𖼍𖽡𖾐 𖼄𖽻 𖼄𖽳𖾐 𖼷𖽑𖽦𖾐 𖼊𖽑𖽺 𖼄𖽔 𖼳𖽪𖾐
2
1 𖼍𖽡𖾐 𖼄𖽻 𖽃𖽔𖾐! 𖼍𖽕𖾑 𖽂𖽚 𖼦𖽑𖽺𖾑 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼺𖽪𖾐 𖼄𖽪𖾑 𖼍𖽴𖾑 𖼊𖽻 𖼣𖽻𖾐． 2 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼀𖽦𖾐：“𖼐𖽑𖽡𖾐 𖼈𖽳𖾐 𖼣𖽙𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼄𖽔 𖼐𖽙𖾐， 𖼣𖽙𖾐 𖼊𖽻 𖼂𖽪𖾑 𖼀𖽑𖽨 𖼐𖽑𖽧𖾐 𖼄𖽙𖾐 𖼊𖽑𖽺 𖼄𖽔 𖼍𖽙𖾑， 𖼣𖽙𖾐 𖼄𖽡𖾐 𖼊𖽑𖽺 𖼄𖽔 𖼄𖽶 𖼳𖽳𖾐 𖼊𖽑𖽡𖾑 𖼣𖽻𖾐， 𖼣𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼮𖽙 𖼮𖽪𖾑 𖼊𖽻𖾐， 𖼐𖽑𖽡𖾐 𖼈𖽳𖾐 𖼄𖽢 𖼀𖽜𖾐 𖼄𖽔 𖽂𖽙𖾐， 𖼞𖽚 𖼀𖽑𖽚𖾐 𖼮𖽙 𖼄𖽳𖾐 𖼊𖽻𖾐， 𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼈𖽳𖾐 𖼣𖽙𖾐 𖼞𖽳𖾐 𖼄𖽪𖾑 𖼍𖽴𖾑 𖼊𖽻 𖼀𖽑𖽨 𖼐𖽑𖽧𖾐 𖼄𖽙𖾐 𖼞𖽑𖽶𖾐 𖼄𖽔 𖼰𖽡𖽺𖾐， 𖽃𖽔𖾐 𖼺𖽺𖾑 𖼣𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼮𖽙 𖼰𖽪𖾑 𖼍𖽳𖾐 𖼦𖽑𖽻𖾐． 3 𖼣𖽙𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼊𖽑𖽺 𖼦𖽑𖽳𖾐 𖼊𖽻𖾐， 𖼦𖽑𖽔𖾐 𖼖𖽺𖾑 𖼮𖽡𖽺 𖼳𖽡 𖼈𖽺𖾐 𖼐𖽑𖽡𖾐 𖼈𖽳𖾐 𖼮𖽑𖽻 𖼄𖽦𖾐 𖼊𖽑𖽺 𖼺𖽴𖾐 𖼊𖽻𖾐， 𖼞𖽑𖽶𖾑 𖼻𖽦 𖼐𖽑𖽡𖾐 𖼞𖽳𖾐 𖼍𖽡𖾐 𖼮𖽡𖽺 𖼳𖽡 𖼣𖽻𖾐， 𖼐𖽑𖽡𖾐 𖼈𖽳𖾐 𖼊𖽑𖽺 𖼺𖽙𖾐 𖼮𖽑𖽢𖾑 𖼈𖽦𖾑 𖼮𖽑𖽡 𖼂𖽜𖾐 𖼞𖽳𖾐 𖼍𖽙𖾑 𖼊𖽻𖾐．” 