𖾑 𖼊𖽙𖾐． ’”
𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼮𖽡𖽮𖾐 𖼠𖽙𖾐 𖼳𖽙𖾐 𖼺𖽪𖾐 𖼷𖽑𖽻𖾐 𖼐𖽑𖽧𖾐 𖼮𖽡𖽻𖾐 𖽂𖽙𖾐 𖼊𖽻𖾐
16 𖼞𖽑𖽶𖾑 𖼮𖽶𖾐， 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽡𖽮𖾐 𖼠𖽙𖾐 𖼳𖽙𖾐 𖼺𖽪𖾐 𖼷𖽙𖾐 𖼖𖽙𖾐 𖼮𖽑𖽻𖾐 𖼊𖽑𖽜𖾐 𖼊𖽦 ， 𖼽𖽺𖾐 𖼦𖽴 𖼦𖽫 𖼹𖽳𖾐 𖼄𖽙𖾐 𖼽𖽻 𖼈𖽳𖾐 𖼞𖽑𖽙𖾐 𖼊𖽑𖽜𖾐 𖼺𖽪𖾐 𖼊𖽻 𖼊𖽑𖽺 𖼊𖽻 𖼐𖽙𖾐 𖼊𖽻𖾐， 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼄𖽡𖾐 𖼈𖽝 𖼍𖽴𖾑 𖼺𖽪𖾐 𖼺𖽪𖾑 𖼮𖽑𖽙𖾐 𖼮𖽻𖾐 𖼍𖽳𖾐， 𖼞𖽑𖽶𖾑 𖼽𖽻 𖼊𖽑𖽺 𖼮𖽡𖽮𖾐 𖼠𖽙𖾐 𖼳𖽙𖾐 𖼐𖽺𖾐 𖼽𖽻 𖼄𖽡𖾐 𖼊𖽑𖽺 𖼦𖽙𖾑 𖼮𖽑𖽡 𖼺𖽪𖾐 𖼷𖽑𖽻𖾐 𖼞𖽳𖾐 𖼄𖽡𖾐 𖼣𖽻𖾐．
17 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼀𖽦𖾐：“𖼣𖽙𖾐 𖼞𖽑𖽙𖾐 𖼍𖽧𖾑 𖼞𖽳𖾐 𖼐𖽑𖽡𖾐 𖼦𖽑𖽦， 𖼽𖽻 𖼈𖽳𖾐 𖼣𖽙𖾐 𖼞𖽳𖾐 𖼀𖽑𖽶 𖼊𖽴 𖼺𖽪𖾐 𖼷𖽑𖽻𖾐 𖼀𖽺 𖼂𖽺𖾐 𖼊𖽻𖾐， 𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼽𖽻 𖼈𖽳𖾐 𖼊𖽑𖽺 𖼐𖽑𖽧𖾐 𖼮𖽡𖽻𖾐 𖼊𖽻𖾐， 𖼞𖽑𖽶𖾑 𖼷𖽑𖽻𖾐 𖼽𖽻 𖼄𖽳𖾑 𖼊𖽑𖽺 𖼠𖽙𖾐 𖼳𖽙𖾐 𖼺𖽪𖾐 𖼻𖽙 𖼊𖽑𖽺 𖼐𖽑𖽧𖾐 𖼮𖽡𖽻𖾐 𖼖𖽙𖾐 𖼺𖽶𖾑． 18 𖼞𖽑𖽶𖾑 𖼮𖽶𖾐， 𖼐𖽑𖽡𖾐 𖼈𖽳𖾐 𖼹𖽦𖾑 𖼊𖽑𖽡 𖼂𖽦𖾑 𖼐𖽦𖾐 𖼊𖽚𖾐 𖼖𖽻𖾐 𖼊𖽙𖾐， 𖼷𖽑𖽻𖾐 𖼹𖽳𖾐 𖼐𖽺𖾐 𖼷𖽑𖽻𖾐 𖼊𖽶𖾐， 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼠𖽙𖾐 𖼳𖽙𖾐 𖼺𖽪𖾐 𖼷𖽑𖽻𖾐 𖼐𖽺𖾐 𖼄𖽔 𖼠𖽙𖾐 𖼳𖽙𖾐 𖼺𖽪𖾐 𖼷𖽑𖽻𖾐 𖼷𖽙𖾐 𖼖𖽙𖾐 𖼄𖽔 𖼺𖽶𖾑 𖼊𖽻𖾐．”