𖼄𖽔 𖼖𖽔𖾐 𖼰𖽡𖾐 𖼺𖽪𖾑
1
1 𖼍𖽕𖾑 𖽂𖽚 𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼄𖽔 𖼖𖽔𖾐 𖼰𖽡𖾐 𖼞𖽜 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼄𖽪𖾑 𖼍𖽴𖾑 𖼞𖽳𖾐 𖼊𖽻 𖼂𖽪𖾑 𖼣𖽻𖾐．𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼺𖽡 𖼀𖽑𖽙 𖼮𖽡 𖼽𖽡𖾑 𖼄𖽔 𖼦𖽙𖾑 𖼮𖽑𖽡
2 𖼽𖽺𖾐 𖼦𖽴 𖼦𖽫 𖼀𖽦𖾐：“𖼣𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼐𖽙𖾑 𖼣𖽜．”
𖼦𖽑𖽻𖾐 𖼊𖽑𖽻𖾐 𖼐𖽑𖽡𖾐 𖼈𖽳𖾐 𖼀𖽦𖾐：“𖼐𖽑𖽡𖾐 𖽃𖽔 𖼊𖽺𖾐 𖼣𖽙𖾐 𖼈𖽳𖾐 𖼊𖽑𖽺 𖼐𖽙𖾑 𖼣𖽜 𖼺𖽪𖾐 𖼣𖽻𖾐？”
𖼽𖽺𖾐 𖼦𖽴 𖼦𖽫 𖼀𖽦𖾐：“𖼽𖽡 𖼺𖽻 𖼞𖽑𖽶𖾑 𖼽𖽔 𖼠𖽴𖾑 𖼽𖽻 𖼍𖽕𖾑 𖼄𖽔 𖼣𖽻𖾐 𖼖𖽔𖾑？ 𖼣𖽙𖾐 𖼽𖽔 𖼠𖽴𖾑 𖼊𖽑𖽺 𖼐𖽙𖾑 𖼣𖽜， 𖼽𖽡 𖼺𖽻 𖼊𖽑𖽺 𖼦𖽶𖾑． 3 𖼣𖽙𖾐 𖼽𖽡 𖼺𖽻 𖼞𖽳𖾐 𖼄𖽡𖾐 𖼊𖽺𖾐 𖼞𖽜 𖼄𖽡𖾐 𖼳𖽡𖽻𖾐 𖼀𖽑𖽢， 𖼽𖽻 𖼞𖽳𖾐 𖼄𖽡𖾐 𖼳𖽡𖽪 𖼀𖽑𖽨 𖼺𖽺𖾑， 𖼄𖽡𖾐 𖼳𖽡𖽻𖾐 𖼞𖽳𖾐 𖼐𖽑𖽡𖾑 𖼍𖽳𖾐 𖼖𖽳𖾐 𖼊𖽑𖽺 𖼞𖽜．”
4 𖼽𖽡 𖼍𖽙𖾐 𖼺𖽪𖾐 𖼷𖽑𖽻𖾐 𖼀𖽦𖾐：“𖼣𖽙𖾐 𖼈𖽳𖾐 𖼀𖽑𖽧𖾐 𖼦𖽑𖽙𖾐 𖼞𖽳𖾐 𖼄𖽡𖽻 𖼊𖽑𖽺 𖼷𖽶𖾐 𖼄𖽳𖾐 𖼊𖽑𖽻𖾐， 𖼹𖽦𖾑 𖼀𖽑𖽧𖾐 𖼦𖽑𖽙𖾐 𖼊𖽪 𖼞𖽳𖾐 𖼮𖽑𖽻𖾐 𖼍𖽡𖾐 𖼂𖽚𖾐 𖼊𖽻𖾐．”
𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼻𖽻𖾐 𖼀𖽦𖾐：“𖼽𖽻 𖼈𖽳𖾐 𖽃𖽔 𖼊𖽺𖾐 𖼍𖽡𖾐 𖼣𖽻𖾐 𖼦𖽻， 𖼣𖽙𖾐 𖼀𖽑𖽧𖾐 𖼦𖽑𖽙𖾐 𖼊𖽻𖾐． 𖼷𖽑𖽻𖾐 𖼽𖽻 𖼈𖽳𖾐 𖼮𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼊𖽑𖽺 𖼊𖽶𖾐 𖼮𖽑𖽪 𖼺𖽪𖾐 𖼣𖽻𖾐 𖼀𖽦𖾐 𖼊𖽻𖾐， 𖼽𖽺𖾐 𖼦𖽴 𖼦𖽫 𖼽𖽻 𖼈𖽳𖾐 𖼊𖽑𖽺 𖼻𖽳𖾐 𖼻𖽳𖾐 𖼦𖽶𖾑 𖼺𖽪𖾐 𖼣𖽻𖾐 𖼀𖽦𖾐 𖼊𖽻𖾐． 5 𖼐𖽑𖽡𖾐 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼐𖽦𖾐 𖼄𖽡𖽻𖾐， 𖼦𖽑𖽔𖾐 𖼖𖽺𖾑 𖼀𖽦𖾐 𖼊𖽻𖾐：“𖼽𖽺𖾐 𖼦𖽴 𖼦𖽫 𖼞𖽑𖽻𖾐 𖼂𖽻𖾑 𖼀𖽑𖽙 𖼮𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼮𖽑𖽻𖾐 𖼄𖽡𖾐 𖼊𖽻 𖼈𖽳 𖽂𖽙𖾐 𖼊𖽻𖾐．”
𖼳𖽪𖾐 𖼮𖽨𖾐 𖼖𖽙𖾐 𖼄𖽔 𖼮𖽑𖽻𖾐 𖼺𖽪𖾐 𖼍𖽡𖾐 𖼄𖽻 𖼊𖽑𖽺 𖼦𖽑𖽳𖾐 𖼄𖽪𖾑
6 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼈𖽳𖾐 𖼖𖽙𖾐 𖼀𖽦𖾐：“𖼣𖽙𖾐 𖼄𖽡𖾐 𖼊𖽑𖽺 𖼐𖽦𖾐 𖼄𖽔 𖼍𖽪𖾐 𖼺𖽪𖾐 𖼍𖽡𖾐 𖼄𖽻 𖽃𖽔𖾐! 𖼻𖽙 𖽃𖽔 𖼀𖽙 𖼊𖽑𖽺 𖼐𖽦𖾐 𖼍𖽪𖾐， 𖼮𖽜𖾐 𖼀𖽑𖽙 𖼺𖽡 𖼀𖽑𖽙 𖼊𖽑𖽺 𖼮𖽡𖽮𖾐 𖼠𖽙𖾐 𖼳𖽙𖾐． 𖼦𖽑𖽻𖾐 𖼊𖽑𖽻𖾐， 𖼣𖽙𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖽃𖽔 𖼀𖽙 𖼣𖽻𖾐 𖼮𖽶𖾐 𖼊𖽑𖽡𖾑 𖼣𖽻𖾐， 𖼐𖽑𖽡𖾐 𖼈𖽳𖾐 𖼣𖽙𖾐 𖼊𖽑𖽺 𖼐𖽦𖾐 𖼍𖽪𖾐 𖼍𖽳𖾐 𖼖𖽔𖾑？ 𖼣𖽙𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼺𖽡 𖼀𖽑𖽙 𖼣𖽻𖾐 𖼮𖽶𖾐 𖼊𖽑𖽡𖾑 𖼣𖽻𖾐， 𖼐𖽑𖽡𖾐 𖼈𖽳𖾐 𖼣𖽙𖾐 𖼊𖽑𖽺 𖼮𖽡𖽮𖾐 𖼠𖽙𖾐 𖼳𖽙𖾐 𖼍𖽳𖾐 𖼖𖽔𖾑？ ”