4 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼀𖽦𖾐：“𖽃𖽔𖾐 𖼺𖽺𖾑 𖼐𖽑𖽡𖾐 𖼈𖽳𖾐 𖼺𖽝𖾑 𖼊𖽻𖾐， 𖼣𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼦𖽑𖽺𖾑 𖼻𖽻𖾐 𖼄𖽪𖾑 𖼍𖽴𖾑 𖼺𖽪𖾐， 𖼦𖽑𖽺𖾑 𖼣𖽙𖾐 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼍𖽡𖾐 𖼄𖽻 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼄𖽳𖾐 𖼷𖽑𖽦𖾐 𖼺𖽪𖾐， 𖼞𖽑𖽶𖾑 𖼞𖽜 𖼻𖽳𖾐 𖼹𖽦𖾐 𖼮𖽻𖾐 𖼊𖽻𖾐 𖼖𖽙𖾐 𖼀𖽙𖾐 𖼳𖽶 𖼣𖽻𖾐．5 𖼣𖽙𖾐 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼄𖽳𖾐 𖼷𖽑𖽦𖾐 𖼺𖽪𖾐 𖼞𖽑𖽶𖾑 𖼈𖽪𖾑 𖼠𖽻𖾐 𖼐𖽺𖾐 𖼺𖽙𖾑 𖼺𖽙𖾐 𖼞𖽳𖾐 𖼄𖽳𖾐 𖼷𖽑𖽦𖾐 𖼣𖽻𖾐， 𖼦𖽑𖽔𖾐 𖼖𖽺𖾑 𖼦𖽑𖽺𖾑 𖼹𖽻𖾐 𖼖𖽪 𖼽𖽻 𖼈𖽳𖾐 𖼊𖽑𖽺 𖼞𖽜 𖼦𖽑𖽙𖾐． 𖼽𖽻 𖼈𖽳𖾐 𖼞𖽜 𖼣𖽙𖾐 𖼊𖽑𖽺 𖼮𖽡𖽮𖾐 𖼠𖽙𖾐 𖼳𖽙𖾐， 𖼦𖽑𖽔𖾐 𖼖𖽺𖾑 𖼣𖽙𖾐 𖼄𖽡𖾐 𖼊𖽑𖽺 𖼮𖽡𖽮𖾐 𖼷𖽑𖽚． 6 𖽃𖽙𖾑 𖼄𖽺 𖼊𖽑𖽙 𖼽𖽻 𖼈𖽳𖾐 𖼄𖽡 𖼞𖽑𖽪𖾐 𖼖𖽡 𖼮𖽨𖾐 𖼠𖽕𖾐 𖼰𖽶𖾐 𖼄𖽪𖾑 𖼍𖽴𖾑， 𖼽𖽻 𖼈𖽳𖾐 𖼄𖽡 𖼞𖽑𖽪𖾐 𖼞𖽑𖽶𖾐 𖼄𖽔 𖼹𖽳𖾐 𖼊𖽻 𖼄𖽔 𖼊𖽑𖽜𖾐；𖼽𖽻 𖼈𖽳𖾐 𖼐𖽑𖽧𖾐 𖼰𖽶𖾐 𖼐𖽑𖽧𖾐 𖼻𖽺𖾐 𖼣𖽙𖾐 𖼊𖽑𖽺 𖼊𖽻 𖼮𖽶𖾐 𖼮𖽻𖾑 𖼊𖽴 𖼺𖽺𖾑， 𖼷𖽑𖽻𖾐 𖼞𖽑𖽙 𖼄𖽙𖾐 𖼞𖽜 𖼖𖽺𖾑 𖼽𖽺𖾐 𖼮𖽑𖽡𖽪𖾑 𖼊𖽶𖾐 𖼮𖽑𖽪 𖼊𖽑𖽺 𖼰𖽡𖾑 𖼦𖽑𖽙𖾐， 𖼀𖽑𖽚𖾐 𖼣𖽙𖾐 𖼞𖽳𖾐 𖼖𖽻𖾐．”
