𖼽𖽡 𖼺𖽶𖾐 𖼊𖽑𖽡𖽦 𖼺𖽪𖾑
𖼽𖽕𖾑 𖼦𖽔𖾐 𖼺𖽪𖽧 𖼖𖽪 𖼻𖽦 𖼷𖽙𖾐 𖼂𖽺𖾐 𖼳𖽡𖽻𖾐
1
1 𖼽𖽕𖾑 𖼦𖽔𖾐 𖼺𖽪𖽧 𖼖𖽪 𖼈𖽪𖾐 𖼍𖽦 𖼂𖽺𖾐 𖼞𖽑𖽶𖾑 𖼮𖽶𖾐， 𖼽𖽻 𖼽𖽺𖾑 𖼍𖽪𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼠𖽪 𖼳𖽸 \fr 1．1 \ft “𖼠𖽪 𖼳𖽸 ” 𖼦𖽑𖽺𖾑 𖽃𖽔𖾑 𖼄𖽳𖾐 𖼞𖽳𖾐 “𖽃𖽦𖾐 𖼺𖽦𖾑 𖽃𖽴 𖼂𖽡 𖼽𖽕𖾑 ” 𖼣𖽻𖾐． 𖼄𖽡𖾐 𖼊𖽺𖾐 𖼖𖽙𖾐 𖼮𖽑𖽡𖾐， 𖼄𖽡𖾐 𖼊𖽺𖾐 𖼊𖽑𖽡 𖼦𖽑𖽙𖾐 𖼐𖽑𖽡 𖼷𖽑𖽡𖾐 𖼳𖽶 𖼊𖽝𖾐 𖼊𖽑𖽺 𖼠𖽕． 2 𖼽𖽻 𖼳𖽪𖾐 𖼳𖽔𖾐 𖼖𖽪𖾐 𖼞𖽳𖾐 𖼮𖽻𖾐 𖼈𖽪𖾐 𖼍𖽦 𖼂𖽺𖾐． 3 𖼽𖽻 𖼈𖽪𖾐 𖼍𖽦 𖼂𖽺𖾐 𖼺𖽙𖾐 𖼞𖽑𖽚 𖼞𖽑𖽶𖾑 𖼞𖽑𖽚， 𖼈𖽪𖾑 𖼷𖽪𖾐 𖼐𖽺𖾐 𖼷𖽶 𖼄𖽻 𖼖𖽙𖾐 𖼀𖽙𖾐 𖼻𖽦 𖼷𖽙𖾐 𖼂𖽺𖾐， 𖼂𖽙𖾐 𖼺𖽶𖾐 𖼄𖽡𖾐 𖼊𖽺𖾐 𖼐𖽺𖾐 𖼄𖽔 𖼍𖽦𖾑 𖼄𖽡𖾐 𖼊𖽺𖾐 𖼞𖽳𖾐 𖼀𖽑𖽶 𖼊𖽴 𖼷𖽶 𖼊𖽺𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼹𖽻𖾐， 𖼹𖽦𖾑 𖼠𖽳𖾐 𖼖𖽪𖾐 𖼄𖽡𖾐 𖼊𖽺𖾐 𖼞𖽳𖾐 𖼀𖽑𖽶 𖼊𖽴 𖼷𖽑𖽻𖾐 𖼐𖽺𖾐 𖼈𖽪𖾑 𖼷𖽪𖾐 𖼖𖽺𖾑 𖼄𖽳𖾑 𖼄𖽳 𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼮𖽻𖾐． 