𖼦𖽔𖾐 𖼠𖽺𖾐 𖼺𖽪𖾑 1

𖼦𖽔𖾐 𖼠𖽺𖾐 𖼺𖽪𖾑

𖼷𖽑𖽻𖾐 𖼀𖽺 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼍𖽻𖾐 𖼞𖽙𖾐 𖼖𖽙𖾐 𖼀𖽙𖾐 𖼦𖽑𖽳𖾐 𖼄𖽳𖾐

1 𖼍𖽕𖾑 𖼖𖽡𖾑 𖼈𖽪𖾐 \fr 1．1 \ft “𖼍𖽕𖾑 𖼖𖽡𖾑 𖼈𖽪𖾐 ” 𖼦𖽑𖽺𖾑 “𖼍𖽕𖾑 𖼖𖽡𖽚 𖼳𖽸𖾑 ” 𖼣𖽻𖾐． 𖼈𖽪𖾐 𖼍𖽦 𖼂𖽺𖾐 𖼐𖽑𖽡 𖼞𖽑𖽚 𖼞𖽑𖽶𖾑 𖼞𖽑𖽚 𖼞𖽳𖾐 𖼮𖽑𖽡𖽚 𖼳𖽨𖾐 𖼊𖽦𖾐 𖼊𖽑𖽡， 𖼽𖽺𖾐 𖼦𖽴 𖼦𖽫 𖼞𖽑𖽻𖾑 𖼺𖽡 𖼻𖽙 𖼦𖽔𖾐 𖼠𖽺𖾐 𖼊𖽑𖽺 𖼄𖽪𖾑 𖼍𖽴𖾑 𖼺𖽺𖾑， 𖼽𖽻 𖼞𖽜 𖼺𖽔 𖼖𖽔𖾐 𖼊𖽑𖽡𖽦 𖼞𖽳𖾐 𖼻𖽙 𖼺𖽙 𖼖𖽚 𖼂𖽔𖾐 𖼂𖽚 𖼷𖽶 𖼄𖽻 𖼈𖽳 𖼐𖽺𖾐 𖼽𖽱𖾐 𖼺𖽕𖾑 𖼍𖽕 𖼞𖽳𖾐 𖼻𖽙 𖼽𖽺𖾐 𖼳𖽪𖾐 𖼽𖽕𖾑 𖼍𖽡𖾐 𖼄𖽻 𖼈𖽳 𖼖𖽙𖾐 𖼀𖽦𖾐：

2 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼻𖽻𖾐 𖼀𖽦𖾐：‘ 𖼷𖽑𖽻𖾐 𖼀𖽺 𖼦𖽑𖽺𖾑 𖼹𖽻𖾐 𖼀𖽦𖾐， 𖼽𖽺𖾐 𖼦𖽴 𖼦𖽫 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼂𖽚𖾐 𖼐𖽑𖽡𖾐 𖼦𖽑𖽦 𖼄𖽔 𖼮𖽑𖽡𖾐 𖼺𖽺．’”

