𖼍𖽡𖾐 𖼊𖽑𖽧 𖼖𖽻𖾐 𖼺𖽪𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽳𖾐 𖼄𖽶 𖼳𖽳𖾐
2
1 𖼳𖽶 𖼳𖽨𖾐 𖼐𖽑𖽡 𖼷𖽑𖽡𖾐 𖼊𖽑𖽡 𖼞𖽑𖽶𖾑 𖼊𖽑𖽡 𖼐𖽑𖽡𖾐， 𖼽𖽺𖾐 𖼦𖽴 𖼦𖽫 𖼺𖽡𖾐 𖼻𖽙 𖼦𖽔𖾐 𖼠𖽺𖾐 𖼖𖽙𖾐 𖼀𖽦𖾐： 2 “𖼐𖽑𖽡𖾐 𖼺𖽔 𖼖𖽔𖾐 𖼊𖽑𖽡𖽦 𖼞𖽳𖾐 𖼻𖽙 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼠𖽕 𖼺𖽪𖾐 𖼺𖽙 𖼖𖽚𖾐 𖼂𖽔𖾐 𖼂𖽚 𖼷𖽶 𖼄𖽻 𖼈𖽳， 𖼹𖽦𖾑 𖼽𖽱𖾐 𖼺𖽔𖾐 𖼍𖽕 𖼞𖽳𖾐 𖼻𖽙 𖼽𖽺𖾐 𖼳𖽪𖾐 𖼽𖽕𖾑 𖼍𖽡𖾐 𖼄𖽻 𖼈𖽳 𖼐𖽺𖾐 𖼷𖽺 𖼷𖽺𖾐 𖼺𖽪𖾐 𖼷𖽑𖽻𖾐 𖼀𖽺 𖼖𖽙𖾐 𖼀𖽦𖾐： 3 ‘ 𖼷𖽺 𖼷𖽺𖾐 𖼺𖽪𖾐 𖼷𖽑𖽻𖾐 𖼐𖽑𖽡𖾐 𖼈𖽳𖾐， 𖽃𖽔 𖼺𖽺 𖽃𖽙𖾑 𖼄𖽺 𖼊𖽑𖽙 𖼺𖽡 𖼮𖽡𖾐 𖼦𖽑𖽺𖾐 𖼞𖽳𖾐 𖼄𖽶 𖼳𖽳𖾐 𖼊𖽑𖽺 𖼄𖽡𖽻𖾐 𖼠𖽚 𖼐𖽺𖾑？ 𖽃𖽔𖾑 𖼄𖽳𖾐 𖼐𖽑𖽡𖾐 𖼈𖽳𖾐 𖼞𖽑𖽙𖾐 𖼐𖽦𖾐 𖼄𖽡𖽻𖾐 𖼺𖽪𖾐 𖼺𖽡 𖼮𖽡𖾐 𖼦𖽑𖽺𖾐 𖽃𖽔 𖼊𖽺𖾐 𖼺𖽺𖾑 𖼮𖽻𖾐 𖼐𖽺𖾑？ 𖼦𖽑𖽺𖾑 𖼊𖽑𖽡 𖼳𖽶 𖼖𖽺𖾑 𖼄𖽔 𖼮𖽻𖾐 𖼖𖽙𖾐 𖼺𖽶𖾑 𖼄𖽔 𖼣𖽻𖾐 𖼖𖽔？ ’ ” 4 𖼽𖽺𖾐 𖼦𖽴 𖼦𖽫 𖼀𖽦𖾐：“𖼺𖽙 𖼖𖽚 𖼂𖽔𖾐 𖼂𖽚 𖽃𖽔𖾐! 𖽃𖽔𖾑 𖼄𖽳𖾐 𖼐𖽑𖽡𖾐 𖼐𖽑𖽧𖾐 𖼈𖽳 𖼐𖽑𖽧𖾐 𖼻𖽺𖾐 𖼖𖽡𖾐．” 𖼽𖽺𖾐 𖼦𖽴 𖼦𖽫 𖼀𖽦𖾐：“𖼽𖽱𖾐 𖼺𖽔𖾐 𖼍𖽕 𖼞𖽳𖾐 𖼻𖽙 𖼽𖽺𖾐 𖼳𖽪𖾐 𖼽𖽕𖾑 𖼍𖽡𖾐 𖼄𖽻 𖼈𖽳 𖽃𖽔𖾐! 𖼐𖽑𖽡𖾐 𖼐𖽑𖽧𖾐 𖼈𖽳 𖼐𖽑𖽧𖾐 𖼻𖽺𖾐 𖼖𖽡𖾐． 𖼦𖽑𖽺𖾑 𖼠𖽻𖾐 𖼞𖽑𖽙𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼀𖽺 𖽃𖽔𖾐! 𖼐𖽑𖽡𖾐 𖼈𖽳𖾐 𖼖𖽺𖾑 𖼐𖽑𖽧𖾐 𖼈𖽳 𖼐𖽑𖽧𖾐 𖼻𖽺𖾐 𖼖𖽡𖾐 ， 𖼦𖽑𖽔𖾐 𖼖𖽺𖾑 𖼺𖽡 𖼮𖽡𖾐 𖼦𖽑𖽺𖾐 𖼍𖽡𖾐 𖼖𖽡𖾐．” 