4 𖼽𖽻 𖼞𖽑𖽙𖾐 𖼠𖽕 𖼺𖽪𖾐 𖼠𖽚 𖼞𖽳𖾐 𖼀𖽑𖽶 𖼊𖽴 𖼀𖽻𖾐 𖼀𖽡𖾐 𖼐𖽺𖾐 𖼽𖽻 𖼞𖽳𖾐 𖼷𖽶 𖼊𖽺𖾐 𖼄𖽶 𖼳𖽳𖾐 𖼀𖽑𖽨 𖼽𖽻 𖼈𖽳𖾐 𖼞𖽜 𖼐𖽦𖾐， 𖼦𖽑𖽔𖾐 𖼮𖽶𖾐 𖼊𖽑𖽡 𖼳𖽕𖾐 𖼦𖽑𖽺𖾑 𖼖𖽙𖾐 𖼺𖽶𖾑 𖼂𖽺𖾐 𖼦𖽑𖽙𖾐， 𖼀𖽡𖾑 𖼀𖽡𖾐 𖼊𖽑𖽡 𖼦𖽑𖽙𖾐 𖼦𖽑𖽦 𖼷𖽑𖽡𖾐 𖼐𖽑𖽡𖾐 𖼖𖽚．5 𖼐𖽑𖽡𖾐 𖼦𖽑𖽦 𖼦𖽑𖽺𖾑 𖼠𖽚 𖼦𖽑𖽙𖾐 𖼠𖽙𖾑 𖼍𖽻𖾐， 𖼈𖽪𖾐 𖼍𖽦 𖼹𖽦𖾑 𖼳𖽪𖾐 𖼳𖽔𖾐 𖼖𖽪𖾐 𖼞𖽳𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼀𖽺 𖼖𖽙𖾐 𖼀𖽙𖾐 𖼺𖽺𖾑， 𖼈𖽪𖾐 𖼍𖽦 𖼞𖽳𖾐 𖼈𖽦𖾐 𖼖𖽪𖾐 𖼮𖽑𖽨𖾐 𖼖𖽪𖾐 𖼞𖽪𖾐 𖼞𖽑𖽶𖾐 𖼮𖽡𖽺 𖼞𖽪 𖼠𖽻𖾐 𖼊𖽑𖽺 𖼻𖽦 𖼷𖽙𖾐 𖼂𖽺𖾐 𖼍𖽙𖽙𖾑， 𖼀𖽑𖽶 𖼊𖽴 𖼺𖽪𖾐 𖼷𖽑𖽻𖾐 𖼣𖽻𖾐 𖼦𖽻， 𖼷𖽑𖽻𖾐 𖼞𖽫 𖼣𖽻𖾐 𖼦𖽻， 𖼈𖽳 𖼺𖽪𖾐 𖼣𖽻𖾐 𖼦𖽻， 𖼽𖽳𖾐 𖼺𖽪𖾐 𖼣𖽻𖾐 𖼦𖽻， 𖼻𖽦 𖼷𖽙𖾐 𖼳𖽶 𖼐𖽑𖽡𖾐 𖼷𖽙 𖼦𖽑𖽙𖾐． 