7 𖼍𖽡𖾐 𖼄𖽻 𖼞𖽳𖾐 𖼄𖽡 𖼞𖽑𖽪𖾐 𖼞𖽑𖽶𖾐 𖼈𖽪𖾐 𖼺𖽝𖾑 𖼊𖽻 𖼊𖽑𖽜𖾐 𖼖𖽡𖾐， 𖼷𖽑𖽻𖾐 𖼞𖽜 𖼽𖽻 𖼄𖽡 𖼞𖽑𖽪𖾐 𖼮𖽑𖽻𖾐 𖼄𖽪𖾑 𖼍𖽴𖾑 𖼊𖽻 𖼷𖽶𖾐 𖽂𖽙𖾐 𖼖𖽡𖾐， 𖼞𖽪𖾐 𖼮𖽡𖽺𖾐 𖼽𖽻 𖼦𖽑𖽺𖾑 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼹𖽡𖾐 𖼖𖽦 𖼣𖽻𖾐． 8 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼀𖽦𖾐：“𖼐𖽑𖽡𖾐 𖼈𖽳𖾐 𖼮𖽨𖾐 𖼄𖽙𖾐 𖼰𖽶𖾐 𖼊𖽑𖽺 𖼰𖽡𖾑 𖼦𖽑𖽙𖾐 𖼦𖽑𖽻𖾐， 𖼷𖽑𖽻𖾐 𖼞𖽑𖽙 𖼄𖽙𖾐 𖼞𖽜 𖼖𖽺𖾑 𖼳𖽪𖾐 𖼮𖽨𖾐 𖼊𖽑𖽺 𖼮𖽑𖽻𖾐 𖼮𖽴𖾐 𖼀𖽜． 𖼦𖽑𖽔𖾐 𖼖𖽺𖾑 𖼐𖽑𖽡𖾐 𖼈𖽳𖾐 𖼞𖽑𖽻𖾑 𖼣𖽙𖾐 𖼖𖽡𖾑 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼍𖽡𖾐 𖼄𖽻 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼺𖽪𖾐 𖼞𖽑𖽶𖾑 𖼊𖽑𖽺 𖼖𖽺𖾐 𖼈𖽳𖾑 𖼦𖽑𖽻𖾐． 9 𖼐𖽑𖽡𖾐 𖼈𖽳𖾐 𖼣𖽙𖾐 𖼞𖽳𖾐 𖼄𖽪𖾑 𖼊𖽻 𖼊𖽑𖽺 𖼄𖽔 𖼳𖽪𖾐， 𖼹𖽦𖾑 𖼷𖽑𖽻𖾐 𖼮𖽑𖽻 𖼄𖽦𖾐 𖼖𖽙𖾐 𖼐𖽦𖾐 𖼺𖽺𖾑， 𖼣𖽙𖾐 𖼞𖽳𖾐 𖼳𖽪𖾐 𖼮𖽨𖾐 𖼖𖽙𖾐 𖼄𖽔 𖼮𖽑𖽻𖾐． 𖽃𖽔𖾐 𖼺𖽺𖾑， 𖼣𖽙𖾐 𖼐𖽑𖽡𖾐 𖼈𖽳𖾐 𖼞𖽜 𖼷𖽑𖽻𖾐 𖼷𖽪𖾐 𖽃𖽙𖾑 𖼄𖽺 𖼮𖽑𖽡𖽺 𖼳𖽡𖽦𖾑 𖼍𖽻𖾐 𖼷𖽶𖾐， 𖼺𖽙𖾐 𖼮𖽑𖽢𖾑 𖼐𖽦𖾐 𖼄𖽔 𖼍𖽪𖾐．”
𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼐𖽑𖽧𖾐 𖼄𖽔 𖼻𖽺𖾐 𖼄𖽡𖽻 𖼂𖽺𖾐