𖼄𖽺 𖼄𖽦 𖼀𖽑𖽙 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼀𖽦𖾐：“𖼞𖽪𖾐 𖼮𖽡𖽺𖾐 𖼣𖽙𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼮𖽻𖾐． ” 5 𖼦𖽑𖽺𖾑 𖼐𖽑𖽡𖾐 𖼈𖽳𖾐 𖼞𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼊𖽚𖾐 𖼖𖽻𖾐 𖼞𖽑𖽶𖾑 𖼮𖽶𖾐， 𖼣𖽙𖾐 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼄𖽳𖾐 𖼷𖽑𖽦𖾐 𖼦𖽑𖽙𖾐 𖼺𖽪𖾐 𖼊𖽻 𖼣𖽻𖾐． 𖽃𖽔𖾑 𖼄𖽳𖾐 𖼣𖽙𖾐 𖼞𖽳𖾐 𖼳𖽨𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼮𖽻𖾐， 𖼐𖽑𖽡𖾐 𖼈𖽳𖾐 𖼮𖽡𖽮𖾐 𖼄𖽔 𖼻𖽻𖾐．6 𖼞𖽪𖾐 𖼮𖽡𖽺𖾐 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼻𖽻𖾐 𖼀𖽦𖾐：‘ 𖼞𖽑𖽙𖾐 𖼄𖽙𖾐 𖼄𖽔 𖼖𖽚， 𖼣𖽙𖾐 𖼹𖽦𖾑 𖼄𖽶 𖼠𖽻𖾐 𖼄𖽡𖾑 𖼐𖽦𖾐、 𖼦𖽜𖾐 𖼄𖽙𖾐 𖼐𖽺𖾐 𖼦𖽡𖽳𖾑 𖼄𖽡𖾐 𖼊𖽑𖽺 𖼐𖽑𖽡𖽻𖾐 𖼍𖽪𖾐 𖼖𖽻𖾐 𖼊𖽻𖾐．’ 7 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼀𖽦𖾐：‘ 𖼣𖽙𖾐 𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽙 𖼊𖽑𖽺 𖼞𖽕 𖼍𖽪𖾐 𖼺𖽺𖾑， 𖼽𖽻 𖼈𖽳𖾐 𖼞𖽳𖾐 𖼀𖽑𖽶 𖼊𖽴 𖼹𖽳𖾐 𖼖𖽪𖾐 𖼊𖽑𖽺 𖼈𖽺𖾐 𖼂𖽻𖾐 𖼖𖽻𖾐， 𖼣𖽙𖾐 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼞𖽜 𖼄𖽶 𖼳𖽳𖾐 𖼀𖽡𖾐 𖼮𖽨𖾐 𖼊𖽻𖾐． 8 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾐 𖼷𖽪𖾐 𖼽𖽺𖾐 𖼦𖽴 𖼦𖽫 𖼀𖽦𖾐： 𖼀𖽑𖽨𖾐 𖼣𖽙𖾐 𖼞𖽳𖾐 𖼣𖽻𖾐， 𖼳𖽳𖾐 𖼖𖽺𖾑 𖼣𖽙𖾐 𖼞𖽳𖾐 𖼣𖽻𖾐． 