6 𖼈𖽪𖾐 𖼍𖽦 𖼞𖽳𖾐 𖼈𖽦𖾐 𖼖𖽪𖾐 𖼮𖽑𖽨𖾐 𖼖𖽪𖾐 𖼞𖽪𖾐 𖼞𖽑𖽶𖾐 𖼮𖽑𖽨𖾑 𖼮𖽑𖽙𖾐 𖼀𖽑𖽨𖾑 𖼀𖽑𖽨𖾐 𖼐𖽺𖾐 𖼰𖽨𖾑 𖼍𖽻𖾑 𖼄𖽳𖾐 𖼖𖽕𖾑 𖼖𖽕 𖼞𖽑𖽶𖾑 𖼳𖽶 𖼮𖽻𖾐， 𖼽𖽦 𖼄𖽳𖾐 𖼮𖽑𖽡𖾐 𖼄𖽶𖾑 𖼄𖽶𖾐、 𖼐𖽑𖽡𖾐 𖼀𖽸 𖼺𖽪𖾐 𖼰𖽕𖾐 𖼈𖽝 𖼀𖽑𖽳𖾐 𖼺𖽺𖾑， 𖼀𖽑𖽨𖾐 𖼠𖽪𖾐 𖼖𖽪𖾐 𖼐𖽺𖾐 𖼻𖽶𖾐 𖼈𖽡𖾑 𖼖𖽚𖾐 𖼊𖽑𖽺 𖼍𖽡；𖼀𖽑𖽨𖾐 𖼳𖽳𖾐 𖼻𖽜 𖼹𖽸𖾑 𖼺𖽪𖾐 𖼊𖽡𖾐 𖼊𖽪𖾐 \fr 1．6 \ft “𖼊𖽡𖾐 𖼊𖽪𖾐 ” 𖼦𖽑𖽺𖾑 𖼊𖽑𖽺 𖼽𖽦 𖼖𖽺𖾑 𖼽𖽦 𖼀𖽑𖽢 𖼊𖽙𖾐． 𖼀𖽑𖽨 𖼺𖽺𖾑， 𖼐𖽑𖽡𖾑 𖼐𖽑𖽡𖾐、 𖼀𖽑𖽨𖾑 𖼀𖽑𖽨𖾐、 𖼳𖽳𖾑 𖼳𖽳𖾐 𖼐𖽺𖾐 𖼐𖽦𖾑 𖼐𖽦𖾐 𖼞𖽑𖽶𖾑 𖼳𖽶 𖼖𖽚𖾐 𖼄𖽙𖾐 𖼞𖽑𖽻 𖼺𖽪𖾐 𖼄𖽡𖾑 𖼐𖽦𖾐 𖼊𖽑𖽺 𖼍𖽙𖾑．
7 𖼮𖽶𖾐 𖼺𖽡𖾑 𖼖𖽺𖾑 𖼳𖽳𖾐 𖼈𖽺𖾐 𖼂𖽺𖾐 𖼺𖽪𖾐 𖼣𖽻𖾐， 𖼊𖽑𖽡 𖼊𖽝𖾐 𖼖𖽺𖾑 𖼊𖽑𖽡 𖼊𖽝𖾐 𖼖𖽙𖾐 𖼄𖽔 𖼺𖽶𖾑， 𖼈𖽪𖾐 𖼍𖽦 𖼞𖽜 𖼺𖽪𖾐 𖼮𖽶𖾐 𖼀𖽳 𖼦𖽑𖽔𖾐 𖼮𖽶𖾐 𖼄𖽨， 8 𖼮𖽶𖾐 𖼀𖽳 𖼊𖽻𖾐 𖼞𖽑𖽶𖾑 𖼮𖽶𖾐 𖼍𖽧𖾑 𖼷𖽑𖽦𖾐 𖼖𖽙𖾐 𖼮𖽑𖽻𖾐， 𖼷𖽙𖾐 𖼖𖽙𖾐 𖼄𖽔 𖼖𖽦𖾑， 𖼞𖽪𖾐 𖼮𖽡𖽺𖾐 𖼈𖽪𖾐 𖼍𖽦 𖼽𖽻 𖼞𖽳𖾐 𖼷𖽶 𖼄𖽻 𖼖𖽙𖾐 𖼀𖽦𖾐 𖼷𖽑𖽦𖾐， 𖼷𖽑𖽻𖾐 𖼽𖽻 𖼄𖽳𖾑 𖼐𖽑𖽧𖾐 𖼺𖽳 𖼖𖽙𖾐 𖼮𖽑𖽻𖾐 𖽂𖽙𖾐 𖼊𖽻𖾐 𖼊𖽙𖾐．
