𖼽𖽱𖾐 𖼐𖽕 𖼺𖽪𖾑
𖼽𖽱𖾐 𖼐𖽕 𖼽𖽺𖾐 𖼦𖽴 𖼦𖽫 𖼊𖽑𖽺 𖼖𖽺𖾐 𖼈𖽳𖾑
1
1 𖼽𖽺𖾐 𖼦𖽴 𖼦𖽫 𖼽𖽕𖾑 𖼄𖽡 𖼊𖽑𖽦𖾑 𖼞𖽳𖾐 𖼻𖽙 𖼽𖽱𖾐 𖼐𖽕 𖼊𖽑𖽺 𖼀𖽑𖽪𖾐 𖼄𖽪𖾑， 𖼀𖽦𖾐： 2 “𖼐𖽑𖽡𖾐 𖼐𖽕 𖼊𖽺𖾐 𖼐𖽑𖽧 𖼐𖽑𖽧 𖼈𖽪𖽺𖾐 𖼖𖽪𖾐 𖼈𖽳 𖼞𖽳𖾐 𖼽𖽡𖾐， 𖼖𖽪𖾐 𖼞𖽑𖽶𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼦𖽑𖽳𖾐 𖼄𖽪𖾑．𖼞𖽪𖾐 𖼮𖽡𖽺𖾐， 𖼽𖽻 𖼈𖽳𖾐 𖼞𖽳𖾐 𖼽𖽺𖾐 𖼮𖽑𖽡𖽪𖾑 𖼊𖽶𖾐 𖼮𖽑𖽪 𖼀𖽡𖾐 𖼖𖽚𖾐 𖼣𖽙𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽡𖾐 𖼦𖽑𖽻𖾐．”3 𖼽𖽱𖾐 𖼐𖽕 𖼞𖽚 𖼀𖽑𖽚𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽡𖽪 𖼀𖽑𖽻𖾐 𖼺𖽺𖾑， 𖼊𖽑𖽔𖾐 𖼳𖽶𖾐 𖼄𖽡𖾐 𖼊𖽺𖾐 𖼽𖽡𖾐 𖼊𖽻𖾐． 𖼽𖽻 𖼹𖽺𖾐 𖼽𖽡𖾐 𖼽𖽱𖾐 𖼀𖽑𖽕𖾑 𖼖𖽪𖾐 𖼞𖽳𖾐 𖼮𖽑𖽡𖾐， 𖼊𖽑𖽔𖾐 𖼳𖽶𖾐 𖼄𖽡𖾐 𖼊𖽺𖾐 𖼽𖽡𖾐 𖼊𖽻𖾐 𖼺𖽪𖾐 𖼖𖽡𖾑 𖼞𖽑𖽪 𖼊𖽑𖽡 𖼷𖽸 𖼰𖽙𖾐 𖽂𖽙𖾐， 𖼖𖽡𖾑 𖼞𖽑𖽪 𖼊𖽡𖾐 𖼀𖽑𖽶 𖼞𖽜 𖼦𖽑𖽙𖾐， 𖼹𖽺𖾐 𖼽𖽡𖾐 𖼖𖽡𖾑 𖼞𖽑𖽪 𖼊𖽑𖽺 𖼮𖽑𖽡𖾐． 𖼽𖽻 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽡𖽪 𖼀𖽑𖽻𖾐 𖼺𖽺𖾑， 𖼖𖽡𖾑 𖼞𖽑𖽪 𖼊𖽑𖽺 𖼮𖽻𖾐 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼊𖽑𖽔𖾐 𖼳𖽶𖾐 𖼄𖽡𖾐 𖼊𖽺𖾐 𖼽𖽡𖾐．