9 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾐 𖼷𖽪𖾐 𖼽𖽺𖾐 𖼦𖽴 𖼦𖽫 𖼀𖽦𖾐：“𖼺𖽡 𖼮𖽡𖾐 𖼦𖽑𖽺𖾐 𖼠𖽙𖾑 𖼍𖽻𖾐 𖼞𖽳𖾐 𖼄𖽶 𖼳𖽳𖾐， 𖽃𖽙𖾑 𖼄𖽺 𖼦𖽶𖾑 𖼄𖽔 𖼷𖽑𖽶𖾐 𖼈𖽳 𖼊𖽻𖾐． 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼀𖽦𖾐：‘ 𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼺𖽙𖾑 𖼺𖽙𖾐 𖼖𖽪 𖼦𖽑𖽺𖾑 𖼄𖽡𖾐 𖼊𖽺𖾐 𖼊𖽑𖽺 𖼞𖽜 𖼊𖽻𖾐．𖽑 ” \fr 2．9 \ft “6 𖼹𖽧 𖼮𖽑𖽻𖾐 9 𖼹𖽧𖾑 ” 𖼳𖽡𖾐 𖼂𖽚 𖼖𖽦 𖼺𖽪𖾑 12 𖼰𖽪𖾑 26 𖼹𖽸𖾑 𖼖𖽙𖾐 𖼐𖽦𖾐．
𖼷𖽑𖽻𖾐 𖼀𖽺 𖼞𖽳𖾐 𖼊𖽶𖾐 𖼮𖽑𖽪
10 𖼍𖽕𖾑 𖼖𖽡𖾑 𖼈𖽪𖾐 𖼈𖽪𖾐 𖼍𖽦 𖼂𖽺𖾐 𖼐𖽑𖽡 𖼞𖽑𖽚 𖼞𖽑𖽶𖾑 𖼞𖽑𖽚 𖼞𖽳𖾐 𖼠𖽶𖾐 𖼳𖽨𖾐 𖼐𖽑𖽡 𖼷𖽑𖽡𖾐 𖼖𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐， 𖼽𖽺𖾐 𖼦𖽴 𖼦𖽫 𖼞𖽑𖽻𖾑 𖼺𖽡𖾐 𖼻𖽙 𖼦𖽔𖾐 𖼠𖽺𖾐 𖼊𖽑𖽺 𖼄𖽪𖾑 𖼍𖽴𖾑 𖼀𖽦𖾐： 11 “𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼻𖽻𖾐 𖼀𖽦𖾐：‘ 𖼐𖽑𖽡𖾐 𖼽𖽡𖾐 𖼍𖽡𖾐 𖼄𖽻 𖼊𖽑𖽺 𖼊𖽻 𖼐𖽙𖾐， 𖼳𖽪𖾐 𖼮𖽨𖾐 𖼖𖽙𖾐 𖼮𖽑𖽻𖾐 𖼍𖽕𖾑 𖽂𖽚 𖼞𖽳𖾐 𖼄𖽡𖽻 𖼦𖽑𖽺𖾑 𖽃𖽔 𖼊𖽺𖾐 𖼂𖽺𖾐 𖼖𖽡𖾐？ 12 𖼷𖽑𖽻𖾐 𖼀𖽑𖽡𖽻𖾐 𖼄𖽳𖾑 𖼖𖽦 𖼀𖽑𖽨 𖼺𖽡 𖼮𖽡𖾐 𖼺𖽪𖾐 𖼍𖽡𖾐 𖼦𖽙 𖼊𖽑𖽴𖾐， 𖼠𖽙𖾑 𖼍𖽻𖾐 𖼽𖽻 𖼀𖽑𖽡𖽻𖾐 𖼄𖽳𖾑 𖼖𖽦 𖼦𖽑𖽺𖾑 𖽃𖽔𖾑 𖼂𖽻𖾐、 𖼈𖽻 𖼈𖽡𖾐、 𖼮𖽶𖾐 𖼀𖽳、 𖼵𖽶𖾐 𖼈𖽡𖾐 𖼊𖽑𖽺 𖼖𖽡𖾑 𖼄𖽳𖾐 𖼣𖽻𖾐 𖼦𖽻， 𖼠𖽳𖾐 𖼖𖽪𖾐 𖼄𖽡𖽻 𖼐𖽑𖽡 𖼊𖽑𖽺 𖼖𖽡𖾑 𖼄𖽳𖾐 𖼣𖽻𖾐 𖼦𖽻， 𖼦𖽑𖽺𖾑 𖼹𖽻𖾐 𖼞𖽜 𖼺𖽡 𖼮𖽡𖾐 𖼠𖽸𖾑 𖼠𖽸𖾑？ ”
𖼍𖽡𖾐 𖼄𖽻 𖼊𖽻 𖼞𖽑𖽚：“𖼄𖽔 𖼠𖽸𖾑!”