𖽂𖽗 𖼳𖽸 𖼊𖽑𖽧 𖼈𖽪𖾐 𖼍𖽦 𖼀𖽦𖾐 𖼖𖽙𖾐 𖼄𖽔 𖼮𖽑𖽻𖾐
9 𖼽𖽕𖾑 𖼦𖽔𖾐 𖼺𖽪𖽧 𖼖𖽪 𖼈𖽪𖾐 𖼍𖽦 𖼞𖽳𖾐 𖼄𖽳 𖼻𖽙 𖽂𖽗 𖼳𖽸 𖼊𖽑𖽧 ， 𖼽𖽻 𖼖𖽺𖾑 𖼈𖽪𖾐 𖼍𖽦 𖼦𖽑𖽺𖾐 𖼞𖽑𖽶𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼖𖽙𖾐 𖼀𖽙𖾐 𖼻𖽦 𖼷𖽙𖾐 𖼂𖽺𖾐．
10 𖼳𖽶 𖼐𖽑𖽡𖾐 𖼞𖽑𖽶𖾑 𖼊𖽑𖽡 𖼐𖽑𖽡𖾐， 𖼽𖽕𖾑 𖼦𖽔𖾐 𖼺𖽪𖽧 𖼖𖽪 𖼈𖽪𖾐 𖼍𖽦 𖼮𖽶𖾐 𖼀𖽳 𖼊𖽻𖾐 𖼐𖽑𖽧𖾐 𖼄𖽙𖾐 𖼞𖽜𖾐 𖼺𖽜𖾐 𖼺𖽺𖾑， 𖼽𖽻 𖼊𖽑𖽺 𖼠𖽙𖾐 𖼳𖽙𖾐 𖼺𖽪𖾐 𖼊𖽑𖽦𖾑 𖼰𖽡𖽺𖾐 \fr 1．10 \ft “𖼊𖽑𖽦𖾑 𖼰𖽡𖽺𖾐 ” 𖼦𖽑𖽺𖾑 𖼳𖽡𖽦𖾑 𖼈𖽪𖾐 𖼣𖽻𖾐， 𖼐𖽙𖾑 𖼦𖽑𖽙𖾐 𖼺𖽪𖾐 𖼷𖽶 𖼄𖽻 𖼐𖽺𖾐 𖼮𖽜𖾐 𖼀𖽑𖽙 𖼖𖽙𖾐 𖼀𖽦𖾐 𖼺𖽪𖾐 𖼣𖽻𖾐． 𖼄𖽡 𖼦𖽪𖾑 𖼄𖽕𖾑、 𖼂𖽡 𖼺𖽶𖾐 𖼊𖽑𖽔𖾐、 𖼦𖽔𖾐 𖼂𖽙𖾐 𖼐𖽕、 𖼂𖽡 𖼠𖽴 𖼊𖽑𖽔𖾐、 𖼽𖽕𖾑 𖼂𖽕 𖼊𖽑𖽔𖾐、 𖼳𖽡𖾐 𖼍𖽕 𖼐𖽺𖾐 𖼰𖽡𖽕 𖼰𖽡𖽔𖾐 𖼦𖽑𖽺𖾑 𖼳𖽶 𖼽𖽚𖾐 𖼖𖽙𖾐 𖼀𖽦𖾐 𖼄𖽪𖾑， 11 𖼽𖽡𖾐 𖼈𖽪𖾐 𖼍𖽦 𖼄𖽳 𖼻𖽙 𖽂𖽗 𖼳𖽸 𖼊𖽑𖽧 𖼊𖽑𖽺 𖽃𖽶𖾐 𖼺𖽺𖾑， 𖼽𖽻 𖼞𖽜 𖼈𖽪𖾐 𖼍𖽦 𖼄𖽳 