4 𖽃𖽔𖾐 𖼺𖽺𖾑， 𖼽𖽺𖾐 𖼦𖽴 𖼦𖽫 𖼄𖽶 𖼳𖽡𖽺𖾐 𖼈𖽳 𖼄𖽙𖾐 𖼹𖽡𖾐 𖼄𖽪𖾑 𖼦𖽜𖾐 𖼄𖽙𖾐 𖼊𖽑𖽺 𖼮𖽝 𖼺𖽺𖾑， 𖼦𖽜𖾐 𖼄𖽙𖾐 𖼊𖽑𖽺 𖽃𖽔𖾑 𖼄𖽶 𖼳𖽡𖽺𖾐 𖼈𖽳 𖼄𖽙𖾐 𖼮𖽡𖽮𖾐 𖼖𖽕𖾐 𖼖𖽕𖾐 𖼮𖽝 𖼍𖽪𖾐 𖼖𖽻𖾐， 𖼖𖽡𖾑 𖼞𖽑𖽪 𖼖𖽺𖾑 𖼮𖽑𖽡𖽦 𖼖𖽻𖾐 𖼮𖽻𖾐． 5 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑， 𖼖𖽡𖾑 𖼞𖽑𖽪 𖼊𖽑𖽺 𖼄𖽡𖽻 𖼄𖽪𖾐 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼹𖽻𖾐 𖼮𖽡𖽮𖾐 𖼞𖽴𖾐， 𖼽𖽻 𖼄𖽳𖾑 𖼞𖽳𖾐 𖼺𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐． 𖼖𖽡𖾑 𖼞𖽑𖽪 𖼞𖽜 𖼊𖽑𖽡 𖼀𖽧𖾑 𖼖𖽻𖾑 𖼖𖽻𖾐 𖼮𖽻𖾐 𖼖𖽡𖾐 𖼺𖽺𖾑， 𖼽𖽻 𖼈𖽳𖾐 𖼖𖽡𖾑 𖼞𖽑𖽪 𖼊𖽑𖽺 𖼄𖽡𖽻 𖼐𖽑𖽡 𖼷𖽴𖾐 𖼦𖽜𖾐 𖼄𖽙𖾐 𖼞𖽑𖽶𖾐 𖼹𖽺𖾐．
𖼞𖽚 𖼀𖽑𖽚𖾐， 𖼽𖽱𖾐 𖼐𖽕 𖼹𖽺𖾐 𖼽𖽡𖾐 𖼖𖽡𖾑 𖼞𖽑𖽪 𖼹𖽺𖾐 𖼮𖽨𖾐 𖼞𖽑𖽶𖾑 𖼍𖽚 𖼮𖽻 𖼽𖽦 𖼄𖽳𖾑 𖼦𖽑𖽙𖾐． 6 𖼖𖽡𖾑 𖼞𖽑𖽪 𖼺𖽡 𖼀𖽑𖽙 𖼽𖽱𖾐 𖼐𖽕 𖼞𖽳𖾐 𖼞𖽑𖽻𖾑 𖼮𖽑𖽡𖾐 𖼽𖽻 𖼖𖽙𖾐 𖼀𖽦𖾐： “𖼐𖽑𖽡𖾐 𖽃𖽔𖾐 𖼹𖽻𖾐 𖼦𖽑𖽺𖾑 𖼻𖽻𖾐 𖼽𖽦 𖼄𖽳𖾑 𖼐𖽺𖾑？ 𖼍𖽪𖾐 𖼖𖽻𖾐! 𖼐𖽑𖽡𖾐 𖼞𖽳𖾐 𖼺𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐． 𖼐𖽑𖽡𖾐 𖼞𖽳𖾐 𖼺𖽡𖾐 𖽃𖽔 𖼐𖽺𖾑 𖼊𖽑𖽺 𖼦𖽙𖾑 𖼮𖽑𖽡 𖼂𖽻𖾐 𖼞𖽜 𖼊𖽑𖽡𖾑 𖼣𖽻𖾐， 𖽃𖽔 𖼐𖽺𖾑 𖼞𖽜 𖼄𖽔 𖼳𖽶𖾐 𖼮𖽡𖽦 𖼊𖽻𖾐．”