13 𖼦𖽔𖾐 𖼠𖽺𖾐 𖼦𖽑𖽔𖾐 𖼖𖽺𖾑 𖼀𖽦𖾐 ：“𖼷𖽑𖽻𖾐 𖼽𖽡𖾐 𖼳𖽶𖾐 𖼄𖽻𖾐 𖼊𖽑𖽺 𖼍𖽪 𖼄𖽳𖾐 𖼺𖽺𖾑 𖼺𖽡 𖼄𖽔 𖼮𖽡𖾐 𖼦𖽑𖽻𖾐， 𖼽𖽻 𖼹𖽦𖾑 𖼠𖽳𖾐 𖼖𖽪𖾐 𖼄𖽡𖽻 𖼐𖽑𖽡𖾐 𖼊𖽑𖽺 𖼍𖽪 𖼄𖽳𖾐 𖼊𖽑𖽡𖾑 𖼣𖽻𖾐， 𖼄𖽡𖽻 𖼐𖽑𖽡 𖼦𖽑𖽺𖾑 𖼹𖽻𖾐 𖼺𖽡 𖼮𖽡𖾐 𖼮𖽡𖾐 𖼺𖽺？”
𖼍𖽡𖾐 𖼄𖽻 𖼊𖽻 𖼞𖽑𖽚：“𖼺𖽡 𖼄𖽔 𖼮𖽡𖾐 𖼦𖽑𖽻𖾐．”
14 𖽃𖽔𖾐 𖼺𖽺𖾑， 𖼦𖽔𖾐 𖼠𖽺𖾐 𖼹𖽦𖾑 𖼀𖽦𖾐：“𖼽𖽺𖾐 𖼦𖽴 𖼦𖽫 𖼀𖽦𖾐：‘ 𖼣𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽻𖾐 𖼺𖽪𖾐 𖼷𖽑𖽻𖾐 𖼀𖽺 𖼖𖽺𖾑 𖼦𖽑𖽺𖾑 𖼻𖽻𖾐 𖼣𖽻𖾐， 𖼽𖽚 𖼍𖽕𖾑 𖼠𖽚 𖼖𖽺𖾑 𖼦𖽑𖽺𖾑 𖼻𖽻𖾐 𖼣𖽻𖾐， 𖼽𖽻 𖼈𖽳𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽡𖽻 𖼖𖽺𖾑 𖼦𖽑𖽺𖾑 𖼻𖽻𖾐 𖼣𖽻𖾐， 𖼽𖽻 𖼈𖽳𖾐 𖼞𖽑𖽙𖾐 𖼦𖽑𖽙𖾐 𖼂𖽻𖾐 𖼖𖽻𖾐 𖼺𖽪𖾐 𖼍𖽡𖾐 𖼊𖽪𖾐 𖼖𖽺𖾑 𖼺𖽡 𖼄𖽔 𖼮𖽡𖾐 𖼺𖽪𖾐 𖼣𖽻𖾐．’”
𖼽𖽺𖾐 𖼦𖽴 𖼦𖽫 𖼄𖽢 𖼖𖽪 𖼞𖽜 𖼮𖽙𖾐