𖼞𖽚 𖼀𖽑𖽚𖾐 𖼐𖽑𖽡𖾐 𖼈𖽳𖾐 𖼀𖽦𖾐：“𖼣𖽙𖾐 𖼈𖽳𖾐 𖽃𖽔 𖼊𖽺𖾐 𖼐𖽑𖽡𖾐 𖼊𖽑𖽺 𖼐𖽦𖾐 𖼄𖽔 𖼍𖽪𖾐 𖼐𖽺𖾑？ ”
7 𖼐𖽑𖽡𖾐 𖼈𖽳𖾐 𖼐𖽙𖾐 𖼊𖽴 𖼺𖽪𖾐 𖼍𖽡𖾐 𖼊𖽪𖾐 𖼦𖽑𖽙𖾐 𖼣𖽙𖾐 𖼍𖽡𖾐 𖼷𖽻𖾐 𖼊𖽑𖽺 𖼍𖽦𖾐，𖼦𖽑𖽔𖾐 𖼖𖽺𖾑 𖼐𖽑𖽡𖾐 𖼈𖽳𖾐 𖼀𖽦𖾐：“𖼣𖽙𖾐 𖼈𖽳𖾐 𖽃𖽔 𖼊𖽺𖾐 𖼐𖽑𖽡𖾐 𖼞𖽳𖾐 𖼍𖽡𖾐 𖼷𖽻𖾐 𖼞𖽜 𖼺𖽡 𖼄𖽔 𖼮𖽡𖾐 𖼦𖽑𖽙𖾐 𖼐𖽺𖾑？ ”
𖼐𖽑𖽡𖾐 𖼈𖽳𖾐 𖼊𖽡 𖼮𖽑𖽻 𖼽𖽺𖾐 𖼦𖽴 𖼦𖽫 𖼞𖽳𖾐 𖼹𖽙𖾐 𖼹𖽶𖾐 𖼞𖽑𖽶𖾑 𖼊𖽑𖽺 𖼐𖽦𖾐 𖼄𖽔 𖼍𖽪𖾐 𖼊𖽙𖾐 𖼍𖽳𖾐． 8 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼀𖽦𖾐：“𖼐𖽑𖽡𖾐 𖼈𖽳𖾐 𖼄𖽦𖾐 𖼍𖽳𖾐 𖼺𖽪𖾐 𖼮𖽡𖽺 𖼦𖽑𖽙𖾐 𖼍𖽡𖾐 𖼊𖽪𖾐 𖼂𖽺𖾐， 𖼦𖽑𖽺𖾑 𖼊𖽶𖾐 𖼄𖽡𖽻 𖼄𖽔 𖼣𖽻𖾐 𖼖𖽔𖾑？ 𖼮𖽑𖽡𖾐 𖼣𖽝𖾐 𖼺𖽪𖾐 𖼮𖽡𖽺 𖼐𖽺𖾐 𖼐𖽙𖾐 𖼍𖽴 𖼺𖽪𖾐 𖼮𖽡𖽺 𖼦𖽑𖽙𖾐 𖼍𖽡𖾐 𖼊𖽪𖾐 𖼂𖽺𖾐， 𖼦𖽑𖽺𖾑 𖼽𖽺𖾐 𖼮𖽑𖽡𖽪𖾑 𖼄𖽔 𖼣𖽻𖾐 𖼖𖽔？ 𖼐𖽑𖽡𖾐 𖼈𖽳𖾐 𖼦𖽑𖽺𖾑 𖼳𖽶 𖼄𖽡𖽻 𖼐𖽑𖽡 𖼦𖽑𖽙𖾐 𖼷𖽶 𖼄𖽻 𖼈𖽳 𖼊𖽑𖽺 𖼞𖽜 𖼊𖽑𖽡𖾑 𖼣𖽻𖾐， 𖼽𖽻 𖼐𖽑𖽧𖾐 𖼺𖽳 𖼐𖽑𖽡𖾐 𖼈𖽳𖾐 𖼞𖽳𖾐 𖼄𖽡𖽻 𖼐𖽑𖽡 𖼊𖽑𖽺 𖼷𖽶𖾐 𖼦𖽶𖾐 𖼊𖽻𖾐 𖼖𖽔𖾑？”
9 𖽃𖽔𖾑 𖼄𖽳𖾐 𖼐𖽑𖽡𖾐 𖼈𖽳𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼮𖽑𖽡 𖼮𖽡𖽺𖾐 𖼺𖽺𖾑， 𖼽𖽻 𖼞𖽜 𖼮𖽡 𖼽𖽡𖾑 𖽃𖽔 𖼐𖽺𖾑 𖼊𖽑𖽺 𖼄𖽻𖾑 𖼞𖽜 𖼍𖽳𖾐， 𖼐𖽑𖽡𖾐 𖼈𖽳𖾐 𖼐𖽙𖾐 𖼊𖽴 𖼺𖽪𖾐 𖼍𖽡𖾐 𖼊𖽪𖾐 𖼦𖽑𖽙𖾐 𖼍𖽡𖾐 𖼺𖽺𖾑， 𖼽𖽻 𖼦𖽑𖽔𖾐 𖼖𖽺𖾑 𖼐𖽑𖽡𖾐 𖼈𖽳𖾐 𖼊𖽑𖽺 𖼐𖽑𖽧𖾐 𖼺𖽳 𖼷𖽶𖾐 𖼞𖽜 𖼠𖽸𖾑 𖼖𖽔𖾑？