𖼻𖽙 𖼞𖽳𖾐 𖼍𖽕 𖼰𖽡𖾐 𖼊𖽴 𖼍𖽳𖾐， 𖼦𖽳 𖼈𖽪𖾐 𖼍𖽦 𖽃𖽙𖾑 𖼄𖽺 𖼮𖽑𖽡𖽺 𖼖𖽻𖾐 𖼖𖽡𖾐， 𖼷𖽑𖽻𖾐 𖼷𖽪𖾐 𖼐𖽺𖾐 𖼷𖽶 𖼄𖽻 𖼞𖽜 𖼽𖽻 𖼞𖽳𖾐 𖼐𖽑𖽧𖾐 𖼐𖽜𖾑 𖼊𖽑𖽺 𖽂𖽙𖾐 𖼐𖽦𖾐 𖼊𖽙𖾐， 𖼞𖽪𖾐 𖼮𖽡𖽺𖾐 𖼽𖽻 𖼦𖽑𖽔𖾐 𖼮𖽶𖾐 𖼽𖽚𖾐 𖼐𖽑𖽧𖾐 𖼐𖽜𖾑． 12 𖼈𖽪𖾐 𖼍𖽦 𖼞𖽳𖾐 𖼄𖽳 𖼻𖽙 𖽂𖽗 𖼳𖽸 𖼊𖽑𖽧 ， 𖼽𖽻 𖼊𖽑𖽦𖾑 𖼰𖽡𖽺𖾐 𖼞𖽑𖽙𖾐 𖼀𖽦𖾐 𖼺𖽪𖾐 𖼈𖽪𖾐 𖼍𖽦 𖼞𖽳𖾐 𖼄𖽪𖾑 𖼊𖽻 𖼖𖽙𖾐 𖼄𖽔 𖼮𖽑𖽻𖾐 𖼺𖽺𖾑， 𖼈𖽪𖾐 𖼍𖽦 𖼦𖽑𖽔𖾐 𖼮𖽶𖾐 𖼀𖽶 𖼻𖽶， 𖼐𖽑𖽧𖾐 𖼄𖽙𖾐 𖽃𖽔𖾐 𖼍𖽚𖾑 𖼮𖽑𖽡𖽪𖾐 𖼖𖽙𖾐 𖼺𖽶𖾑．
𖽂𖽗 𖼳𖽸 𖼊𖽑𖽧 𖼞𖽜 𖼈𖽪𖾐 𖼍𖽦 𖼄𖽳 𖼻𖽙 𖼄𖽔 𖼂𖽺𖾐
13 𖽃𖽔𖾐 𖼺𖽺𖾑 𖼈𖽪𖾐 𖼍𖽦 𖼞𖽑𖽻𖾑 𖼄𖽡𖽻 𖼮𖽨𖾐 𖼄𖽡𖾐 𖼀𖽻𖾐 𖼺𖽪𖾐 𖼈𖽪𖾐 𖼺𖽝𖾑 𖼷𖽑𖽻𖾐 𖼊𖽑𖽺 𖼊𖽻 𖼐𖽙𖾐， 𖼞𖽪𖾐 𖼮𖽡𖽺𖾐 𖼈𖽪𖾐 𖼍𖽦 𖽃𖽙𖾑 𖼄𖽺 𖼊𖽑𖽙 𖼖𖽙𖾐 𖼺𖽶𖾑， 𖼄𖽡𖽻 𖼂𖽺𖾐 𖼊𖽻𖾐 𖼞𖽑𖽶𖾑 𖼮𖽶𖾐， 𖼳𖽪𖾐 𖼮𖽨𖾐 𖼄𖽡𖾐 𖼂𖽻𖾐 𖼺𖽪𖾐 𖼄𖽡𖽻 𖼦𖽑𖽺 𖼷𖽶 𖼄𖽻 𖼖𖽙𖾐 𖽃𖽙𖾑 𖼄𖽺 𖼊𖽻 𖼐𖽙𖾐． 