15 𖽃𖽔𖾑 𖼄𖽳𖾑 𖼐𖽑𖽡𖾐 𖼈𖽳𖾐 𖼊𖽑𖽡 𖼠𖽙𖾐 𖼣𖽝 𖼐𖽦𖾐 𖼖𖽡𖾐， 𖼞𖽑𖽙𖾐 𖼠𖽚 𖼦𖽑𖽙𖾐 𖼞𖽳𖾐 𖼐𖽑𖽡𖾐 𖼦𖽑𖽦 𖼮𖽑𖽻𖾐 𖽃𖽙𖾑 𖼐𖽑𖽡𖾐 𖼖𖽙𖾐 𖼮𖽑𖽡𖾐 𖼊𖽑𖽡 𖼠𖽙𖾐 𖼣𖽝 𖼐𖽦𖾐， 𖼽𖽺𖾐 𖼦𖽴 𖼦𖽫 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼖𖽚𖾐 𖼄𖽙𖾐 𖼊𖽑𖽡 𖼊𖽝𖾐 𖼖𖽺𖾑 𖼄𖽔 𖼷𖽑𖽧𖾐 𖼺𖽺 𖼞𖽑𖽶𖾑 𖼮𖽶𖾐， 16 𖼐𖽑𖽡𖾐 𖼈𖽳𖾐 𖽃𖽔 𖼊𖽺𖾐 𖼮𖽻𖾐 𖼐𖽺𖾑？ 𖼷𖽑𖽻𖾐 𖼷𖽙𖾐 𖼂𖽜𖾐 𖼞𖽳𖾐 𖼖𖽻𖾐， 𖼷𖽙𖾐 𖼺𖽳 𖼐𖽑𖽡 𖼦𖽑𖽙𖾐 𖼰𖽡𖾐 𖽂𖽙𖾐 𖼖𖽡𖾐 𖼊𖽡 𖼮𖽑𖽻𖾐， 𖼦𖽑𖽻𖾐 𖼊𖽑𖽻𖾐 𖼊𖽑𖽡 𖼦𖽑𖽙𖾐 𖼰𖽡𖾐 𖼍𖽺𖾑 𖽂𖽙𖾐；𖼷𖽑𖽻𖾐 𖼖𖽻𖾐 𖼮𖽶𖾐 𖼀𖽳 𖼐𖽑𖽧𖾑 𖼰𖽡𖽺𖾐 𖼞𖽳𖾐 𖼞𖽑𖽻𖾑 𖼮𖽑𖽡𖾐， 𖼮𖽶𖾐 𖼀𖽳 𖼊𖽑𖽡 𖼦𖽑𖽙𖾐 𖼰𖽡𖾐 𖽂𖽙𖾐 𖼖𖽡𖾐 𖼊𖽡 𖼮𖽑𖽻， 𖼦𖽑𖽻𖾐 𖼊𖽑𖽻𖾐 𖼖𖽡𖾐 𖼷𖽑𖽡𖾐 𖼰𖽡𖾐 𖼍𖽺𖾑 𖽂𖽙𖾐． 17 𖼽𖽺𖾐 𖼦𖽴 𖼦𖽫 𖼀𖽦𖾐：‘ 𖼣𖽙𖾐 𖼐𖽑𖽡𖾐 𖼈𖽳𖾐 𖼐𖽺𖾐 𖼐𖽑𖽡𖾐 𖼈𖽳𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽡𖽻 𖼞𖽜 𖽃𖽔𖾑 𖼄𖽶 𖼦𖽡𖽳𖾐、 𖼀𖽸 𖼮𖽑𖽶 𖼐𖽺𖾐 𖽂𖽙 𖼖𖽚𖾐 𖼈𖽡𖾑 𖼞𖽑𖽙 𖼷𖽶𖾐 𖼄𖽳𖾐， 𖼦𖽑𖽻𖾐 𖼊𖽑𖽻𖾐 𖼐𖽑𖽡𖾐 𖼈𖽳𖾐 𖼦𖽑𖽔𖾐 𖼖𖽺𖾑 𖼣𖽙𖾐 𖼖𖽙𖾐 𖼐𖽳 𖼖𖽻𖾐 𖼄𖽔 𖼦𖽶𖾐．