10 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼀𖽦𖾐：“𖼣𖽙𖾐 𖼐𖽑𖽡𖾐 𖼈𖽳𖾐 𖼞𖽜 𖼺𖽡 𖼮𖽡𖾐 𖼦𖽑𖽺𖾐 𖽃𖽔𖾑 𖼊𖽪 𖼂𖽡𖾑 𖼍𖽡 𖼦𖽑𖽙𖾐 𖼀𖽦𖾐 𖼖𖽺𖾑 𖼊𖽙𖾐 𖼊𖽑𖽻𖾐， 𖼐𖽑𖽡𖾐 𖼈𖽳𖾐 𖼞𖽜 𖼺𖽺𖾑 𖼣𖽙𖾐 𖼞𖽳𖾐 𖼍𖽡𖾐 𖼷𖽻𖾐 𖼊𖽑𖽺 𖼂𖽺𖾐 𖼊𖽪𖾐 𖼄𖽔 𖼮𖽻𖾐 𖼺𖽪𖾐 𖼍𖽡𖾐 𖼊𖽪𖾐 𖼻𖽜 𖼍𖽡𖾐 𖼄𖽔 𖼻𖽻𖾐． ” 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼀𖽦𖾐：“𖼣𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼐𖽑𖽧𖾐 𖼄𖽔 𖼺𖽳， 𖼐𖽑𖽡𖾐 𖼈𖽳𖾐 𖼞𖽳𖾐 𖼍𖽡𖾐 𖼊𖽪𖾐 𖼊𖽑𖽺 𖼖𖽺𖾑 𖼣𖽙𖾐 𖼄𖽔 𖼷𖽶𖾐．” 11 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼀𖽦𖾐：“𖼮𖽡𖾐 𖼊𖽚𖾐 𖼄𖽡𖾐 𖼮𖽑𖽻𖾐 𖼮𖽡𖾐 𖼖𖽻𖾑 𖼄𖽡𖾐 𖼖𖽙𖾐 𖼮𖽑𖽡𖾐， 𖼣𖽙𖾐 𖼞𖽳𖾐 𖼄𖽡𖾐 𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽙 𖼠𖽻𖾐 𖼊𖽑𖽺 𖼈𖽳 𖼺𖽪𖾐 𖼰𖽕𖾐 𖼊𖽻𖾐． 𖼞𖽑𖽙𖾐 𖼮𖽑𖽡𖾐 𖼊𖽪 𖼷𖽑𖽻𖾐 𖼣𖽙𖾐 𖼞𖽳𖾐 𖼄𖽡𖾐 𖼖𖽙𖾐 𖼀𖽙𖾐 𖼳𖽡𖽻𖾐 𖼮𖽑𖽡𖽪𖾐， 𖼺𖽡 𖼮𖽡𖾐 𖼺𖽪𖾐 𖼍𖽡𖾐 𖼮𖽡𖽺𖾐 𖼦𖽑𖽙𖾐 𖼣𖽙𖾐 𖼞𖽜 𖼊𖽻𖾐． 𖼞𖽪𖾐 𖼮𖽡𖽺𖾐， 𖼣𖽙𖾐 𖼞𖽳𖾐 𖼄𖽡𖾐 𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽙 𖼠𖽻𖾐 𖼊𖽑𖽺 𖼈𖽳 𖼺𖽪𖾐 𖼰𖽕𖾐 𖼊𖽻𖾐． ”