7 𖼖𖽡𖾑 𖼞𖽑𖽪 𖼊𖽑𖽺 𖼮𖽻𖾐 𖼺𖽪𖾐 𖼷𖽑𖽻𖾐 𖼷𖽙𖾐 𖼖𖽙𖾐 𖼀𖽦𖾐：“𖼖𖽻𖾐 𖼄𖽺! 𖽃𖽔 𖼐𖽺𖾑 𖼖𖽙𖾐 𖼵𖽪𖾐， 𖽃𖽔 𖼐𖽺𖾑 𖼈𖽡𖾑 𖼞𖽑𖽙 𖼷𖽶𖾐 𖼄𖽳𖾐， 𖼦𖽑𖽺𖾑 𖽃𖽔 𖼺𖽺 𖼮𖽑𖽢𖾑 𖼮𖽶𖾐 𖼺𖽪𖾐 𖼣𖽻𖾐 𖼐𖽦𖾐．” 𖼽𖽻 𖼈𖽳𖾐 𖼖𖽙𖾐 𖼵𖽪𖾐 𖼺𖽺𖾑， 𖼽𖽱𖾐 𖼐𖽕 𖼊𖽑𖽺 𖼵𖽪𖾐 𖼄𖽳𖾐． 8 𖼷𖽑𖽻𖾐 𖼞𖽑𖽶𖾑 𖼹𖽻𖾐 𖼽𖽱𖾐 𖼐𖽕 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖼀𖽦𖾐 𖼣𖽙𖾐 𖼈𖽳𖾐 𖼖𖽙𖾐 𖼊𖽑𖽧， 𖽃𖽔 𖼐𖽺𖾑 𖼈𖽡𖾑 𖼞𖽑𖽙 𖼷𖽶𖾐 𖼄𖽳𖾐， 𖼦𖽑𖽺𖾑 𖽃𖽔 𖼺𖽺 𖼮𖽑𖽢𖾑 𖼮𖽶𖾐 𖼺𖽪𖾐 𖼣𖽻𖾐？ 𖼐𖽑𖽡𖾐 𖽃𖽔 𖼊𖽺𖾑 𖼳𖽶 𖼄𖽡𖽻 𖼄𖽪𖾐 𖼺𖽪𖾐 𖼣𖽻𖾐？ 𖽃𖽔 𖼊𖽺𖾑 𖼠𖽻𖾐 𖼮𖽑𖽻𖾐 𖼖𖽻𖾐？ 𖽃𖽔 𖼊𖽺𖾑 𖼠𖽚 𖼷𖽑𖽻𖾐 𖼣𖽻𖾐？ 𖽃𖽔 𖼊𖽺𖾑 𖼳𖽶 𖼀𖽑𖽙 𖼣𖽻𖾐？”
9 𖼽𖽻 𖼊𖽻 𖼞𖽑𖽚：“𖼣𖽙𖾐 𖼳𖽡𖾐 𖼂𖽚 𖼖𖽦 𖼺𖽪𖾐 𖼷𖽑𖽻𖾐 𖼣𖽻𖾐． 𖼣𖽙𖾐 𖼦𖽜𖾐 𖼄𖽙𖾐 𖼐𖽺𖾐 𖼦𖽡𖽳𖾑 𖼄𖽡𖾐 𖼊𖽑𖽺 𖼹𖽸𖾑 𖼺𖽪𖾐， 𖼄𖽶 𖼠𖽻𖾐 𖼊𖽑𖽺 𖼮𖽻𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽡𖽮𖾐 𖼠𖽙𖾐 𖼳𖽙𖾐 𖼺𖽪𖾐 𖼣𖽻𖾐．”
10 𖼽𖽱𖾐 𖼐𖽕 𖼽𖽻 𖼈𖽳𖾐 𖼖𖽙𖾐 𖼀𖽦𖾐 𖼊𖽑𖽧， 𖼽𖽻 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽡𖽪 𖼀𖽑𖽻𖾐． 