18 𖽃𖽙𖾑 𖼐𖽑𖽡𖾐 𖼦𖽑𖽺𖾑 𖼠𖽶𖾐 𖼳𖽨𖾐 𖼐𖽑𖽡 𖼷𖽑𖽡𖾐 𖼖𖽡𖾐 𖼣𖽻𖾐， 𖼽𖽺𖾐 𖼦𖽴 𖼦𖽫 𖼞𖽳𖾐 𖼺𖽡 𖼮𖽡𖾐 𖼦𖽑𖽺𖾐 𖼖𖽚𖾐 𖼮𖽑𖽡𖾐 𖼳𖽙𖾐 𖼍𖽪𖾐 𖼞𖽳𖾐 𖼐𖽑𖽡𖾐 𖼦𖽑𖽦 𖼣𖽻𖾐， 𖽃𖽙𖾑 𖼐𖽑𖽡𖾐 𖼮𖽑𖽻𖾐 𖼍𖽪𖾐 𖼐𖽑𖽡𖾐 𖼈𖽳𖾐 𖽃𖽔𖾑 𖼞𖽶𖾐 𖼞𖽳𖾐 𖼄𖽡𖽻 𖼊𖽑𖽡 𖼠𖽙𖾐 𖼣𖽝 𖼐𖽦𖾐 𖼻𖽻𖾐： 19 𖼠𖽕𖾐 𖼦𖽑𖽺𖾐 𖼞𖽑𖽶𖾐 𖼳𖽶𖾑 𖼄𖽙𖾐 𖼮𖽻𖾐 𖼮𖽻𖾐 𖼺𖽺 𖼐𖽺𖾑？ 𖼺𖽳 𖼖𖽳 𖼊𖽻𖾐 𖼷𖽡𖾐， 𖼮𖽑𖽡 𖼺𖽳 𖼄𖽡 𖼷𖽡𖾐， 𖼺𖽸𖾑 𖼄𖽡𖽚 𖼷𖽡𖾐 𖼐𖽺𖾐 𖽃𖽔 𖼮𖽑𖽙 𖼷𖽡𖾐， 𖼦𖽑𖽺𖾑 𖼹𖽻𖾐 𖼺𖽳 𖼄𖽔 𖼊𖽴 𖼺𖽺 𖼄𖽔 𖼣𖽻𖾐 𖼖𖽔？ 𖼦𖽑𖽻𖾐 𖼊𖽑𖽻𖾐， 𖽃𖽙𖾑 𖼐𖽑𖽡𖾐 𖼮𖽑𖽻𖾐 𖼍𖽪𖾐， 𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼄𖽢 𖼖𖽪 𖼊𖽻𖾐．’ ”
𖼺𖽙 𖼖𖽚 𖼂𖽔𖾐 𖼂𖽚 𖼊𖽑𖽺 𖼺𖽺𖾐 𖼄𖽳𖾐
20 𖼠𖽶𖾐 𖼳𖽨𖾐 𖼐𖽑𖽡 𖼷𖽑𖽡𖾐 𖼖𖽡𖾐， 𖼽𖽺𖾐 𖼦𖽴 𖼦𖽫 𖼹𖽦𖾑 𖼊𖽑𖽡 𖼂𖽦𖾑 𖼺𖽡 𖼻𖽙 𖼦𖽔𖾐 𖼠𖽺𖾐 𖼊𖽑𖽺 𖼄𖽪𖾑 𖼍𖽴𖾑 𖼀𖽦𖾐： 21 “𖼐𖽑𖽡𖾐 𖼽𖽚 𖼍𖽕𖾑 𖼄𖽡𖾐 𖼊𖽺𖾐 𖼠𖽕 𖼺𖽪𖾐 𖼺𖽙 𖼖𖽚 𖼂𖽔𖾐 𖼂𖽚𖾐 𖼷𖽶 𖼄𖽻 𖼈𖽳 𖼖𖽙𖾐 𖼀𖽦𖾐：‘ 𖼣𖽙𖾐 𖼄𖽶 𖼠𖽻𖾐 