10 𖽃𖽔 𖼐𖽺𖾑 𖽃𖽔 𖼀𖽙 𖼊𖽑𖽡 𖼽𖽚𖾐 𖼍𖽺𖾑 𖼄𖽔 𖼣𖽻𖾐 𖼖𖽔？ 𖽃𖽔 𖼐𖽺𖾑 𖼊𖽑𖽺 𖼹𖽸𖾑 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽡 𖼽𖽚𖾐 𖼍𖽺𖾑 𖼄𖽔 𖼣𖽻𖾐 𖼖𖽔？ 𖽃𖽔𖾐 𖼹𖽻𖾐 𖼞𖽑𖽻𖾑 𖽂𖽙 𖼺𖽙𖾐 𖼂𖽙𖾐 𖽃𖽔 𖼐𖽺𖾑 𖼞𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼄𖽳𖾐 𖼷𖽑𖽦𖾐 𖼦𖽑𖽙𖾐 𖼺𖽪𖾐 𖼞𖽑𖽶𖾑 𖼊𖽑𖽺 𖼐𖽑𖽧𖾐 𖼣𖽡𖽳𖾐 𖼺𖽺𖾑， 𖼽𖽻 𖼄𖽳𖾑 𖼈𖽧 𖼐𖽑𖽳𖾐 𖼊𖽑𖽺 𖼇𖽪 𖼐𖽺𖾑？
11 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼇𖽪 𖼄𖽡𖽻 𖼂𖽺𖾐， 𖼽𖽡 𖼺𖽴𖾑 𖼖𖽡𖽦𖾑 𖼄𖽡𖾐 𖼊𖽺𖾐 𖼐𖽺𖾐 𖼽𖽺𖾐 𖼖𖽪𖾑 𖼺𖽔 𖼖𖽜 𖼖𖽪𖾐 𖼞𖽑𖽶𖾐 𖼐𖽑𖽧𖾐 𖼀𖽜𖾐 𖼄𖽡𖽻 𖼂𖽺𖾐． 𖼞𖽪𖾐 𖼮𖽡𖽺𖾐 𖼽𖽚 𖼍𖽕𖾑 𖼺𖽪𖾐 𖼷𖽑𖽻𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽜 𖼖𖽕𖾑 𖼊𖽑𖽕𖾐 𖼦𖽑𖽻𖾐， 𖼠𖽳𖾐 𖼖𖽪𖾐 𖼺𖽡𖾐 𖼍𖽡𖾐 𖼺𖽪𖾐 𖼞𖽑𖽻𖾐 𖼂𖽻𖾑 𖼀𖽑𖽙 𖼞𖽳𖾐 𖼻𖽙 𖼄𖽳 𖼹𖽶𖾐 𖼄𖽳 𖼻𖽙 𖼰𖽕𖾐． 12 𖼦𖽑𖽺𖾑 𖼳𖽶 𖼄𖽡𖽻 𖼂𖽺𖾐 𖼺𖽪𖾐 𖼻𖽙 𖼐𖽜𖾐， 𖼽𖽻 𖼷𖽺𖾐 𖼽𖽻 𖼂𖽺𖾐 𖼣𖽻𖾐 𖼦𖽻， 𖼺𖽙𖾐 𖼖𖽙𖾐 𖼮𖽻𖾑 𖼊𖽴 𖼺𖽺𖾑 𖼂𖽺𖾐 𖼣𖽻𖾐 𖼦𖽻， 𖼍𖽡𖾐 𖼊𖽪𖾐 𖼦𖽑𖽙𖾐 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜 𖼀𖽦𖾐 𖼖𖽺𖾑， 𖼽𖽺𖾐 𖼦𖽴 𖼦𖽫 𖼷𖽑𖽜𖾑 𖼷𖽑𖽜𖾐 𖼽𖽔 𖼠𖽴𖾑 𖼈𖽴 𖼠𖽻𖾐 𖼊𖽑𖽺 𖼮𖽑𖽻𖾐 𖼽𖽻 𖼊𖽑𖽺 𖼞𖽕 𖼊𖽑𖽧 𖼦𖽑𖽙𖾐 𖼊𖽻𖾐 \fr 2．12 \ft “𖼽𖽺𖾐 𖼦𖽴 𖼦𖽫．．．．．．