𖼽𖽻 𖼈𖽳𖾐 𖼺𖽝𖾑 𖼦𖽑𖽻𖾐 𖼺𖽺𖾑， 𖼦𖽑𖽔𖾐 𖼮𖽶𖾐 𖼮𖽡𖽮𖾐 𖼞𖽴𖾐 𖼍𖽪𖾐 𖼖𖽻𖾐， 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖽃𖽔𖾐 𖼹𖽻𖾐 𖼦𖽑𖽺𖾑 𖼻𖽻𖾐 𖼂𖽺𖾐 𖼐𖽺𖾑？” 11 𖼦𖽜𖾐 𖼄𖽙𖾐 𖼈𖽡𖾐 𖼹𖽧𖾑 𖼠𖽳𖾐 𖼠𖽳𖾐 𖼮𖽝 𖼈𖽳 𖼍𖽪𖾐 𖼖𖽻𖾐， 𖼽𖽻 𖼈𖽳𖾐 𖼽𖽻 𖼊𖽑𖽺 𖼊𖽻 𖼐𖽙𖾐 𖼀𖽦𖾐：“𖼣𖽙𖾐 𖼈𖽳𖾐 𖼐𖽑𖽡𖾐 𖼊𖽑𖽺 𖽃𖽔 𖼊𖽺𖾐 𖼂𖽺𖾐 𖼖𖽡𖾐？ 𖽃𖽔𖾐 𖼺𖽺𖾑， 𖼦𖽜𖾐 𖼄𖽙𖾐 𖼈𖽡𖾐 𖼹𖽧𖾑 𖽂𖽙𖾐 𖼐𖽙 𖼹𖽺𖾐 𖼊𖽙𖾐．”
12 𖼽𖽱𖾐 𖼐𖽕 𖼊𖽻 𖼞𖽑𖽚 𖼀𖽦𖾐：“𖼐𖽑𖽡𖾐 𖼈𖽳𖾐 𖼣𖽙𖾐 𖼊𖽑𖽺 𖼮𖽑𖽳 𖼍𖽪𖾐 𖼖𖽻𖾐， 𖼷𖽴𖾐 𖼦𖽜𖾐 𖼄𖽙𖾐 𖼞𖽑𖽶𖾐 𖼹𖽺𖾐， 𖼦𖽜𖾐 𖼄𖽙𖾐 𖼈𖽡𖾐 𖼹𖽧𖾑 𖼐𖽙 𖼹𖽺𖾐 𖼊𖽻𖾐． 𖼣𖽙𖾐 𖼺𖽝𖾑， 𖼣𖽙𖾐 𖼮𖽑𖽢𖾑 𖼮𖽶𖾐 𖼺𖽺𖾑， 𖼐𖽑𖽡𖾐 𖼈𖽳𖾐 𖼮𖽡𖽮𖾐 𖼖𖽕𖾐 𖼖𖽕𖾐 𖼮𖽝 𖼺𖽪𖾐 𖽃𖽔𖾑 𖼄𖽶 𖼳𖽡𖽺𖾐 𖼈𖽳 𖼦𖽑𖽺𖾑 𖼷𖽶𖾐 𖼄𖽳𖾐 𖼳𖽶 𖼣𖽻𖾐．”
13 𖼞𖽚 𖼀𖽑𖽚𖾐， 𖼽𖽻 𖼈𖽳𖾐 𖽂𖽙 𖼊𖽑𖽧 𖼄𖽙𖾐 𖼖𖽡𖾑 𖼞𖽑𖽪 𖼈𖽝𖾐， 𖼀𖽑𖽚𖾐 𖼦𖽜𖾐 𖼄𖽙𖾐 𖼦𖽜 𖼞𖽚 𖼽𖽡𖾐 𖼊𖽡 𖼮𖽑𖽻． 𖼦𖽑𖽻𖾐 𖼊𖽑𖽻𖾐， 𖼦𖽜𖾐 𖼄𖽙𖾐 𖼈𖽡𖾐 𖼹𖽧𖾑 𖼠𖽳𖾐 𖼠𖽳𖾐 𖼈𖽳 𖼍𖽪𖾐 𖼖𖽻𖾐， 𖼀𖽑𖽚𖾐 𖼄𖽡𖾑 𖼽𖽻 𖼈𖽳𖾐 𖼞𖽳𖾐 𖼖𖽻𖾐 𖼺𖽺𖾑， 𖼽𖽻 𖼈𖽳𖾐 𖼠𖽚 𖼽𖽡𖾐 𖼍𖽪𖾐 𖼄𖽔 𖼊𖽙𖾐． 14 𖼽𖽻 𖼈𖽳𖾐 𖼮𖽑𖽡𖽪 𖼈𖽳 𖼄𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼮𖽑𖽡 𖼮𖽡𖽺𖾐， 𖼀𖽦𖾐：“𖼽𖽺𖾐 𖼦𖽴 𖼦𖽫 𖽃𖽔𖾐! 