3 𖽃𖽔𖾐 𖼺𖽺𖾑， 𖼽𖽺𖾐 𖼦𖽴 𖼦𖽫 𖼞𖽑𖽻𖾑 𖼺𖽡𖾐 𖼻𖽙 𖼦𖽔𖾐 𖼠𖽺𖾐 𖼖𖽙𖾐 𖼀𖽦𖾐： 4 𖼺𖽡 𖼮𖽡𖾐 𖼦𖽑𖽺𖾐 𖼞𖽜 𖼦𖽑𖽔𖾐 𖼖𖽺𖾑 𖼄𖽡𖾐 𖼮𖽡𖽦𖾐 𖼀𖽑𖽢， 𖼐𖽑𖽡𖾐 𖼈𖽳𖾐 𖼞𖽚 𖼀𖽑𖽚𖾐 𖼺𖽧𖾐 𖼀𖽑𖽡 𖼻𖽜 𖼞𖽪𖾐 𖼹𖽳𖾐 𖼺𖽪𖾐 𖼞𖽑𖽶𖾑 𖼳𖽶 𖼦𖽑𖽺𖾐 𖼞𖽑𖽶𖾐 𖼮𖽻𖾐 𖼖𖽔𖾑？ 5 𖽃𖽔𖾑 𖼄𖽳𖾐 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼻𖽻𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼽𖽻 𖼄𖽳𖾑 𖼞𖽑𖽙𖾐 𖼂𖽺𖾐 𖼺𖽪𖾐 𖼊𖽑𖽺 𖼊𖽑𖽡 𖼠𖽙𖾐 𖼣𖽝 𖼐𖽦𖾐 𖼖𖽡𖾐． 6 𖼐𖽑𖽡𖾐 𖼈𖽳𖾐 𖼳𖽶𖾑 𖼄𖽙𖾐 𖼊𖽻 𖼹𖽺𖾐 𖼺𖽪𖾐 𖼄𖽨 𖼊𖽑𖽻𖾐， 𖼠𖽜𖾐 𖽂𖽙𖾐 𖼺𖽪𖾐 𖼣𖽻𖾐 𖼐𖽑𖽡𖽪𖾑；𖼐𖽑𖽡𖾐 𖼈𖽳𖾐 𖼷𖽙 𖼊𖽑𖽻𖾐， 𖼄𖽔 𖽂𖽙𖾐 𖼷𖽙 𖼀𖽚𖾐；𖼐𖽑𖽡𖾐 𖼈𖽳𖾐 𖼊𖽻𖾐 𖼊𖽑𖽻𖾐， 𖼄𖽔 𖽂𖽙𖾐 𖼊𖽻𖾐 𖼀𖽚𖾐；𖼀𖽑𖽡𖽻𖾐 𖼷𖽑𖽶 𖼈𖽦 𖼊𖽑𖽻𖾐， 𖼖𖽡𖾐 𖼄𖽔 𖼄𖽜𖾑；𖽂𖽙 𖼀𖽑𖽶 𖼄𖽪𖾐 𖽂𖽙𖾐 𖼊𖽑𖽻𖾐， 𖼀𖽑𖽨 𖼮𖽑𖽡𖽦 𖼦𖽑𖽙𖾐 𖼺𖽪𖾐 𖼰𖽡𖽺𖾐 𖼊𖽪𖾐 𖼞𖽑𖽶𖾐 𖼰𖽡𖽺𖾐 𖼖𖽙𖾐 𖼺𖽶𖾑 𖼮𖽻𖾐．