12 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼀𖽦𖾐：“𖼐𖽑𖽡𖾐 𖼈𖽳𖾐 𖼣𖽙𖾐 𖼊𖽑𖽺 𖼐𖽑𖽧𖾐 𖼣𖽡𖽳𖾐 𖼦𖽑𖽻𖾐， 𖼐𖽑𖽡𖾐 𖼈𖽳𖾐 𖼊𖽡 𖼮𖽑𖽻 𖼺𖽡 𖼀𖽑𖽙 𖼞𖽳𖾐 𖼹𖽙𖾐 𖼹𖽶𖾐 𖼦𖽑𖽺𖾑 𖼖𖽕𖾑 𖼊𖽑𖽕𖾐 𖼳𖽶 𖼣𖽻𖾐， 𖼹𖽙𖾐 𖼹𖽶𖾐 𖼊𖽑𖽺 𖼷𖽙 𖼊𖽪𖾐 𖼖𖽺𖾑 𖼐𖽦𖾐 𖼄𖽔 𖼍𖽪𖾐 𖼊𖽙𖾐 𖼍𖽳𖾐． 13 𖼐𖽑𖽡𖾐 𖼈𖽳𖾐 𖼹𖽦𖾑 𖼀𖽦𖾐：‘ 𖽃𖽺𖾐! 𖼦𖽑𖽔𖾐 𖼮𖽶𖾐 𖼮𖽑𖽳𖾐 𖼳𖽚𖾑! ’ 𖽃𖽔𖾐 𖼺𖽺𖾑 𖼐𖽑𖽡𖾐 𖼈𖽳𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼈𖽳𖾐 𖼵𖽶𖾐． ” 𖼽𖽺𖾐 𖼦𖽴 𖼦𖽫 𖼀𖽦𖾐：“𖼐𖽑𖽡𖾐 𖼈𖽳𖾐 𖼐𖽻𖾑 𖼂𖽻𖾐 𖼖𖽻𖾐 𖼺𖽪𖾐， 𖼮𖽑𖽡𖾐 𖼣𖽝𖾐 𖼺𖽪𖾐 𖼮𖽡𖽺 𖼐𖽺𖾐 𖼐𖽙𖾐 𖼊𖽴 𖼺𖽪𖾐 𖼮𖽡𖽺 𖼈𖽺𖾐 𖼂𖽻𖾐 𖼖𖽻𖾐 𖼦𖽑𖽙𖾐 𖼍𖽡𖾐 𖼊𖽪𖾐 𖼂𖽺𖾐， 𖼣𖽙𖾐 𖽃𖽔𖾐 𖼹𖽻𖾐 𖼐𖽑𖽡𖾐 𖼈𖽳𖾐 𖼖𖽦 𖼠𖽻𖾐 𖼞𖽑𖽶𖾐 𖼮𖽑𖽻𖾐 𖼷𖽶𖾐 𖼦𖽶𖾐 𖼐𖽺𖾑？”
14 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼀𖽦𖾐：“𖼷𖽑𖽻𖾐 𖼽𖽻 𖽃𖽔𖾑 𖼞𖽑𖽶𖾐 𖼞𖽳𖾐 𖼮𖽡𖽺 𖼂𖽙𖾑 𖼦𖽑𖽙𖾐 𖼍𖽡𖾐 𖼮𖽙𖾐， 𖼞𖽚 𖼀𖽑𖽚𖾐 𖼐𖽙𖾐 𖼊𖽴 𖼺𖽪𖾐 𖼦𖽑𖽙𖾐 𖼺𖽡 𖼀𖽑𖽙 𖼊𖽑𖽺 𖼞𖽜， 𖼇𖽪 𖼄𖽡𖽻 𖼂𖽺𖾐 𖼺𖽪𖾐 𖼷𖽑𖽻𖾐 𖼮𖽙 𖼰𖽪𖾑 𖼄𖽳𖾐 𖼊𖽻𖾐! 𖼞𖽪𖾐 𖼮𖽡𖽺𖾐 𖼣𖽙𖾐 𖼈𖽪𖾐 𖼍𖽦 𖼈𖽳 𖼣𖽻𖾐， 𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽙 𖼣𖽙𖾐 𖼊𖽑𖽺 𖼮𖽡𖽮𖾐 𖼷𖽑𖽚 𖼷𖽻．