14 𖼞𖽑𖽶𖾑 𖼮𖽶𖾐 𖼈𖽪𖾐 𖼍𖽦 𖼀𖽙 𖼮𖽑𖽶𖾐 𖼮𖽻𖾐 𖼺𖽪𖾐， 𖼂𖽙𖾐 𖼺𖽶𖾐 𖼄𖽡𖾐 𖼊𖽺𖾐 𖼐𖽺𖾐 𖼄𖽔 𖼍𖽦𖾑 𖼄𖽡𖾐 𖼊𖽺𖾐 𖼞𖽳𖾐 𖼷𖽶 𖼄𖽻 𖼰𖽡𖽕 𖼳𖽶𖾑 𖼐𖽕、 𖼳𖽶𖾑 𖼍𖽕、 𖼽𖽔𖾐 𖼄𖽔 𖼊𖽑𖽔𖾐、 𖼊𖽑𖽔𖾐 𖼳𖽶𖾐 𖼺𖽶𖾐、 𖼄𖽡 𖼖𖽧𖾑、 𖼄𖽔 𖼳𖽡𖾐 𖼐𖽕 𖼐𖽺𖾐 𖼄𖽡 𖼄𖽪 𖼠𖽔𖾐 𖼦𖽑𖽺𖾑 𖼳𖽶 𖼽𖽚𖾐 𖼣𖽻𖾐， 𖼽𖽻 𖼈𖽳𖾐 𖼄𖽔 𖼐𖽙 𖼄𖽙𖾐 𖼈𖽪𖾐 𖼍𖽦 𖼊𖽑𖽺 𖽂𖽙𖾐 𖼄𖽡𖽻𖾐， 𖼠𖽚 𖼠𖽻𖾐 𖼞𖽑𖽶𖾐 𖼷𖽶 𖼊𖽺𖾐 𖼈𖽳 𖼮𖽻𖾐 𖼺𖽪𖾐 𖼣𖽻𖾐．
15 𖼈𖽪𖾐 𖼍𖽦 𖼽𖽻 𖼈𖽳𖾐 𖼊𖽑𖽺 𖼊𖽻 𖼐𖽙𖾐， 𖼀𖽦𖾐：“𖼈𖽪𖾐 𖼍𖽦 𖼞𖽳𖾐 𖼄𖽳 𖼻𖽙 𖽂𖽗 𖼳𖽸 𖼊𖽑𖽧 ， 𖼽𖽻 𖼊𖽑𖽦𖾑 𖼰𖽡𖽺𖾐 𖼞𖽑𖽙𖾐 𖼀𖽦𖾐 𖼺𖽪𖾐 𖼽𖽕𖾑 𖼦𖽔𖾐 𖼺𖽪𖽧 𖼖𖽪 𖼈𖽪𖾐 𖼍𖽦 𖼞𖽳𖾐 𖼄𖽪𖾑 𖼊𖽻 𖼖𖽙𖾐 𖼮𖽑𖽻𖾐 𖼄𖽔 𖼂𖽺𖾐， 𖼳𖽪𖾐 𖼮𖽨𖾐 𖼖𖽙𖾐 𖼮𖽑𖽻𖾐 𖼽𖽻 𖼊𖽑𖽺 𖽃𖽔 𖼊𖽺𖾐 𖼂𖽺𖾐 𖼖𖽡𖾐 𖼐𖽺𖾑？”
16 𖼄𖽡 𖼄𖽪 𖼠𖽔𖾐 𖼞𖽑𖽻𖾑 𖼈𖽪𖾐 𖼍𖽦 𖼐𖽺𖾐 𖼷𖽶 𖼄𖽻 𖼞𖽑𖽶𖾑 𖼹𖽻𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽻𖾐 𖼊𖽻 𖼞𖽑𖽚， 𖼀𖽦𖾐：“𖼈𖽪𖾐 𖼍𖽦 𖼞𖽳𖾐 𖼄𖽳 𖼻𖽙 𖽂𖽗 𖼳𖽸 𖼊𖽑𖽧 ， 𖼽𖽻 𖼈𖽪𖾐 𖼍𖽦 𖼊𖽑𖽺 𖼍𖽺𖾑 𖼮𖽑𖽡𖽺 𖼂𖽚𖾐 