𖼷𖽑𖽻𖾐 𖼀𖽺 𖼊𖽑𖽺 𖼞𖽑𖽜𖾑 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐

7 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼻𖽻𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼽𖽻 𖼄𖽳𖾑 𖼞𖽑𖽙𖾐 𖼂𖽺𖾐 𖼺𖽪𖾐 𖼊𖽑𖽺 𖼊𖽑𖽡 𖼠𖽙𖾐 𖼣𖽝 𖼐𖽦𖾐 𖼖𖽡𖾐． 8 𖼐𖽑𖽡𖾐 𖼈𖽳𖾐 𖽂𖽙 𖼰𖽡𖽺𖾐 𖼊𖽑𖽺 𖼻𖽶𖾐 𖼊𖽙𖾐 𖼊𖽑𖽝 𖼽𖽡𖾐， 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼖𖽡𖾐， 𖽃𖽔𖾐 𖼺𖽺𖾑 𖼣𖽙𖾐 𖼦𖽑𖽺𖾑 𖼖𖽙𖾐 𖼀𖽙𖾐 𖼖𖽺𖾑 𖽂𖽙𖾐， 𖼦𖽑𖽔𖾐 𖼖𖽺𖾑 𖼄𖽶 𖼳𖽳𖾐 𖽂𖽙𖾐 𖼊𖽻𖾐．” 9 𖼽𖽺𖾐 𖼦𖽴 𖼦𖽫 𖼀𖽦𖾐：“𖼐𖽑𖽡𖾐 𖼈𖽳𖾐 𖼄𖽨 𖼄𖽨 𖼠𖽜𖾐 𖽂𖽙𖾐 𖼊𖽡 𖼮𖽑𖽻 𖼊𖽑𖽻𖾐， 𖼞𖽚 𖼀𖽑𖽚𖾐 𖼣𖽻𖾐 𖼐𖽑𖽡𖽪𖾑 𖼍𖽺𖾑 𖼠𖽜𖾐 𖽂𖽙𖾐；𖼐𖽑𖽡𖾐 𖼈𖽳𖾐 𖼠𖽜𖾐 𖽃𖽔𖾑 𖼞𖽑𖽶𖾐 𖼞𖽚 𖼖𖽻𖾐 𖼺𖽪𖾐 𖼖𖽺𖾑 𖽃𖽔𖾑 𖼄𖽶 𖼳𖽡𖽺𖾐 𖼮𖽑𖽢𖾑 𖼮𖽝 𖼦𖽑𖽙𖾐 𖼊𖽻𖾐．” 𖽃𖽔𖾐 𖼹𖽻𖾐 𖼦𖽑𖽺𖾑 𖼻𖽻𖾐 𖼮𖽻𖾐 𖼐𖽺𖾑？ 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼀𖽦𖾐： “𖼞𖽪𖾐 𖼮𖽡𖽺𖾐 𖼣𖽙𖾐 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽜 𖼄𖽡𖾐 𖼮𖽡𖽦𖾐 𖼀𖽑𖽢， 𖼐𖽑𖽡𖾐 𖼈𖽳𖾐 𖼞𖽚 𖼀𖽑𖽚𖾐 𖼽𖽻 𖼄𖽳𖾑 𖼖𖽙𖾐 𖼀𖽙𖾐 𖼺𖽧𖾐 𖼀𖽑𖽡 𖼻𖽜 𖼞𖽪𖾐 𖼹𖽳𖾐 𖼺𖽪𖾐 𖼞𖽑𖽶𖾑 𖼳𖽶 𖼦𖽑𖽺𖾐 𖼍𖽡𖾐 𖼮𖽻𖾐．’ ” 10 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑， 𖼐𖽑𖽡𖾐 𖼈𖽳𖾐 𖼖𖽙𖾐 𖼀𖽙𖾐 𖼄𖽶 𖼠𖽻𖾐 𖼰𖽶𖾑 𖼈𖽡𖾐 𖼄𖽔 𖼊𖽻 𖼹𖽺𖾐， 𖼄𖽡𖾐 𖼠𖽻𖾐 𖼖𖽚𖾑 𖼄𖽚 𖼄𖽔 𖼊𖽚𖾐， 11 𖼣𖽙𖾐 𖼄𖽡𖾑 𖼐𖽦𖾐、 𖽂𖽙 𖼰𖽡𖽺𖾐、 𖼷𖽙𖾐 𖼺𖽳、 𖼮𖽶𖾐 𖼀𖽳、 𖼵𖽶𖾐 𖼈𖽡𖾐、 𖼖𖽚𖾑 𖼄𖽚、 𖼷𖽑𖽻𖾐 𖼀𖽺、 𖼮𖽡𖽺 𖼐𖽺𖾐 𖼞𖽑𖽙𖾐 𖼄𖽪𖾐 𖽂𖽙𖾐 𖼺𖽪𖾐， 𖼄𖽳𖾑 𖼄𖽳𖾐 𖼞𖽜 𖽃𖽔𖾑 𖼄𖽶 𖼦𖽡𖽳𖾐 𖼈𖽪𖾑 𖼞𖽑𖽙 𖼷𖽶𖾐 𖼄𖽳𖾐 𖼳𖽶 𖼣𖽻𖾐．