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐， 𖼣𖽙𖾐 𖼈𖽳𖾐 𖼷𖽑𖽻𖾐 𖼦𖽑𖽺𖾑 𖼽𖽚𖾐 𖼊𖽑𖽺 𖼈𖽪𖾑 𖼠𖽻𖾐 𖼦𖽹𖾑 𖼀𖽑𖽧𖾐 𖼊𖽑𖽻𖾐， 𖼣𖽙𖾐 𖼈𖽳𖾐 𖼞𖽜 𖼳𖽶𖾐 𖼮𖽡𖽦 𖼊𖽑𖽔 𖼷𖽶𖾐 𖼞𖽜；𖼳𖽶𖾐 𖼄𖽔 𖼷𖽻 𖼺𖽪𖾐 𖼷𖽑𖽻𖾐 𖼊𖽑𖽺 𖼈𖽪𖾑 𖼠𖽻𖾐 𖼦𖽑𖽙𖾐 𖼞𖽳𖾐 𖼽𖽺𖾐 𖼮𖽑𖽡𖽪𖾑， 𖼀𖽑𖽨 𖼣𖽙𖾐 𖼈𖽳𖾐 𖼊𖽑𖽺 𖼊𖽑𖽔 𖼍𖽦𖾐 𖼞𖽜． 𖼞𖽪𖾐 𖼮𖽡𖽺𖾐， 𖼽𖽺𖾐 𖼦𖽴 𖼦𖽫 𖼐𖽑𖽡𖾐 𖼦𖽑𖽺𖾑 𖼽𖽻 𖼄𖽳𖾑 𖼣𖽝 𖼮𖽑𖽡𖽺 𖼖𖽙𖾐 𖼮𖽑𖽻𖾐 𖼄𖽡𖽻 𖼂𖽺𖾐 𖼳𖽶 𖼣𖽻𖾐．”
15 𖽃𖽔𖾐 𖼺𖽺𖾑， 𖼽𖽻 𖼈𖽳𖾐 𖼽𖽱𖾐 𖼐𖽕 𖼊𖽑𖽺 𖼮𖽑𖽳 𖼍𖽪𖾐 𖼖𖽻𖾐， 𖼷𖽴𖾐 𖼦𖽜𖾐 𖼄𖽙𖾐 𖼞𖽑𖽶𖾐 𖼹𖽺𖾐 𖼦𖽑𖽙𖾐， 𖼦𖽜𖾐 𖼄𖽙𖾐 𖼈𖽡𖾐 𖼹𖽧𖾑 𖼖𖽺𖾑 𖼐𖽙 𖼹𖽺𖾐 𖼦𖽑𖽻𖾐． 16 𖼷𖽑𖽻𖾐 𖼞𖽑𖽶𖾑 𖼹𖽻𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼦𖽑𖽔𖾐 𖼮𖽶𖾐 𖼮𖽡𖽮𖾐 𖼷𖽑𖽚， 𖼍𖽡𖾐 𖼊𖽪𖾐 𖼈𖽺𖾐 𖼽𖽻 𖼊𖽑𖽺 𖼍𖽡𖾐， 𖼦𖽑𖽔𖾐 𖼖𖽺𖾑 𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼄𖽳𖾐 𖼷𖽑𖽦𖾐 𖼊𖽻 𖼊𖽑𖽜𖾐．
17 𖼽𖽱𖾐 𖼐𖽕 𖼊𖽑𖽺 𖼷𖽴𖾐 𖼦𖽜𖾐 𖼄𖽙𖾐 𖼞𖽑𖽶𖾐 𖼹𖽺𖾐 𖼦𖽑𖽙𖾐 𖼠𖽙𖾑 𖼍𖽻𖾐， 𖼽𖽺𖾐 𖼦𖽴 𖼦𖽫 𖼣𖽙𖾑 𖼈𖽳 𖼊𖽑𖽡 𖼮𖽑𖽡𖾐 𖼹𖽡𖾐 𖼄𖽪𖾑 𖼽𖽻 𖼊𖽑𖽺 𖼊𖽻𖾐 𖼦𖽑𖽙𖾐， 𖼽𖽻 𖼞𖽜 𖼣𖽙𖾑 𖼦𖽑𖽦 𖼂𖽙𖾐 𖼞𖽑𖽶𖾐 𖼺𖽙𖾐 𖼐𖽑𖽡𖾐 𖼺𖽙𖾐 𖼦𖽑𖽦 𖼮𖽻𖾐．