𖼞𖽕 𖼊𖽑𖽧 𖼦𖽑𖽙𖾐 𖼊𖽻𖾐 ” 𖼦𖽑𖽺𖾑 𖼊𖽑𖽡 𖼮𖽑𖽡𖽺 𖼊𖽑𖽺 “𖼽𖽺𖾐 𖼦𖽴 𖼦𖽫 𖼷𖽑𖽜𖾑 𖼷𖽑𖽜𖾐 𖼽𖽔 𖼠𖽴𖾑 𖼈𖽴 𖼠𖽻𖾐 𖼊𖽑𖽺 𖼮𖽑𖽻𖾐 𖼽𖽻 𖼊𖽑𖽺 𖼄𖽳 𖼮𖽡𖽦 𖼦𖽑𖽙𖾐 𖼊𖽻𖾐 ” 𖼖𖽺𖾑 𖼀𖽑𖽚𖾐 𖼊𖽙𖾐．．
13 𖼐𖽑𖽡𖾐 𖼈𖽳𖾐 𖼦𖽑𖽔𖾐 𖼖𖽺𖾑 𖼠𖽳𖾐 𖼖𖽪𖾐 𖼄𖽡𖽻 𖼦𖽑𖽺𖾑 𖼳𖽶 𖼂𖽺𖾐： 𖼐𖽑𖽡𖾐 𖼈𖽳𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼍𖽡𖾐 𖼷𖽻𖾐 𖼞𖽜 𖼄𖽦𖾐 𖼀𖽧𖾐 𖼐𖽺𖾐 𖼷𖽳𖾑 𖼮𖽑𖽡𖽪 𖼀𖽡𖾐 𖼦𖽑𖽻𖾐， 𖼞𖽪𖾐 𖼮𖽡𖽺𖾐 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼈𖽳𖾐 𖼞𖽳𖾐 𖼍𖽡𖾐 𖼍𖽪𖾐 𖼊𖽑𖽺 𖼄𖽔 𖼐𖽦𖾐， 𖼽𖽻 𖼖𖽺𖾑 𖼐𖽑𖽡𖾐 𖼈𖽳𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼷𖽶𖾐 𖼄𖽔 𖼦𖽶𖾐 𖼊𖽻𖾐． 14 𖼐𖽑𖽡𖾐 𖼈𖽳𖾐 𖼦𖽑𖽔𖾐 𖼖𖽺𖾑 𖼀𖽦𖾐：“𖽃𖽔𖾐 𖼹𖽻𖾐 𖼞𖽪𖾐 𖼮𖽡𖽺𖾐 𖼣𖽻𖾐 𖼐𖽺𖾑？” 𖼞𖽪𖾐 𖼮𖽡𖽺𖾐 𖼽𖽺𖾐 𖼦𖽴 𖼦𖽫 𖼞𖽑𖽻𖾑 𖼐𖽑𖽡𖾐 𖼐𖽺𖾐 𖼐𖽑𖽡𖾐 𖼽𖽳𖾐 𖼊𖽑𖽙 𖼞𖽑𖽶𖾑 𖼮𖽶𖾐 𖼞𖽑𖽙𖾐 𖼹𖽶𖾐 𖼺𖽪𖾐 𖼄𖽳 𖼻𖽙 𖼠𖽻𖾐 𖼊𖽑𖽺 𖼮𖽨 𖼄𖽡𖽻𖾐 𖼂𖽺𖾐 𖼊𖽻𖾐， 𖼽𖽻 𖼦𖽑𖽺𖾑 𖼐𖽑𖽡𖾐 𖼮𖽑𖽻 𖼂𖽦𖾐 𖼣𖽻𖾐， 𖼐𖽑𖽡𖾐 𖼄𖽳𖾐 𖼷𖽑𖽦𖾐 𖼦𖽑𖽙𖾐 𖼺𖽪𖾐 𖼄𖽳 𖼻𖽙 𖼣𖽻𖾐， 𖼦𖽑𖽻𖾐 𖼊𖽑𖽻𖾐 𖼐𖽑𖽡𖾐 𖼽𖽻 𖼊𖽑𖽺 𖼐𖽑𖽧𖾐 𖼄𖽔 𖼻𖽺𖾐．