𖼊𖽡 𖼮𖽑𖽻 𖼀𖽑𖽚𖾐 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐

12 𖼞𖽑𖽶𖾑 𖼮𖽶𖾐， 𖼺𖽔 𖼖𖽔𖾐 𖼊𖽑𖽡𖽦 𖼞𖽳𖾐 𖼻𖽙 𖼺𖽙 𖼖𖽚 𖼂𖽔𖾐 𖼂𖽚 ， 𖼽𖽱𖾐 𖼺𖽕𖾑 𖼍𖽕 𖼞𖽳𖾐 𖼻𖽙 𖼽𖽺𖾐 𖼳𖽪𖾐 𖼽𖽕𖾑 𖼍𖽡𖾐 𖼄𖽻 𖼈𖽳 𖼐𖽺𖾐 𖼷𖽺 𖼷𖽺𖾐 𖼺𖽪𖾐 𖼷𖽑𖽻𖾐 𖼀𖽺， 𖼄𖽳𖾑 𖼄𖽳 𖼽𖽻 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐， 𖼞𖽑𖽶𖾑 𖼽𖽺𖾐 𖼦𖽴 𖼦𖽫 𖼞𖽳𖾐 𖼺𖽡𖾐 𖼻𖽙 𖼦𖽔𖾐 𖼠𖽺𖾐 𖼞𖽑𖽙𖾐 𖼊𖽑𖽜𖾐 𖼺𖽪𖾐 𖼊𖽻 𖼂𖽪𖾑 𖼣𖽻𖾐． 𖽃𖽔𖾐 𖼺𖽺𖾑， 𖼷𖽑𖽻𖾐 𖼀𖽺 𖼄𖽳𖾑 𖼄𖽳 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽡𖽮𖾐 𖼠𖽙𖾐 𖼳𖽙𖾐． 13 𖼽𖽺𖾐 𖼦𖽴 𖼦𖽫 𖼞𖽳𖾐 𖼹𖽡𖾐 𖼖𖽦 𖼦𖽔𖾐 𖼠𖽺𖾐 ， 𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼺𖽺𖾑， 𖼷𖽑𖽻𖾐 𖼀𖽺 𖼖𖽙𖾐 𖼀𖽦𖾐 𖼊𖽑𖽧：“𖼽𖽺𖾐 𖼦𖽴 𖼦𖽫 𖼀𖽦𖾐：‘ 𖼣𖽙𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼮𖽻𖾐．’ ”

14 𖽃𖽔𖾐 𖼺𖽺𖾑， 𖼽𖽺𖾐 𖼦𖽴 𖼦𖽫 𖼞𖽑𖽻𖾑 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼠𖽕 𖼺𖽪𖾐 𖼺𖽔 𖼖𖽔𖾐 𖼊𖽑𖽡𖽦 𖼞𖽳𖾐 𖼻𖽙 𖼺𖽙 𖼖𖽚 𖼂𖽔𖾐 𖼀𖽚 𖼷𖽶 𖼄𖽻 𖼈𖽳， 𖼽𖽱𖾐 𖼺𖽕𖾑 𖼍𖽕 𖼞𖽳𖾐 𖼻𖽙 𖼽𖽺𖾐 𖼳𖽪𖾐 𖼽𖽕𖾑 𖼍𖽡𖾐 𖼄𖽻 𖼈𖽳 𖼐𖽺𖾐 𖼷𖽺 𖼷𖽺𖾐 𖼺𖽪𖾐 𖼷𖽑𖽻𖾐 𖼀𖽺 𖼊𖽑𖽺 𖼐𖽑𖽧𖾐 𖼄𖽙𖾐 𖼞𖽕 𖼍𖽪𖾐 𖼺𖽺𖾑， 𖼽𖽻 𖼈𖽳𖾐 𖼖𖽻𖾐 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫， 𖼽𖽻 𖼈𖽳𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐． 15 𖼄𖽡𖽻 𖼦𖽑𖽺𖾑 𖼍𖽕𖾑 𖼖𖽡𖾑 𖼈𖽪𖾐 𖼈𖽪𖾐 𖼍𖽦 𖼂𖽺𖾐 𖼐𖽑𖽡 𖼞𖽑𖽚 𖼞𖽑𖽶𖾑 𖼞𖽑𖽚 𖼞𖽳𖾐 𖼮𖽑𖽡𖽚 𖼳𖽨𖾐 𖼐𖽑𖽡 𖼷𖽑𖽡𖾐 𖼖𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼊𖽚𖾐 𖼺𖽪𖾐 𖼣𖽻𖾐．