𖼄𖽔 𖼣𖽻𖾐， 𖼦𖽑𖽔𖾐 𖼖𖽺𖾑 𖼽𖽕𖾑 𖼦𖽔𖾐 𖼺𖽪𖽧 𖼖𖽪 𖼈𖽪𖾐 𖼍𖽦 𖼞𖽑𖽙𖾐 𖼠𖽕 𖼺𖽪𖾐 𖼄𖽡𖾐 𖼊𖽺𖾐 𖼞𖽳𖾐 𖼷𖽶 𖼄𖽻 𖼐𖽺𖾐 𖼻𖽙 𖼐𖽜𖾐 𖼄𖽳𖾑 𖼄𖽳 𖼊𖽑𖽺 𖼮𖽑𖽡𖽺 𖼂𖽚𖾐 𖼦𖽑𖽻𖾐． 17 𖼞𖽪𖾐 𖼮𖽡𖽺𖾐 𖼈𖽪𖾐 𖼍𖽦 𖼞𖽳𖾐 𖼄𖽳 𖼻𖽙 𖼞𖽑𖽙𖾐 𖼂𖽺𖾐 𖼺𖽪𖾐 𖼄𖽡𖽻， 𖼦𖽑𖽺𖾑 𖼷𖽑𖽜𖾑 𖼷𖽑𖽜𖾐 𖼦𖽑𖽺 𖼻𖽙 𖼄𖽳 𖼄𖽡𖾐 𖼐𖽜𖾐 𖼞𖽑𖽙𖾐 𖼣𖽻𖾐 𖼺𖽪𖾐 𖼞𖽜 𖼊𖽻 𖼮𖽨 𖼊𖽻𖾐， 𖽃𖽔𖾐 𖼺𖽺𖾑 𖼽𖽻 𖼈𖽳𖾐 𖼷𖽑𖽻𖾐 𖼀𖽑𖽙 𖼊𖽑𖽺 𖼐𖽦𖾐 𖼄𖽔 𖼍𖽪𖾐 𖼊𖽻𖾐， 𖼀𖽦𖾐：‘ 𖼽𖽕𖾑 𖼦𖽔𖾐 𖼺𖽪𖽧 𖼖𖽪 𖼈𖽪𖾐 𖼍𖽦 𖼷𖽑𖽻𖾐 𖼹𖽡𖾐 𖼽𖽻 𖼄𖽳 𖼻𖽙 𖽂𖽗 𖼳𖽸 𖼊𖽑𖽧 𖼊𖽑𖽺 𖼦𖽳 𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼽𖽡𖾐 𖼖𖽡𖾐 𖼀𖽦𖾐， 𖼦𖽑𖽻𖾐 𖼊𖽑𖽻𖾐 𖼽𖽻 𖼄𖽔 𖼽𖽡𖾐．’ 18 𖽃𖽔𖾑 𖼄𖽳𖾐 𖼂𖽙𖾐 𖼺𖽶𖾐 𖼄𖽡𖾐 𖼊𖽺𖾐 𖼐𖽺𖾐 𖼄𖽔 𖼍𖽦𖾑 𖼄𖽡𖾐 𖼊𖽺𖾐 𖼞𖽳𖾐 𖼷𖽶 𖼄𖽻 𖼄𖽳 𖼻𖽙 𖼐𖽺𖾐 𖼻𖽙 𖼄𖽳 𖼞𖽑𖽙𖾐 𖼣𖽻𖾐， 𖼈𖽪𖾐 𖼍𖽦 𖼄𖽳 𖼻𖽙 𖼞𖽳𖾐 𖼄𖽡𖽻 𖼦𖽑𖽺𖾑 𖼊𖽻 𖼮𖽨 𖼺𖽺𖾑， 𖼷𖽑𖽜𖾑 𖼷𖽑𖽜𖾐 𖼷𖽶 𖼄𖽻 𖼊𖽑𖽺 𖼖𖽺𖾑 𖼊𖽻 𖼮𖽶𖾐 𖼄𖽔 𖼦𖽶𖾐 𖼊𖽻𖾐． 