15 𖼐𖽑𖽧𖾐 𖼹𖽳𖾐 𖼐𖽑𖽧𖾐 𖼻𖽺𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽡 𖼽𖽚𖾐， 𖼽𖽻 𖼦𖽑𖽺𖾑 𖼻𖽻𖾐 𖼂𖽺𖾐 𖼄𖽔 𖼠𖽸𖾑． 𖼽𖽻 𖽃𖽔 𖼊𖽺𖾑 𖼻𖽻𖾐 𖼂𖽺𖾐 𖼠𖽸𖾑 𖼐𖽺𖾑？ 𖼽𖽻 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼊𖽻 𖼮𖽶𖾐 𖼻𖽺𖾐 𖼺𖽪𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼦𖽑𖽨𖾐 𖼊𖽻𖾐， 𖽃𖽔𖾐 𖼺𖽺𖾑 𖼐𖽑𖽡𖾐 𖼈𖽳𖾐 𖼐𖽑𖽧𖾐 𖼹𖽳𖾐 𖼐𖽑𖽧𖾐 𖼻𖽺𖾐 𖼖𖽡𖾐， 𖼐𖽑𖽡𖾐 𖼽𖽳𖾐 𖼊𖽑𖽙 𖼞𖽑𖽶𖾑 𖼮𖽶𖾐 𖼹𖽶𖾐 𖼺𖽪𖾐 𖼄𖽳 𖼻𖽙 𖼊𖽑𖽺 𖼐𖽑𖽧𖾐 𖼻𖽺𖾐 𖼖𖽡𖾐． 16 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼀𖽦𖾐：“𖼄𖽳 𖼻𖽙 𖼊𖽑𖽺 𖼄𖽔 𖼖𖽡𖾐 𖼦𖽑𖽙𖾐 𖼺𖽪𖾐 𖼐𖽺𖾐 𖼄𖽳 𖼻𖽙 𖼊𖽑𖽺 𖼄𖽔 𖼮𖽨 𖼺𖽪𖾐 𖼷𖽑𖽻𖾐， 𖼞𖽑𖽶𖾑 𖼣𖽙𖾐 𖼦𖽶𖾑 𖼺𖽪𖾐 𖼣𖽻𖾐． 𖽃𖽔𖾐 𖼺𖽺𖾑 𖼐𖽑𖽡𖾐 𖼈𖽳𖾐 𖼐𖽑𖽧𖾐 𖼹𖽳𖾐 𖼐𖽑𖽧𖾐 𖼻𖽺𖾐 𖼖𖽡𖾐， 𖼽𖽻 𖼄𖽳𖾑 𖼄𖽳 𖼻𖽙 𖼊𖽑𖽺 𖼇𖽪 𖼄𖽔 𖼊𖽙𖾐．
17 𖼐𖽑𖽡𖾐 𖼈𖽳𖾐 𖼊𖽻 𖼂𖽪𖾑 𖼊𖽑𖽜𖾐 𖼽𖽺𖾐 𖼦𖽴 𖼦𖽫 𖼞𖽜 𖼐𖽑𖽧𖾐 𖼀𖽜𖾐，
𖼐𖽑𖽡𖾐 𖼈𖽳𖾐 𖼦𖽑𖽔𖾐 𖼖𖽺𖾑 𖼀𖽦𖾐：‘ 𖼣𖽙𖾐 𖼈𖽳𖾐 𖽃𖽔 𖼊𖽺𖾐 𖼽𖽻 𖼞𖽜 𖼐𖽑𖽧𖾐 𖼀𖽜𖾐 𖼺𖽪𖾐 𖼣𖽻𖾐 𖼐𖽺𖾑？𖽑
𖼞𖽪𖾐 𖼮𖽡𖽺𖾐 𖼐𖽑𖽡𖾐 𖼈𖽳𖾐 𖼀𖽦𖾐：‘ 𖼊𖽶𖾐 𖼄𖽡𖽻 𖼂𖽺𖾐 𖼺𖽪𖾐， 𖼽𖽺𖾐 𖼦𖽴 𖼦𖽫 𖼽𖽻 𖼈𖽳𖾐 𖼊𖽑𖽺 𖼹𖽳𖾐 𖼰𖽕𖾐， 𖼽𖽻 𖼦𖽑𖽔𖾐 𖼖𖽺𖾑 𖼽𖽻 𖼈𖽳𖾐 𖼊𖽑𖽺 𖼐𖽑𖽧𖾐 𖼺𖽳．’ 𖼹𖽦𖾑 𖼀𖽦𖾐：‘ 𖼀𖽳𖾐 𖼈𖽡𖾐 𖼮𖽻𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖽃𖽔 𖼊𖽻𖾑 𖼠𖽻𖾐 𖼮𖽻𖾐 𖼺𖽺？𖽑 ”