𖼄𖽡𖾑 𖼐𖽦𖾐 𖼊𖽑𖽺 𖼐𖽑𖽡𖽻𖾐 𖼍𖽪𖾐 𖼖𖽻𖾐 𖼊𖽻𖾐， 22 𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼠𖽚 𖼞𖽑𖽙𖾐 𖼣𖽻𖾐 𖼞𖽳𖾐 𖼳𖽳𖾐 𖼮𖽡𖽺 𖼊𖽑𖽺 𖼀𖽑𖽚𖾐 𖼄𖽡𖾑， 𖼞𖽑𖽻𖾐 𖼂𖽻𖾑 𖼀𖽑𖽙 𖼞𖽳𖾐 𖽂𖽙 𖼐𖽑𖽡𖾐 𖼊𖽑𖽺 𖼀𖽑𖽧𖾐 𖼄𖽶𖾑， 𖼰𖽕𖾑 𖼊𖽝 𖼮𖽑𖽜𖾐 𖼐𖽺𖾐 𖼮𖽑𖽜𖾐 𖼞𖽕 𖼺𖽪𖾐 𖼊𖽑𖽺 𖼊𖽜 𖼀𖽑𖽚𖾐 𖼦𖽑𖽙𖾐 𖼊𖽻𖾐；𖼄𖽪 𖼐𖽺𖾐 𖼄𖽪 𖼞𖽕 𖼺𖽪𖾐 𖼞𖽑𖽙𖾐 𖼣𖽻𖾐 𖼞𖽜 𖼮𖽴𖾐 𖼀𖽜 𖼺𖽺𖾑， 𖼳𖽶𖾐 𖼽𖽻 𖼄𖽳𖾑 𖼈𖽧 𖼐𖽑𖽳𖾐 𖼞𖽳𖾐 𖽃𖽔𖾑 𖼊𖽑𖽙 𖼞𖽑𖽶𖾐 𖼀𖽜 𖼊𖽻𖾐．’
23 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼀𖽦𖾐：‘ 𖼣𖽙𖾐 𖼞𖽳𖾐 𖼮𖽜𖾐 𖼀𖽑𖽙， 𖼺𖽔 𖼖𖽔𖾐 𖼊𖽑𖽡𖽦 𖼞𖽳𖾐 𖼻𖽙 𖼺𖽙 𖼖𖽚 𖼂𖽔𖾐 𖼂𖽚 𖽃𖽔𖾐! 𖼞𖽑𖽶𖾑 𖼊𖽑𖽡 𖼐𖽑𖽡𖾐 𖼮𖽑𖽡𖾐， 𖼣𖽙𖾐 𖼐𖽑𖽡𖾐 𖼊𖽑𖽺 𖼮𖽑𖽳 𖼄𖽶𖾐 𖼊𖽻𖾐．’ 𖼄𖽺 𖼄𖽦 𖼀𖽑𖽙 𖼞𖽳𖾐 𖼈𖽪𖾑 𖼷𖽪𖾐 𖼽𖽺𖾐 𖼦𖽴 𖼦𖽫 𖼀𖽦𖾐：‘ 𖼣𖽙𖾐 𖼐𖽑𖽡𖾐 𖼊𖽑𖽺 𖼷𖽶 𖼊𖽺𖾐 𖼈𖽳 𖼞𖽜 𖼊𖽻𖾐， 𖼞𖽪𖾐 𖼮𖽡𖽺𖾐 𖼣𖽙𖾐 𖼐𖽑𖽡𖾐 𖼊𖽑𖽺 𖼺𖽺𖾐 𖼄𖽳𖾐 𖼳𖽶 𖼣𖽻𖾐．’ ”