𖼦𖽑𖽺𖾑 𖼻𖽻𖾐 𖼊𖽑𖽡𖾑 𖼣𖽻𖾐， 𖼐𖽦𖾐 𖼄𖽔 𖼍𖽪𖾐 𖼐𖽺𖾐 𖼦𖽻𖾐 𖼊𖽦 𖼞𖽳𖾐 𖼄𖽡𖽻 𖼞𖽑𖽶𖾑 𖼄𖽔 𖼐𖽙 𖼮𖽻𖾐 𖼊𖽻𖾐 𖼳𖽶 𖼣𖽻𖾐．
19 𖼈𖽪𖾐 𖼍𖽦 𖼐𖽑𖽡𖾐 𖼐𖽑𖽧𖾐 𖼺𖽳 𖼊𖽑𖽡𖾑 𖼣𖽻𖾐， 𖼐𖽑𖽡𖾐 𖼄𖽡𖽻 𖼍𖽻𖾑 𖼺𖽪𖾑 𖼈𖽝 𖼂𖽙𖾐 𖼺𖽶𖾐 𖼄𖽡𖾐 𖼊𖽺𖾐 𖼐𖽺𖾐 𖼄𖽔 𖼍𖽦𖾑 𖼄𖽡𖾐 𖼊𖽺𖾐 𖼞𖽳𖾐 𖼳𖽪𖾐 𖼮𖽨𖾐 𖼞𖽑𖽶𖾐 𖼰𖽡𖽺𖾐 𖼊𖽙𖾐， 𖼻𖽳𖾐 𖼹𖽦𖾐 𖽂𖽙𖾐 𖼀𖽑𖽧𖾐 𖼄𖽔 𖼊𖽙𖾐． 𖽂𖽗 𖼳𖽸 𖼊𖽑𖽧 𖼞𖽜 𖼹𖽦𖾑 𖼽𖽕𖾑 𖼦𖽔𖾐 𖼺𖽪𖽧 𖼖𖽪 𖼈𖽪𖾐 𖼍𖽦 𖽃𖽙𖾑 𖼄𖽺 𖼮𖽑𖽡𖽺 𖽂𖽙𖾐 𖼖𖽻𖾐 𖼄𖽔 𖼊𖽙𖾐， 𖼹𖽦𖾑 𖼽𖽻 𖼦𖽶𖾑 𖼄𖽔 𖼷𖽑𖽶𖾐 𖼹𖽳𖾐 𖼺𖽪𖾐 𖼊𖽑𖽡 𖼽𖽚𖾐 𖼊𖽑𖽺 𖼞𖽪𖾐 𖼹𖽪𖾐 𖼺𖽺𖾑， 𖼈𖽪𖾐 𖼍𖽦 𖼞𖽳𖾐 𖼄𖽳 𖼻𖽙 𖼂𖽺𖾐 𖼮𖽑𖽳𖾐． 20 𖼈𖽪𖾐 𖼍𖽦 𖼞𖽳𖾐 𖼳𖽪𖾐 𖼮𖽨𖾐 𖼽𖽻 𖼞𖽳𖾐 𖼠𖽚 𖼠𖽻𖾐 𖼞𖽑𖽶𖾐 𖼦𖽑𖽺 𖼮𖽨𖾐 𖼦𖽑𖽻𖾐 𖼞𖽑𖽶𖾑 𖼮𖽶𖾐 𖼮𖽑𖽡𖾐， 𖼷𖽑𖽻𖾐 𖼀𖽑𖽙 𖼀𖽑𖽶 𖼊𖽴 𖼺𖽪𖾐 𖼣𖽻𖾐 𖼦𖽻， 𖼞𖽫 𖼺𖽪𖾐 𖼣𖽻𖾐 𖼦𖽻， 𖼻𖽙 𖼄𖽳 𖼄𖽡𖾐 𖼐𖽜𖾐 𖼞𖽑𖽙𖾐 𖼣𖽻𖾐 𖼽𖽻 𖼈𖽳𖾐 𖼞𖽳𖾐 𖼷𖽑𖽻𖾐 𖼀𖽑𖽙 𖼊𖽑𖽺 𖼐𖽦𖾐 𖼍𖽪𖾐 𖼊𖽻𖾐．”